ريالووه جب خبراتك وتعال:)

[الجازي]

يجيلتس يوم وتحتاجين خبراتي

^
^
يالله تسانك صادز خل عنك الهياط وافزع

والا لاعاد تحتسي

عندي مقاطع فيديو في الآيفون أبي أنزلها كروابط مباشرة

إذا خبراتك تسعفك وتلقى لنا برنامج يحل هالمشكلة عطني إياه !!؟

واذا كالعادة السالفة هياط في هياط بعطيك فرصة ثانية ترقع هياطك فيها

أنا نقلت المقاطع للاب توب على أساس أحملها من مركز تحميل بس يوم فتحتها أتأكد منها لقيت الدنيا مقلوبة

يعني كأن التصوير صاير بالمقلوب !؟

فهل عندك طريقة نعدل المقلوب عشان أحط لكم هالمقاطع


اسرع لاتبطي والا ترى بحولك على أبو خالد هو يتولاك <<<< بحكم اني واعدته بتغطية حصرية لمطر الرياض

[ريال الفسحه]

هلا بخالتي


ولو انتس انتقصتي قدراتي وتهكمتي على خبراتي
الا ان باب العفو عندي مبرهج اي مفتوح


المهم


مافهمت من حتسيك شي الا ان الفديو مايطلع
كماهو عندما تحولينه للاب ..


انا صورت فديو وخليت واحد يزعج الصوت
ولو وجهوه يساعد تسان صورتوه

http://www.zshare.net/download/968465510205aaf9/

ونزلته ع الاب وماكان فيه صوت وحولت الصيغه حقت
الفديو بواسطه محول الصيغ وحملتوه على موقع التحميل
وكل شي زي مانتي شايفه



المهم اذا الفديو يشتغل ع جوالك ميه ميه حاولي
تغيرين الاب وشوفي هل فيه فرق او لا ..
وحاولي تغيرين صيغه الفديو لان مشغل الفديو
يختلف من جهاز لجهاز ..




وعسا جوالتس يحترق ويلحق جوالي


ريال الفسحه
وكيل الدعم الفني لشركه ابل في الشرق الاوسط

[ريال الفسحه]

ليت هالجهود عاد تثمر بتس

[سالم الظفيري]

والله سراحة ماقصرت اخوي ريال

هاذي الخبرة ولا بلاش

لاهنت ياذيب

[عبدالرحمن]

هذي المساعدة ولا بلاش
ايه عفيه ذيب روضة خريم ساعد كبار السن

[الجازي]

ريالووووه


حرام عليك


أنت متأكد انك مالك أصول بنقالية <<<< او تهقى تأثرت بالبنقالية اللي بخطبها لك


انت تفهم عربي !؟

أقول لك المقطع يشتغل بس صورته مقلوبة كأني مصورة بالمقلوب <<<< مع اني أهقى انك بتشوفه زين دام راسك مقلوب


والله اني دارية انك ماوراك الا الدجة الله يصبرني عليك ويصبر فسحولتك في المستقبل <<<< أنصحك تاخذ وحدة نفس قدراتك حرام تعذبها الضعيفة بهالذكاء الخارق

[الجازي]

بعدين تعال

مقطعك لا صوت ولا صورة ولله الحمد

يعني مدري وش أنت مكلف نفسك الله يسلمك عليه

ياليت الربع يفتحون رابطك ويعلموني وش يطلع لهم عشان ما أتبلاك


بسرعة بعطيك فرصة ثانية تفهم كلامي وتلقى لي حل !!

والا تراني أبري ذمتي ويستلمك أبو خالد <<<< صرت عهدة آخر عمرك

[ريال الفسحه]

الله يسامحك يالعجوز

شكلتس قالبتن الابتوب خخخخخخ


::

طيب عرض خاص لك


ارفعي مقاطعتس وهي مقلوبه وارسلي الروابط ع الخاص
ومالك الا روابط لمقاطعك وهي عدله وش تبين بعد ؟



يثمر بتس ياخاله

[الاصمعي]

سلمان وش هالرابط؟

فيه خيار تحميل وواحد تشغيل اخترت التشغيل وطلع لي:

كم اسبوع بالسنة؟

ههههههههههه

والله مدري عنكم بس الوكاد هالأمطار الي طاحت على ديار الكنق لزوم تدبرون لكم حل عشان نشوفها ، أقلها ندعي له<<تسنه مكرمة منه

أنا معتقد اعتقاد الشيعة بسادتهم بلي عضو هنا لوهو مختفي من تالي وهو "ملامح شمري" انه يعرف كل شي حتى اني مرات يطري علي اسئله عن أعطال سيارتي

عاد لو تسوون له نداء أهم شي نشوف الصور

[ريال الفسحه]

ابوخالد ااذا جيت تختار كلمة داون لود اختر هذي

وتلقاه باخر الصفحه



وبعدين انتظر شوي ويجيك عداد ثواني بعده تحمل


وعطني خبر