ليت نفسي سلعـة عنـدي رخيصـه
كان ما أشعر بالقصـور وبالإهانـه
ليت ما نفسي على العـز بحريصـه
مثل نفس مغفـل مـا هـو تكانـه
مـا يهمـه زود عـز ولا نقيصـه
كنـه اللي داخـل دار الحضـانـه
لا فقـد حلـواه وإلا حنبصيـصـه
دلهـوه عـن البكـاء بالقرقعـانـه
حب عز النفس من يلبـس قميصـه
يعشق العليـا ولا يرضـى الطمانـه
لو هضم حقه ولـد عمـه خليصـه
لو نقل حمل البليهي مـا استعانـه
ومرهف الإحساس ما يرضى البقيصه
مير في تالي الدهـر خانـه زمانـه
طاب من قناص الأدنـاس وقنيصـه
ولاعـب بالمستحيـن الشقلبـانـه
ذا زمـان شايـخ دبـه ونيـصـه
وكل دحش نـذل مـا يفتـر لسانـه
ما لحق وقت بـه العيشـه نغيصـه
ولا حضر كـون المليـدا والشنانـه
بالعوافي داب مـا يبـرى قريصـه
ويفجعه بالخوف صوت الطرطعانـه
وكم ضحاح يجلب الضامي بليصـه
وإن بغى الماء حصله يبرق مكانـه
والذهب جلبه لغير أهلـه غميصـه
جامعيـن العـود الأزرق واللبـانـه
وخالطين التمـر برحيـه وشيصـه
ورابطين الحر مـع فـرخ السمانـه
الحـرار إلهـا عواريـف بخيصـه
ما تسـاوي الفارسـي والدرجلانـه
رجلهم ماله عن الجـود تحويصـه
ويشمل الصاحب بعطفـه وبحنانـه
بحر جـوده كـل محتـاج يغيصـه
خلق جوده قبل مـا يخلـق بنانـه
وإن نقيته من مشاكلـك العويصـه
يحتملها مـا يضيـق ابهـا بطانـه
كل ما كدنا الأمـل نفقـد بصيصـه
نذكر أصحاب الوفا لو هـم إذنانـه
وختمها صلوا على راع الخصيصـه
ما همـل وبلـه وأثمـر قحويانـه
ناجي بن سعد الصندلي
رد مع اقتباس
المفضلات