رادوي الشمري

**ابو ضاري** · 31-03-2010 08:33

للحين ماجاء الاحوال تسان ينتفونه

ليته مهو شمري

الله يهديك يالشمري

**الشبث** · 31-03-2010 09:37

يالربع هذا فلم مدبلج

ولا وش دراكم يالعربيه عن هالسالفة

عشرين مليون وغد ينولدون كل يوم

يا سلااام

ما دريوا الا عن هالمولود

الله لا يبلانا

لكن لا تعليق على عقلية المشجع الهلالي البسيطه كما قلت سابقاً

انا هنا ما اقصد الموضوع وعملة هالخبل

اقصد ردود بعض الهلاليين

مثل رد المهيني

وشهو مسوي رادوي يالحبيب ؟

اذا الضرب بالمباريات مرجله وفعل شجعان اجل وش نقول عن اسامه المولد

وبعدين اخوي منيف

ياخي لو جت من غيرك تسان تهون

هذا وانت مطوع تمدح تسمية مسلم على نصراني

اجل دبووووور

ما اقول الا كش على اعلام الهلال

وتقلدوا تحيتي

**ابو ضاري** · 31-03-2010 09:54

يالربع

لاتاخذونها من باب الشجاعه

والله لا يشرف هذا الاسم شمري

بعدين وش سوى ناطح القوم

المفروض من الاخوان مايعجبون بهذا الاسم

مانتشرف بهذا الاسم

**يـــوسف** · 31-03-2010 11:23

يالربع هالشمري وليدة عرب عز الله انه أجودي يوم سمآ ولده بإسم الفارس البطل رآدوي

وانا باتسر إبسمي ولدي جورج بوش ولحد يلبخ ويقول ليه تسمي أهم شي النيه

الله يعــز شمر بمثل هالوليدة الأجودي

**نافع بن طواله** · 31-03-2010 12:47

اعتقد ان الموضوع طلع عن الاصول

ووصل الى مرحلة سب ابو الولد وهالشي مرفوض

الاسم برأيي انه مجرد حروف ترمز لراعيه

ياكثرها الاسماء العربيه التي لا تحمل المعنى ورغم ذلك تسمى

ولا اعرف كيف تنسب للعربيه وهي لا تحمل المعنى العربي اصلا

وما ابي اذكرها حتى ما اكون اجرح باحد

وانتم مرت عليكم كثير من الاسماء التي تنسب الى العربيه وهي مجرد صف حروف

اما بخصوص الاسم الغربي

فأعتقد ان اسم لورنس = اورنس

لم يعيب صاحبه

بل انتقل من لورنس العرب الى اورنس ابن شعلان الى شمر الى باقي القبائل

من سمى لورنس العرب يوم سماه .... ماقيل عنّه مخطي ٍ ليه سميت
وان كانت حروف الاسامي وطرياه .... ما ترفعك مادام نفسك توطيت
والراس ما دامه قدح من مباراه ..... انشهد انه يقدح بذايع الصيت

في النهايه وجهت نظري ان الاسم ليس عباده من العبادات

بل هو مجرد حروف

ترتفع هذه الحروف ان ارتفع سهم تربية حامل هذه الحروف

ايه على فكره استدرك هنا بعض اسماء البنات الدارجه الغربيه عند عربنا

روز - صافيناز - شاهيناز - يارا - سارا - لورا - باسكال - نرفانا - سوزان - ... هذا اللي طرا علي

في النهايه ارجع واذكر ياجماعه انتم اكبر من انكم تغلطون على شمري ما غلط بحق احد

**شموخ شمالية** · 31-03-2010 12:56

*

لايجوز تسمية المسلم على الكافر
واذا قصدة الشجاعة ليه مايسميه عمر والاخالد ابن الوليد رضي الله عنهم

واذا هو معجبه فعلة رادوي يااخي يروح يعطيه درع ويفك ولده
من اسم عدو الله ورسوله

احترامي لك سلطان

**الشبث** · 31-03-2010 13:04

اوووما عاد ما غلط على احد

يابو طواله هذا يسمي نفسه شمري

واحنا من هالمنطلق نرد

ثم

هو مهو مجرد اسم

ابوه سماه على هالنصراني

واحب اقول لك قصه قصيره

كان فيه اعرابي ( بدوي ) جاء الى الرسول عليه الصلاة والسلام

وسأله "يارسول الله متى تقوم الساعه ؟

قال المصطفى عليه الصلاة والسلام " ما اعددت لها ؟ "

قال الاعرابي " إني احب الله ورسوله "

قال المصطفى " انت مع من احببت "

واذا عقليت جماهير الهلال كذا

اجل باتسر يجينا واحد مسمي ولدوه ولهامسون

والثاني لي يونق بيو

والثالث نيفيز

عاااادي

وش دخل الاسم صح

ابو طواله

انصحك تبحث بالشيخ قوقل عن حكم التسميه بأسماء الكفار

وتقلد تحيتي

**نافع بن طواله** · 31-03-2010 13:19

سلم لي على قوقل يابو ماجد

الاسلام ماهو للعرب فقط

يعني لو اسلم ميشيل بلاتيني

هل هو مجبور انه يغير اسمه ؟؟

هل يقصر اسلامه ولا يكتمل حتى يغير اسمه

الاسلام ليس للعرب فقط

الاسلام ليس للعرب فقط

الاسلام ليس للعرب فقط

الاسلام ليس للعرب فقط

**الشبث** · 31-03-2010 13:42

نافع

علشان ما تزعجن انت وصياحك

فقعت طبلت اذني

هاللي يقول انه شمري ومسمين ولده رادوي

منهو مسمين عليه ؟

على مسلم ؟

ولا على نصراني ابغض ما يشوف الاسلام ؟

خل الاسم ومعناه على جنب

وتقلد تحيتي

**نافع بن طواله** · 31-03-2010 13:51

طيب خل النصراني على جنب

وتذكر ان هالرجال له حق يدخل المضايف ويقول احذفوا الموضوع اللي يتكلم عني شخصيا وعن حياتي الخاصه

فما بالك وهو يتعرض للسب

يعني في النهايه انتم تسبون شمري ولد عم واحد منكم

ويمكن يكون احد اعضاء هالمنتدى

وفوق هذا فيه من قال عنه انه ماهو شمري

يعني هالجمله بحد ذاتها فيها محاكم وطعن في نسب