سؤال لأهل الخبرة والمعرفة .!؟

[راعي الوقيد]

السلام عليكم ورحمة الله وبركاته

من قائل هذه الأبيات وما مناسبتها ؛ واذا كان هناك قصة لها نتمنى سردها


أول نهـاري دمـع عينـي قويتـه * واتلا نهاري دمع عينـي قوانـي
على الذي مـن بـد حيـي هويتـه * وهو الذي من بـد حيـه هوانـي
أنا الـذي طـي المريسـم طويتـه * وهو الذي طي الجرايـد طوانـي
وانا الـذي سـم العقـارب سقيتـه * وهو الذي سـم الحيايـا سقانـي
وانا الذي سبـع المكـاوي كويتـه * وهو الذي سبعيـن كيـه كوانـي

ولكم التحية

[أبو فهد]

والله يابو فيصل على ما قال قوقل كآخر حل



إنه لبنت عنزية قصدت بولد جارهم عقب قصة عشق بطولية

و الكثير من القصايد ما يعرف قاصده و ربما مقصوده و مناسبته


والله أعلم


----------------
أبو فهد الهمزاني

[الجازي]

خخخخخخخخخخخخخخ

الحين يجيك ريال يركض بيفزع


قوقلت لك يابو فيصل وطحت على القصة والقصيدة بس عاد ما أجزم بمصداقيتها



هذه القصه حدثت لشخص يدعى معثم بن غبين من عنزه اصاب ديرة القحط فرحل يبحث عن المكان المناسب ليعيش فيه وهو في الطريق تصادف مع فارس اخر من غير قبيلة معثم فسأله معثم :ماوراك فأجابه زوجتي وابنتي وابلي وكان الفارس الاخر يدعى ابا الخلف فسأل ابا الخلف معثم وانت ماوراك فرد معثم زوجتي وابنتي وابلي .

وكان معثم ليس لديه بنت بل كان ولد واسمه عقيل.

وعندما يدور في بالك لماذا معثم لم يقل ان لديه ابن ؟

اجاوبك انه خاف على ان ابوخلف ان يكره قربه بسبب الفتى

وتعاهدا على ان ينزلا بالقرب من بعض وان يحمي كل منهما الاخر وان يكونوا يدا واحده فهذه بعض صفات العرب.

فذهب معثم واخبر زوجته فرضيت زوجته بالاقتراح ورضى عقيل فطلب معثم من ابنه ان يلبس لبس فتاة وان لا يتكلم في وجود زوجة الجار او ابنته حتى ينتهي الربيع.

فبدا المتشبه بالفتاه يسرح مع ابنة جاره بدون ان تلاحض عليه شيء وذلك لعفته وحيائه.
.................

ولكن المخفي والمكتوم لم يدم فقد .........

حصل الامر الذي يرغم الفتى بالكشف عن حقيقة وابراز شخصيته

فقد غار قوما على الابل فأخذوها ولحق بهم معثم وابا الخلف فلم يستطيعوا ان يرجعوا الحلال.

وعندها لم يطل الصبر بعقيل ركب فرسه حيث انه كان من ابرز الفرسان ذاك الوقت.
واستطاع ارجاع الابل .

اصيب الجميع بالدهشه فكيف انه فتى وكان ويخرج مع الفتاه .

ولكن ارجعت الفتاه ذاكرتها الي الوراء فكانت تلاحظ ان الفتاه التي معها لا تنظر اليها ولا ترفع عينها فيها وانا ترفض ان تنزل معها في الغدير للاستحمام وكانت تدير ظهرها لها .

هنا تأكد للفتاه عفت وشرف هذا الفارس عقيل.

وعندما وصل عقيل الي المنازل ومعه الابل وبعض الاسرى قابلته الفتاه بهذه الابيات


هلا هلا باللي سلامه يداوي ...........ماهو زبون للعلوم الرديه

اشهد شهادة حق ماهو دناوي........ولا شبوح العين للاجنبيه

عقيل من شفته خجول حياوي.......من عرفتي ماباق غرةخويه

فوق العبيه مثل فرخ النداوي.......ينف خيل القوم نف الرعيه


فرد عقيل :

ياعم والله ماجعلت الغطاوي ......ويشهد على ماقلت رب البريه

عن طاري الشكات ولا الهقاوي ......حلفت لك والله رقيب عليه

عن المشكه يازبون الجلاوي ........شاروا علي بشورهم والديه

ويوم خذونا طيبين العزاوي.........دون العشاير مانهاب المنيه


وبعدها فهم والد الفتاه سبب تخفي عقيل وهي كرامة للجار خشية تنفيره من وجود فتى

وبعد انتهاء الربيع رحل كلا الي اهله وافترق عقيل عن الفتاه ولكنه ضل هائما في حبها حتى مرض بسبب فراقها

وعلم صديقه فهيد بان عقيل مريض فبعث بطبيب عربي لعلاجه ويدعى عيد

وعندما احمى عيد المنشار ليكوي عقيل قال عقيل :


يامحمي المنشار بالنار خله.......جروح قلبي حاميات مكاويه

مابي مرض ياعيد لاشك عله......من غير شفي ماطبيب يداويه

ماطيب لو تحمى المخاطر ابمله.....انا بلا قلبي على فقد غاليه

الصاحب اللي عنده القلب كله..........علمي بدور العافيه قبل اخاويه

واليوم مدري وين حروة محله....فاتن ثلاث سنيين ياعيد نرجيه


وعرف عيد سبب مرضه وتجاهل الامر واصر على ان يكويه حتى يتضح له اكثر .

وبعد الكي قال ستطيب فرد عقيل:


ياعيد لوكويتني مابي اوجاع ......ليتك عرفت بعلتي وش بلايه

بلاي غرو طول قرنه يجي باع....ياعيد دعني لا تبيح خفايه

مادام مانت لعلة القلب نفاع .....ياعيد مالك بي تحمل خطيه

ياما عذلت القلب ياعيد ماطاع......اطلب وربي مايخيب رجايه


وبعد ان عرف بامره معثم طلب منه ان يرافقه لخطبة الفتاه وفعلا فقد زوجه الفتاه وقد انجبت له ولدا وهو معروف اسمه عباس ولقب ابو طاسه ولقد عرف عنه الشجاعه والبساله .

ومن الابيات التي قالتها الفتاه على فراقهم :


اول نهاري دمع عيني عصيته...وتالي نهاري دمع عيني عصاني
وغارب قعودي من دموعي سقيته......مثل هماليل البرد يوم جاني
على الذي من بد حيه بغيته......وهو الذي من بد حي بغاني
وسبعة مخاطر بالضماير كويته ......وسبعين مخطر بالضماير كواني
وانا الذي طي الشويحي طويته.....وهو اللي طي البريسم طواني

[الحيمري]

السلام عليكم ورحمة الله وبركاته

من قائل هذه الأبيات وما مناسبتها ؛ واذا كان هناك قصة لها نتمنى سردها



أول نهـاري دمـع عينـي قويتـه * واتلا نهاري دمع عينـي قوانـي
على الذي مـن بـد حيـي هويتـه * وهو الذي من بـد حيـه هوانـي
أنا الـذي طـي المريسـم طويتـه * وهو الذي طي الجرايـد طوانـي
وانا الـذي سـم العقـارب سقيتـه * وهو الذي سـم الحيايـا سقانـي
وانا الذي سبـع المكـاوي كويتـه * وهو الذي سبعيـن كيـه كوانـي

ولكم التحية

اولا يابو فيصل نوضح لك والقارئ هذا البيت

أنا الـذي طـي المريسـم طويتـه * وهو الذي طي الجرايـد طوانـي
انا الذي طي البريسم طويته//وهو الذي طي الجرايد طواني
اما بالنسبه البيت يقول الشيخ قوقل وينسبه لراويها عنزي
((وانا الذي طي الشويحي طويته//وهو اللي طي البريسم طواني))

البريسم المعروف اسهل طوي طوي خيوط البريسم على بعضه
والجرايد هي جرايد النخل اذا ذبلت يطوونها حطب


القصه بدون الشيخ قوقل

فيه شمري نازلن لحاله ماعنده الا نياقه وزوجته و أبنه وفرسه في ديرتن خلاوي ماعنده الزول وراح يوم يرود ارض وحصل الارض اطيب من ارضه وهو يدوج وشاف له خيال على رجم ونحره ويوم جاه وسلم عليه عرف أنه عنزي وكذلك الرجال عرف أنه شمري سئله الشمري قال وين اهلك علمه وقال العنزي مامعي الا زوجتي وبنتي ونياقي وفرسي قالوأنت وأنا مثلك قال نبي نتقاصر بهالربيع وتعاهدو كلا رجع يم اهله ورحل يم المكان

ولكن الشمري قال لبنه ياولدي انا حصلت لي عنزي وكذا ماجراء بيننا وانت اليوم البس من ملابس أمك وخلك بنت يما نتفرق الولد اطاع والده ولبس من ملابس أمه وحطل له ملثم وضبط روحه الولد مانبت بوجهه الشعر ويقولون تقول زين بنت ويسرح هو والبنت مع ابلهم على انه بنت يقول خويته تاكل وتشرب قدامه وهو يحاول يقوم ويتعذر بقله شهوة الاكل وياطبه بوسط الغدير العنزيه تسبح وتحذف الملابس يقول الشمري يتعذر أنه يكره السبوح ولايقدر

جا يوم من الايام والشيبان مع الابل اغارت عليهم غزو وخذو الابل وجو الشيبان لاهلهم والولد يركب الفرس والحق الغزو وجنب والعبات جناب

ويفك الابل والقلايع كثيره قال العنزي يشمري خنتني تقول لي بنت واليوم طلع ولد وبنتي تسرح معه وهي تجي بنت العنزي قالت ياوالدي والله أني مادريت أنه
ولد الا اليوم

يقول وخذو لهم ايام والبنت طواها العشق على ولد الشمري وهو كذلك ويوم تفرقوا أنمرض ولد الشمري مرض موت والده ماخلا حكيم مع العربان ماشافه
يقول الولد وصله علم ان البنت مريضه يقول وهو يشد ذلوله منتصف الليل وهو
يمشي يم ديره معشوقته ويوم وصلهم وهو يظيف عند ابوها عرفت البنت أنه هو
وهي تقوم وتسلم عليه ابوها عرف السالفه وهو يزوجهم ويطيبون كلهم راح المرض

القصيده للبنت العنزيه


هذا على ذمه الراوي
وسلامتك يابو فيصل
أنت والقارئ

[راعي الوقيد]

تسلم يابو فهد على الإفادة
الله لايخلي منك يالغلا
شاكر ومقدر
تحيتي لك

[راعي الوقيد]

اشوى الله فكنا من ريال وفزعاته
مشكورة يالجازي ع التوضيح والإفادة
تحيتي لكِ

[راعي الوقيد]

شكراً يابو منيف على التصحيح والإفادة
شاكر ومقدر لك حسن تجاوبك
لك التحية

[روحي بحايل]

ان قبيلة الغبين من الفدعان كانت ديارها حول خيبر ويم من هالايام جاهم قيض وقحط شديد وكلن تنصى يم الديار المخصبه وكان من ضمنهم معثم بن غبين ومشى من خيبر و للحماد ياما وصل طريف ولقى به الريف وهكا الديره المربعه الوكاد ركب خيله واخذ يدور على عشب أكثر ويم وصل خبرا أم أوعال في ذيك المنطقة والله ويشوف له خياّل وراح يمه وكلمه وعرف كل واحد منهم الثاني وطلع هالخيال يقاله أبا الخلف الشمري فقال معثم بن غبين وش وراك قال له وراي زوجتي وبنتي والبل ونشد ابا الخلف الشمري معثم بن غبين فرد عليه قاله بعد زوجتي وبنتي والبل ، وكان معثم ابن غبين عنده ولد مير انه طرى بنت حتى مايبين لجاره ويضايقه وولده اسمه عقيل بن معثم بن غبين ..

الوكاد تجاوروا وتعاهدوا ان محدن منهم يغزي على الثاني وانهم يكونون يد واحده على من عاداهم او يغزيهم الوكاد وتركوا بعض واتفقوا انهم ينزلون اليوم الثاني بنفس هالمكان اللي تواجهوا به ومع كل واحدن منهم ربعه ويم رد معثم بن غبين لزوجته قالها باللي صار فقالت طيّب خاطرك اما عقيل ولدنا نبي نلبسه ثوب بنت ونحرصه أن يكتم السر ياما ينقضي هذا الربيع وعقبه كلن يرد لديرته ...

المهم نزل ابن غبين وابا الخلف الشمري على الخبرا وبدأ هاللي متشبه بالبنيه ( عقيل ) يسرح مع البنيه الثانيه وما درت عنه أنه رجل بسبه عفته وحيائه وحرصه الشديد على كتم اسرار اهله مير المخفي لابد ينكشف فصار عليهم اليوم الثاني هالموقف اللي لازم ان عقيل يبين نفسه به ويم كانت البنت تسبح وهي بالخبرا وهو مبعد عنها وهي تطلب هالبنيه تجي معها وهي تعيي (عقيل) الوكاد وتجسي غارة على بل الشمري وياخذها قوم ويم راعت البنيه (عقيل) قال بخاطره اما حياه تعز الرفيق والا ممات يضر العدى لا والله وهو يفصخ هالثياب ويركب فرس ابوه ويحذفه يم هالغزاة ، وقبل لايطردهم كان ابا الخلف الشمري ومعثم بن غبين يلاحقونهم مير ما تمكنوا منهم ، وتصوب ابا الخلف وانكسرت ساقه منهم ، ويم راعى ابا الخلف لها الفعل انجن جنونه الوكاد وهو يرد البل عقيل بن معثم بن غبين ويمنع الغزاة ويأسرهم ويم جا عقيل لابا الخلف الشمري وأقسم له أنه ماراعى للبنت وكان محشوم وماقرب صوبها وانه معتبرها مثل خيته وطبع يم جاء بالحلال قالت البنت الشمريه :


هلا هلا باللي سلامه يـــــداوي *** ما هو زبون للعلوم الرديـــــه
أشهد شهاده حق ماهو دناوي *** ولا هو شبوح العين للاجنبيـه
عقيل من شفته خجول حيـاوي *** من عرفتي ما باق غرة خويه
فوق العبيه مثل فرخ النــداوي *** ينف خيل القوم نف الرعيــــه

فقال عقيل بن معثم بن غبين يرد بنفس القافيه ويوضح لبوها اللي صار :


يا عم والله ما جلعت الغطـــاوي *** ويشهد على ماقلت رب البريه
عن طاري الشكات ولا الهقاوي *** حلفت لك والله رقيب عليــــــه
عن المشكه يا زبون الجــلاوي *** شاروا علي بشورهم والديـــه
ويوم أخذونا طيبين العــــزاوي *** دون العشاير ما نهاب المنيــه

انشهد : دون العشاير ما نهاب المنيــه!!

العشاير : البل

وعقبه اقتنع ابا الخلف الشمري بسبة تخفي عقيل وهي كرامه للجار خشيه تنفيره من المجاوره واتضح ان عقيل عفيف وبعيد كل البعد عن الرذيله وعقب انقضاء الربيع رد كل واحد لديرته مير الحب بلوة وتعلق قلب عقيل بها الشمريه وهي هاللون بعد وجاء لعقيل مرض الحب اللي تمكن منه ياما ضعف جسمه وكان له صديق هاك الوقت هو الشيخ فهيد بن شعلان ويم جاه خبر مرض عقيل أرسله حكيم (طبيب عربي ) يقاله عيد ويم جاء عيد لعقيل نشده وش انت تشكي منه يا عقيل قاله عقيل ما اشكي من شين ياعيد وقم يا عيد واكوي عقيل بها النار ، وطبعا عقيل ما تغير عليه شيء نفس الحال ويوم من هالايام اخذ عيد المنشار وهو يحميه ويكوي عقيل ثاني .. فتهيض عقيل وقال هالابيات لعيد ويبين له سبة علته :


يا محمي المنشار بالنار خلــــــه *** جروح قلبي حاميات مكاويـــــه
مابي مرض يا عيد لاشك علــــه *** من غير شفي ما طبيب يداويـه
ما طيب لو تحمي المخاطر ابمله *** أنا بلا قلبي على فقد غاليـــــــه
الصاحب اللي عنده القلب كلـــــه *** علمي بدور العافيه قبل أخاويه
واليوم مدري وين حروة محلــه *** فاتن ثلاث سنين ياعيد نرجيــه

ويم عرف عيد أن عقيل علته داء العشق وتوكد منه مير أًر على الكوي وتجاهل هالشيء واخذ يكوي عقيل حتى يعرف اللي بصدره اكثر وقاله انك عقب هالكي بتطيب فقال عقيل هالابيات :


يا عيد لو كويتني مابي أوجــاع *** ليتك عرفت بعلتي وش بلايه
لبلاي غرو طول قرنه يجي باع *** يا عيد خلن لاتبيح خفايــــــه
ما دام منت لعلة القلب نفــــــاع *** يا عيد مالك بي تحمل خطايه
ياما عذلت القلب يا عيد ما طاع *** اطلب وربي ما يخيب رجايـه

وعقبها عرف عيد سبب شكوى عقيل وخبر أبوه معثم بن غبين وصديقه الشيخ فهيد بن شعلان فجهز معثم بن غبين قطيع من الهجن وحط عليه ما يلزم للسفر وانصا جارنا ابا الخلف الشمري واطلب بنته للزواج عساه يزوجك هو جارنا ويعرفنا ويبخص طيبنا ويم راح عقيل ومر على ديارهم الاولة اللي اجتمع بها مع البنت قال :


يا دار يا ديرة مـــــــــرادي اودي *** عقب المحل يا دار خلي مريفـــــــه
أنشدك عن دافي الحشا وين مدى *** وضايفك أنا لمهزهز الصدق ضيفه
قالت عشيرك مد صوبي وقــــدي *** ودونه ديار للمسافر مخيفـــــــــــه
ان طعتني عن صاحبك تستجــدي *** الياما توفق لك ضعون الصخيفــــه
ما طيع لو يظهر من القبر جــدي *** ولو تنزل الهوجا شعيب المنيفـــــه

واكمل مسيره ياما وصل لحي هالبنيه ونزل ضيف على ابوه وخطبها وزوجوه وعاشوا مع بعضهم وجاب منها ولد اسمه عباس لقب ب (( أبو طاسه )) لشجاعته واقدامه وعقب مارد بها لديرة اهله نشدها عقيل قالها ماقلتي شعر بي او قصايد عقب الفراق قالت له الا هاك :


أول نهاري دمع عيني عصيتــــــه *** وتالي نهاري دمع عيني عصاني
وغارب قعودي من دموعي سقيته *** مثل هماليل البرد يوم جانــــــــي
على الذي من بد حيه بغيتـــــــــــه *** وهو الذي من بد حيي بغانــــــي
وسبعة مخاطر بالضماير كويتـــــه *** وسبعين مخطر بالضماير كوانـي
وانا الذي طي الشويحي طويتـــــه *** وهو الذي طي البريسم طوانــــي

فعلمها عقيل ابن معثم بن غبين بالقصايد اللي قالها بها اول ورد على أبياتها الاخيره بها القصيد :


الشاهد الله زولكم ما نسيتـــــــــه *** وأنا أدري أن صويحبي ما نساني
والشاهد الله بالردا ما نصيتـــــــه *** والله ما ناشت ثمانه ثمانـــــــــي
وأنا الذي من نازح البعد جيتـــــه *** وجادوا علينا موجبين العوانـــــي
الشر زال وشف بالي خذيتــــــــه *** زان السعد واليوم ساعف زمانــي
واللي جزم عن صاحبي ما جزيته *** لو قال هات الروح مابه مثانـــــي

</B></I>

[أبو فهد]

و هذا جواب جديد




ملاحظة : تم دمج موضوع الأخ روحي بحايل مع موضوع أبو فيصل




----------------
أبو فهد الهمزاني