مافي اجمل من الهدؤ والوحده لكن السفر لايمنعها
تدري يابو محمد وش اجمل لحظاتي واللي استمتع فيها حيل !!
يمكن ماتتوقع !!بما اني بنت بطوطه ولي في كل بلد ممر ومستقر
لكن رغم مروري على اجمل جنان الدنيا فلحظاتي الاجمل
هي اللي تكون في البر امشي حافيه ولحالي 
لاني ارجع وانا مشحونه طاقه ومليئه بالهدؤ وصفاء الذهن
اصلا استنشاق هواء بعيد ولو بقليل عن التلوث بحد ذاته كافي
بالاضافه الى الوحده اللي هي احيانا مطلوبه
وهل تدرين ان المشي بهذه الطريقه علاج !!
ريم يقولك جسم الانسان يحمل شحنات كهرومغانطيسيه
تؤثر على مزاجيته يفرغها الانسان بالمشي حافي
فاحيانا نعمل الصح من حيث لا ندري
والوحده استفراغ كل مايسئ للنفس من المجتمع
الوحده هي تدريب النفس للاستمتاع
بأقل الموارد الممكنه للمتعه لذلك هي حسنه
تذكرين ريم زمان
كان عندنا قناة وحده ومع ذلك مستمتعين بال تي في
اليوم 99% من القنوات ما نعرف وجودها
الا من خلال مرور الريموت من عندها ومع ذلك مو مستمتعين
فالانسان اللي يحب الاندماج وتتغلب عليه هواياته
يطلب المزيد من الاندماج وهنا الخطر
ههههههه مو قلت لك فيلسوف يابو محمد
لكن فلسفتك للامور بسيطه ومؤثره
على فكره انا مااحب الفلسفه حيل
ساعات ماافهمها
احب الفلسفه اللي تنتج حكمه
مو مجرد كلام مصفوف ومعاني ضايعه ومعقده
الفلسفه شي ليس خارق على الفهم ولكنه صعب على التطبيق
تدرين مره قلت لواحد تدري ليش مدينة افلاطون الفاضله فاضله قال لا
قلت لان السعوديين ماصيفوا فيها
ريم لا تقرين فلسفه كثير
انتي اخلقي فلسفه خاصه فيك
هذي حكمه في طرفه يابو محمد
مااقرا والله قلت لك ماحبها !!
وماحب اكثر ...من يدعيها !!
برأيي البساطه دائماً اكثر ابداع وعبقريه
ريم انا يُعيب علي عمي ابتسامتي
يقول دايم تبتسم قلت وش فيها الابتسامه احسن من التكشير
قال لا بس هذا معناته ان قلبك (فضيخ )
قلت لا مو شرط انت فسرتها على هواك
قال ماتحتمل تفسير اخر وهذي مشكله ان كل
واحد يحكم من وجهة نظره هو لا من وجهة نظر الاخر
قلت يا عمي على انك اكبر مني لكن
ماهو صحيح كلامك انا ابتسم لحاجتين فقط
ابتسامة اعجاب وابتسامة سخريه
نفس الملامح لكن يفهمها من تكون له تلك الابتسامه
بمعنى اخر لو سبيتني وش تنتظر مني قال انك تسبني
قلت وهذا اللي تبيه انت ترفع ضغطي
لكن انا برد عليك بابتسامه ترفع ضغطك انت
ولا تكلفني الا حركه لا اشعر بها قط
طيب اصبر اول وش معنى كلمة ( فضيخ )
ترجم الله لايهينك !!
والا لحظه خل احاول انا
يعني ماتهتم !! لامبالي !!...صح !!
طيب
حتى الكلمات يابو محمد ممكن تكون نفس الكلمات
لكن يختلف وقعها حسب من توجه له والذكي يفهم
احياناً اتحدث بما لااعنيه وكلي امل ان تصل كلماتي كما يجب
واحياناً العكس ...لكنها غالباً تظل طريقها !!
وهذا بصراحه يزعجني !!
صحيح ريم معنى الكلمه لا مبالي!!
وصحيح بالنسبه للكلمات لكن دوما ياريم
لا تشكين ان اللي قدامك ذكي ... هم قله
اجعلي من امامك احمق البشر
فللاذكياء زلات
ابو محمد على الطاري
بين لي وجهة نظرك بقضية الربط بين الاسلام والفلسفه
اللي سبق وكلمتني عنها ووعدتني توضحها لي
ريم انا اقول ان الاسلام
وهو الدين الذي لا تشوبه شائبه بني على فلسفه!!
معليش بوضح لك رؤياي بالامثله
زيارة المريض نعرف فضلها
والمريض انسان لا يحتمل الجلسه امام الزائر
والزائر احيانا لا يطيق الذهاب الى انسان يئن
عندما تاتي الى المريض وتقوله لا ماشاءالله اليوم وجهك احسن
داخليا المريض يستشعر الصحه
فتتغير ملامحه
حتى انها تعتبر علاج الزياره
هذي اليست فلسفه
الصلاة وش تنظر له ام طلال ؟
والصلاة عمود الاسلام
الصلاة لا تنهى عن الفحشاء والمنكر لمجرد انها صلاة
ولكن ان الانسان ادى هذه الحركات يستشعر بانه ادى
ركن عظيم وطاعة لله كبيره فينتهي عن ما يعارضها
الصلاة ليست ركوع ولا سجود الا بوصفها فقط
الصلاة هي تربية للانسان على احترام الزمان والمكان
ليش ما كانت الصلاة باوقات غير اقاتها هذي؟!
الا لاحترام الانسان للوقت ومع ذلك نحن اكثر بشر يخل بالوقت
المكان الذي لا ندوم فيه لا نهتم فيه والبر دليل على ذلك
مع الاسف نصلي ولا ندرك الصلاة
عشان كذا انا اشوف ان الاسلام دين رباني متعامل بفلسفه
مع طبيعة الانسان ولذلك اختاره رب العزه والجلال بأن يكون آخر الاديان
وجهة نظر عجيبه لكن رائعه ...ومااقدر اعارضك فيها
طيب وش رايك بالاحداث الحاليه اقصد على المستوى المحلي
المناوشات بين عدد من الاطراف والقضايا التافهه اللي مشغليننا فيها
رغم اني اعرفك وافهم تفكيرك لكنك مقل بالكتابه لذلك مظطره
الجأ للقوه واللي مايجي بالطيب يجي بالاستجواب
تدرين وش مشكلة دولتنا ياريم
انها دوله بلا تاريخ تاريخها ابتدى عام 1319 والامم بتاريخ
ولا عندها استعداد ان تبني تاريخ فجعلت التخبط شعارها بامور لا تغني
ناهيك عن انها لا تريد تاريخ تريد فقط بطون وبشوت
وهذي المشكله
يعني جالسين نناقش قيادة المرأه وننسى التعليم
جالسين نناقش ان العيال والبنات يختلطون بالصفوف الدنيا ولا نناقش المنهج
جالسين نناقش حرية المرأه وناسين كبت الرجل الفكري
وربي ماتعديت الحقيقه يابو محمد لكن من يستوعب !!
تدري عاد !!
تمنيت هالحوار الحلو يكون في المضايف علشان الكل يستفيد ويستمتع
بعدين ترى انت واعدني بمواضيع جديده لاتنسى !!
وبما انا فيها بعد اذنك يابو محمد يمكن اقتبس من حوارنا ومراسلتنا وانزله بالمضايف
لكن اكيد مع حفظ الحقوق طبعا ...شرايك طال عمرك ؟!
ما نسيت وعدي والله ريم
ونعم اقتبسي كل الحوار لو بغيتي بس لا تنسبينه لي لوحدي
الحق لك في الاستفزاز !!
حفظك الله ام طلال
/
/
الحوار المرتجل مع اخي الفاضل والخلوق قلم شمر كان متعدد الاتجاهات
وطويل اختصرته واقتبست اهم النقاط
ولكم ان تشاركونا بالرأي عن مالفت انتباهكم من نقاط الحوار
جزيل احترامي وتقديري لك ابو محمد
[ دردشه على ضفاف المضايف ]
رد مع اقتباس
المفضلات