السلام عليكم
وش حالكم يالربع
انا مالي علم بالكتابه ولياقتي الكتابية صفر
والسلام عليكم ورحمة الله وبركاته
بالله عليكم وش قلتوا
اكيد قلتوا هذا مصخن
تحسبونن ابخليكم قبل ما امقس لي شوين
الليله يالربع عندي لكم سويلفه صارت امس معي بالدوام
السالفة اهي اني جالس بمكتبي واخلاقي صفر وفيه واحد من اخوياي رويلي مطنوخ وانا متاكد انه هو اللي يتحملن بهالجو
دقيت عليه
الو ابو زياد وينك
هلا بالجثري انا بالمكتب
وش عندك
ماعندي شي جالسن انقش خشمي واتصالك هذا قطع علي حبل افكاري وش بغيت
سلامتك والله قلت تسان ماعندك شين تعال نبي نتعلل
(ثواني الا ابو زياد عندي)
قلت ابو زياد تخبر احد يسلفن مليونين ولا يكتب علي وصل ويموت او يفقد الذاكره ثاني يوم
قال اي والله واجد وش تشتهي بس
قلت تدري واحلولات لو يغلط البنك وينزل بحسابي مية مليون
قال وش تبي تسوي بهن؟
قلت على طول ابراجع البنك وابشوفلي مدير نصاب ياخذ عشرين مليون ولا يسالن رجال عن الباقي
قال ايوه وش تبي تسوي
وانا انفلت بالحتسي ابي اشتري قصر لاهلي واعطيهم عشر ملايين وانا ابروح ادرس بالخارج ولا اجي الا ومعي شهادة دكتوراه باي تخصص انشالله بتصليح الستاير اهم شي يقولون الدكتور الجثري ...
قال اي والله انك صادز واحلولات لو يطيح بيدي سبع مليارات
قلت هاه وش تبي تسوي قال ابتزوج اربع حريم كل وحده ابوها شيخ عرب وابسوي وافعل واحط وانزل
قلت تدري انا شايلن هم الشقردي وابي انقله لحايل لانه مالقى واسطه تنقله والله لانقله بفلوسي
قال وكم تبي تتعطية؟
قلت ابعطيه رضمه ماني معطية شي
قال الله ابو اللي انت عفنه يالعفن ولد عمك ياشين
قلت انت تحاسبن على فلوسي يابو الشباب
قال شف الرجال ولد عمك وانا اغليه والله لاعطية عشرين مليون وابشتري جيبين لكزز واحد له وواحد لاخوي فرحان
وهي تجينن اللعانه
قلت تدري انا ابرسل واحد يحط بسيارتك اخوك مخدرات ويبلغ عليه
قال ليه يالعفن
قلت ياخي فلوسي وبكيفي وش تبي انت
قال لا ماتسويها ... طيب وش تبي تعطي الساير
قلت ماني معطيه شي
قال لانك قليل خاتمه انا تدري وش ابسوي للساير ... ابمسح شرق الرياض كله وابحط نفود مكانه واعطيه جيب عشان يطلع للبر من قريب مهو كل يوم والثاني وهو مشابطن الشمال وداقن ست مية كيلو عشان يتنفه وابحط غزلان وارانب عشان يقنص ويستانس
قلت انا ابشتري ديبان وعقارب وابي أحطهن بنفودك
قال ليه ؟
قلت ياخي بكيفي وش تبي انت اذا طلبت منك ريال لاتعطينن اما مدامهن بفلوسي مالك دخل وبعدين عشان مايبلشن الساير كل يوم والثاني نبي نخيم نبي نقنص انا ماني فاضي لسوالفكم
قال تدري ياوجه الرقيعي انا ابروح( لتايلندا) عشان مااشوف وجهك
قلت اسمه تايلند يالطعس مهي تايلندا
قام يصرف شوين وهو يكشر لقى له مخرج ..
الطعس حظرتك هالحين التجار اللي معهم فلوس صح الواحد منهم يقدر يشتري جزيره انا ابشتري جزيره واسميها تايلندا واحط بها مطار وفندق ومطاعم ومدينة العاب ووالله ان جيت لاخلي الحرس حقي يطردك ... عرفت منهو الطعس هالحين << هالكلام يقوله ابو زياد وتعلوا وجهه ابتسامة الانتصار
قلت تدري انا ابعطي هالارهابيين اللي اشغلوا حكومتنا كل يوم والثاني وهم مفجرين بلهم مكان ابعطيهم فلوس ويروحون لتايلندا حقتك ويفاضخون عندك يما تساوى جزيرتك بالبحر
( صد ابو زياد عني واسمعه يقول لو اني جالسن انقش خشمي والله انه اشرفلي)
قلت عاد انا ابو زياد تدري ان الله عرفلنا وخلانا طفارى لاننا ماحنا كفوا فلوس ... لانه لو بنا خير تسان الواحد اول مايفكر بعمل الخير وبناء المساجد او نحجج الضعوف على حسابنا
وهو يراعيلي وترجعله الابتسامه من جديد ويطلع بكت الدنهل قال والله انك صادز انا اببني مسجد خمس ادوار وانت وش تبي تسوي
قلت انا ابقطع الدنهل من السوق
قال ليه يالعشير دخاني
قلت والله ماعلي منك هذا ضرر وانا ابي اقطعه من السوق
قال علي الحرام اني لاحط ثروتي كله عند اللي يصنعون دخان الدفي دوف واقولهم حطو فيه طعم ( طق...) اعزكم الله خخخخخخخ
عشان اذا دخنته تسنك تدخن الطق...
قلت تفرط بثروتك يالخبيل عشان هالسالفة وترجع على رويتبك حق الحرس
قال مايخالف اهم شي اني اوجع تسبدك
وهي تجينن الزعله قلت اسمع حلف مهو حلفك والله لاستاجرلي افارقه الواحد منهم مايدخل مع الباب واخليهم ياجاء يوم خمس وعشرين من الشهر يتحرونك عند بيتكم واذا طلعت يمسكونك ويلعنون ابو كعبورك ويدقونك دق وياخذون رويتبك ويجيبونوه لي
وهو يطنقر ويصيح كل صوتوه والله اني انا لاستاجرلي..... وانا اقاطعه قلت تستاجر رضمه ماعندك فلوس ولاعندك حتى راتب يالخبل هههههه
وهو يسكت لوه شوين وهي تعقد حجتوه صدز قال علي الطلاق لاجيب اخواني وامسكك انا وياهم ونربطك على كبري الخليج ونحلق شعرك وشنبك وحواجبك واخلي راسك تقل بيضه يالخسته
وانا اقمز عليه قلت اطلع من المكتب يابا الخايبات
قال تعقب مهو مكتب ابوك تطردن منه هذا مكتب الحكومة
قلت علي الحرام ان ماطلعت لاسجك بلك محظر هالحين
قال رديتها بالعسكرية يالمروح
قلت ايه بالعسكرية انقلع اطلع من المكتب
وهو يطلع وهو يسوي كم حركة لا اخلاقيه عند باب المكتب والله يالربع لو شافوه لجنة الانظباط الا يمنعونه من دخول الاراضي السعودية مثل الحسن كيتا حق الاتحاد خخخخخ
وتري مكاسي
رد مع اقتباس
المفضلات