جاك الفرج يامنتظر طلعة سهيل
أيام ويذعذع نسيم البرادي
جهز زهابك وانتبه للمعاميل
واختار من صفر الدلال الجدادي
خذ ماتبيه وزود البن والهيل
يكفيك لين تعود صوب البلادي
واحرص على العزبه وحط الفناجيل
زود عددها لاتصير اقتصادي
واختار خوة طيبين الرجاجيل
اللي لهم رغبه بقطع البيادي
اهل العلوم الطيبه والتماثيل
اللي سوالفهم لجرحك ضمادي
من طيبهم تقول ذولا مهابيل
اهبال طيب ولاعليه انتقادي
انصوا ديار عمها وابل السيل
جانا خبرها والعلوم الوكادي
حيا وفيا للحباري مداهيل
شي قديم وشي لفو جدادي
تغانموها بدهم كنه الليل
غريب لون ومايل ٍ للسوادي
العام فعله واضح بالتفاصيل
عليه شرط انه الاهد صادي
ولا اشقر سوات لون الغناديل
لاشفت وصفه قلت ماهوب عادي
من قال فيه تقول خل الاقاويل
هذا هوى بالي وغاية امرادي
من فعله الهارب تشوف الغرابيل
يموت في طرد المقفي اعادي
وبعد الغروب ايزين وقت التعاليل
كل يقول افلان بالفعل زادي
سوالف ماهيب كذب ودهاويل
ماهي اعلوم مجمعين الدوادي
رجّالهم يفيد هرجه الا قيل
ولّا سمع لهروجهم واستفادي
ماهوب لاصكت عليه الحلاحيل
يجيبها لاضاق من كل وادي
والصبح تلقى جمعهم بالتكاميل
ساعة ينادي للفلاح المنادي
أيام نقضيها بحل وتراحيل
واهل الولع قالوا ربيع الفوادي
توارثوها الناس جيل بعد جيل
واجب عوايدنا القديمه تعادي
والعذر مني في ختام المراسيل
ختامها يعبى بمسك وزبادي
وصلاة ربي عد وبل المخاييل
على نبي للمخاليق هادي
رد مع اقتباس
المفضلات