قرأت من اختيار الأخت شموخ شمالية في منقول المضايف قصيدة جميلة عن العيد فاخترت مجاراتها بهالأبيات ، ولأجدد حضوري وتفاعلي بهذا القسم الذي درجت عبر بوابته الى ربوع المضايف والنت بشكل عام:
هذه أولاً قصيدة مزيونة العيد المنقولة للمضايف بواسطة الأخت شموخ لا أعرف شاعرها :
العيـد يسألنـي .. بنبـرة حزينـه
...........قام يتوجد .. واحرجن .. بالتناشيـد
يقول : وين (الزين) بالعيد .. وينـه
.............وين (البنات) ووين مزيونـة العيـد
وين (الهنوف) اللي خذا العقل ..زينه
..............رعبوبة..زينه ضحى العيـد بيزيـد
وين (البخور) ووين مسك المدينـة
...............وين (النقوش) اللي رسومه عناقيـد
وين (الخضاب) اللي نقع في يدينـه
...............وين (الجديل) اللي يسـرّح تجاعيـد
وين (الكحل) مرسوم بأهداب عينـه
...............وين (المطرّز) وين (دراعة) العيـد
وين (الحلي) اللـي تغطـي جبينـه
................. وين (العقود) اللي تزاحم على الجيد
وين (اللعب) وين النفوس الحسينـه
...............وين(الغناوي) وين حلـو الزغاريـد
وين (الآصالة) .. يالعقول الرزينـه
.................وين (التراث) وين مجـد الأجاويـد
وينه . ووينه . رددوا . وين . وينه
................ضاعت وذابت به سلـوم ..وتقاليـد
وهذه قصيدتي :
الحمد لله واشكره واستعينه
................. المعطي المانع وفعال ما يريد
قبل ابتدي جوابي بكل سكينه
................. على تساؤل فاقد العيد والعيد
من يذكر ان ما عاد للزين بينة
................. من راحوا البدوان نزالة البيد
يوم الخدين يشوف فيها خدينة
................. على النقا بين النزل والمواريد
واقول خذ علم الحيا من جهينه
................. يأتيك بالاخبار صدقن وتأكيد
لو المظاهر تختلف مع سنينه
................. الزين يبقى ما بقى بالوطا غيد
الزين واجد بالقرى والمدينة
................ في كل ديرة عامرة دون تحديد
تلقاه بالخفرات لاكن معينه
................. مع تسعة اعشاره ومركزه بـ (رغيد)*
لكن تدرون الغثا والغبينه
................. الي تصيبك وانت في عيد وسعيد
ليا ابطا معايد عاقل لوالدينه
................. او ابن عم احفيت عنه التناشيد
ترفض تدينه والمواقف تدينه
................. تعده سندك ويحسبك عمرو أو زيد
أشد من قطع الشمال ليمينه
................. واقسى من ابعاد الصغيّر عن الديد
وعسى يعود العيد لمعايدينه
................. بليا مواقف تنتقص فرحة العيد
*رغيد: هي رغد أو رغودة أو رغيِّد أو رغيد طفلتي ذات الربيعين
رد مع اقتباس
المشاركة الأصلية كتبت بواسطة عبدالرحمن
المفضلات