العيد عيد الله على الناس ينعاد
وانا ترى عيدي بشوفت عيونك
مع العيد وخصوصا عيد الضحيه له سواليفن كثيره معي
ولعلمكم انا مواليد عيد الضحيه
نزغه
حتى بالعيد ماخليت امي الله يرحمه تعيّد
اللي وده يهديني بهالمناسبه تورته او كيكه مع شموع
والا سياره آخر موديل
ماعندي مانع ولا دوّاس ولا فتون
هذا سنتن من السنين وحنا صغار
رحنا يالعايله الكريمه نعيّد يم خوالي بالقرية اللي مهي بعيده عنا
جيناهم الضحى
وعايدناهم ووافقنا عيدن عند خالي مسويه عند غنمه شمالي الديره
وانا ياخوكم كاشخن بشماغ العقل وعقال المرعز هكاللي تقل مصير دجاجه
لا ومن زين الحلايا
شرى لي ابوي ساعة سيكو ام صنقل وبازّن به قدام الناس
ولابسه باليمين عشان تلفت الانتباه وبس هذا انا اتقمّز
يوم جا حول اذان الظهر قالو اركبوا نبي نروح للغدى
عاد خالي عنده له جنر سياره اظن انكم تعرفونه
وحنا نتطابق بالحوض له هنقلين
منوة اللي يتجود بحناياه هكالحين وين راسه
الوكاد اني صرت حظيظ وارتسب اول واحد
واصير باليمين على زاوية الحوض من قدام
علشان الاعب الهوى بقذلتي
رتسبوا الجماعه كلهم وحرك بنا خالي
اقوم المس بيدي الاثل اللي على جال الردميه من توالى المزارع
اتصل دايم ولاحدن يرفعه
مادريت يالربع
اثري حدى غصون اثله دخلت بين يدي وصنقل الساعه
واحاول افكه من يدي عجزت والسياره ماشيه والعالم لاهيه
اثري الغصن قوي ولا انكسر
وهو يجرن يمه وانا لكم اتدودل من على الاثله
والعرب مشو وخلونن واصيح لهم ماش ماسمعونن
المشكله هالحين متعلق فوق يجي مترين او ثلاثه بالهوى
وان فكيت الصنقل اخاف اقع يصير لي شين
العرب روحو ولا انتبهو والظاهر انهم وصلو للغدى
وانا متدودلن بيدي بغصن هالاثله
الغصن الملوي ثقلت عليه وبدى ينكسر
مافطنت الا انا على راسي بالقاع
وانا انصفر واغيب عن الوعي
ماصحيت الا عقب حول المغرب
العايله الكريمه تغدو وعيدو ولعبو الوغدان وانا منصفر بمتساني
يوم جو مروّحين والا هاللي نيمن على جال الردميه
وهو يوقف خالي يحسبن حدى صخالهم طالعن من الشبك
وهو يصيح واويلي هذا جمران وشبلاه
وتشيلن وترشرش على من الماء
ياما وعيت وانا اعلمهم بالقصه
وتصير سالفتهم هكالليله علي
وسلامتكم
ّّعلى الجنر روّحو وانا بالاثلهّّّ
رد مع اقتباس
المشاركة الأصلية كتبت بواسطة متفاائل
المفضلات