بسم الله الرحمن الرحيم
السلام عليكم ورحمة الله وبركاته
فرحة يتيم ٍ ليلة العيد , ما نام !
فرحت لك .. وأنا معاليقـي حطـام
والصدر .. من ما فيـه بيّـح كنينـه
فرحة يتيم ٍ .. ليلة العيـد مـا نـام !
خالاتـه , وخوالـه .. مواعديـنـه
مواعدينه بشـت .. وشمـاغ بسّـام
ويلّعبونـه .. فـي ملاهـي المدينـه
مانـام .. واحلامـه تحّـراه قـدام
كنه يطول أحلامه ب( راحتينـه ) !
صبحه تجّلا نوره ب/ عيد الاسـلام
وقبل يـروح المسجـد : ملّبسينـه
جده ما بين العيـن والجيـم والـلام
خلّيـه يافلانـه .. ولا تأخريـنـه !
تراقبه ب/ عيونها .. حـب وهيـام
وعيونهـا .. ممّـا تكنّـه / حزينـه
"يعرض لها الماضي مثل عرض الافلام "
ل.. ماضي ابـوه وغـلاه وحنينـه
يرجيه ل( سنين القسا ) درع وحزام
وجنب ٍ على صكـات بقعـا يعينـه
ابو ثلاث أعـوام .. والا 4 أعـوام
يغار منه البـدر .. مـن كثـر زينـه
صلّى وجاء وأمر الله اللي قضى تـآم
ماهوب داري عنه .. زينـه وشينـه
بشته عليه .. مهنـدم ٍ خيـر هنـدام
واللي ب/ عمره .. كلهـم محترينـه
يوم اطلعوا للشارع انقسموا أقسـام
وأهـم مافـي القصـه ؟ ملّعبيـنـه
تداعب رموشه .. ذعاذيـع الانسـام
ويابردها .. يـوم آيبسـت شفّتينـه
وعلى تراب الأرض بأصبعـه رسّـام
أما رسم لـه طيـر .. والا سفينـه
العيد طعمه كان في الشـارع العّـام
ماهوب عـن رغباتـه .. مقيدينـه
رجع ولكن فرحتـه ضايعـه ( دام :
كل ٍ مشى ) وأخذ ولـده ب/ يمينـه
صاروا خواله في نظر عينـه اصنـام
آحيوا ب.. داخله الجـروح الدفينـه
ولا عنده الا أمه وناب القهـر سّـام
جاها يبـي منهـا اليديـن الأمينـه
شعوره اللي حس بـه مثـل الإلهـام
وأول سؤال في باله : أبـوي وينـه ؟
سؤال : لكن كان مثل النبـا الهّـام
لازال باقي فـي المسامـع .. رنينـه
جته تعدي , ماهو تخّطـي بالاقـدام
وشالته بيديهـا .. وحبّـت جبينـه
أبوك : جاء البارح وقبل الفجر قـام
وشرى لك ألعاب , وهدايـا ً ثمينـه
تراه حبّك وأنت غارق في الاحـلام
وراح ل.. دوامه , والشغل مرسلينـه
لحظه .. وهو بين الحقايق والأوهـام
والدمع الازرق حايـر ف.. مقلتينـه
يمّه : تـرى مانمـت والعالـم نيـام
ماجاء .. ولا لمست يدينـي / يدينـه
مدام رقمه معك مـن بيـن الارقـام
ب.. أكلمه , يوم إنـك تكلمينـه !
طاحت ما كن آلها من الصدمه عظـام
ولاعاد فيهـا صبـر .. ولا سكينـه
قالت بدون شعـور وإدراك وإلمـام
أبوك ! فـي تـراب القبـر دافنينـه
العام مات .. ومتّ من موتـه العـام
وكني بعـد مامـات عنـي سجينـه
أبوك جندي للوطن ضـد الإجـرام
عطـاك عمـره دون داره وديـنـه
تفجّرت من تحـت رجلينـه ألغـام
ولاعاد لي بعده حصـون ٍ حصينـه
بكّت .. وطاح الدمع من حـر الآلآم
وبكى وطاح الكون من موق عينـه
كل ٍ عذلها .. بيـن عاتـب ولـوّام
تصّبري .. خلـي ضلوعـك متينـه
ماهو صحيح ان الضروره لها احكـام
اكبر خطـاء يـوم إنـك تعلمينـه
بكـره تنسّيـه الليالـي والايــام
هو فيه أحد ينسى حـدا والدينـه ؟
طير السعد فـي عالمـه مابعـد حـام
والله يعلـم وش تخـبـي سنيـنـه
أنا كذا ! ساكت وصابـر ومنضـام
لكن كـان الفـرق بينـي وبينـه :
الدمع ل.. عيون الأرامـل والايتـام
ودمع الرجل ذل وهـوان وغبينـه !
للمبدع / مشعان البراق
خــــــيــــــــــــالــــــــه
رد مع اقتباس
المفضلات