،،،
،،
بعد مرور عشر سنوات ، يسألني (سعود ) متى ترجع للشمال
فإليكم الرد الذي رديت به عليه ...
،،
،
[poem=font=",6,white,normal,normal" bkcolor="transparent" bkimage="" border="none,4," type=2 line=0 align=center use=ex num="0,black""]
الله لو وقتي على الكيف يا سعود=وآهني النفس الشقيّه بساعه
ارحل عن الدمام مرّه ولا عود=وآعيش باق العمر وسط الجماعه
وجدي على دار ٍ بها كنت مولود=وفيها تفنـْجلت الشيم والبراعه
داري شمال وحبل الاشواق ممدود=نبض الخفوق ولايع الشوق لاعه
من عرعر وهجرة ابورواث وحدود=رفحاء وحايل والجبل وارتفاعه
المملكه مسك ٍ ،، وداري هي العود=المملكه مركب ،، وداري شراعه
المملكه عزم ٍ ،، وداري لها عضود=المملكه طنخه ،، وداري شجاعه
مفتون فيها كل ما نسْنسْ النود=لا من تهادى بإحترام ٍ وطاعه
اكتب بها الاشعار خلخال وعقود=انشر غلاها بالصحف والاذاعه
ياليتني فيها على طول موجود=وآلم فكري عن مساعي ضياعه
لحظة عمر تسوى عقارات ونقود=في خايع ٍ والصبح نفـّس شعاعه
وقت الربيع واشقر الريش مهدود=لا طالع الصيده تزايد نزاعه
ثمّ ٍ تنكـّس بالسماء كنـّه سكود=صيده سمين ٍ والمفاخر طباعه
فوق ٍ من ( انبط بين جدلا ومسعود )1 =والا ( بخشم سنـّار ) 2 شرقي تلاعه
لادوّه الراعي على اول الذود=يرتاح بالي والسعاده متاعه
لكن حظـّي كل ما قلت مقرود=قام يتحدا بس .. كيد ولكاعه
ومن وين ما وجـّهت انا الدرب مسدود=ما كنـّي الا من ضحايا المجاعه
راحت ثلاثيني معاناة وقيود=اصبر ،، واكافح هم ،، والوي ذراعه
آموت واحيا ما اجي اي منقود=لو الفضا ضيّق علي اتساعه
عوايد لشمر هل المد والجود=والشمري ما فيه زيف وصناعه
من غير قاصر بالقبايل ولا زود=كل ٍّ على خيله برايه قناعه
متوارثين امجاد الآباء وجدود=تاريخنا يحكي حقايق صراعه
من سالف الدنيا براهين وشهود=فيها بياض الحق يثلج سماعه
من بعدها لا تسأل الحال يا سعود=آنا هنا والقلب عند الجماعه
عسى عن الدمام ارحل ولا عود=امشي على كيفي من الوقت ساعه
[/poem]
1 ، 2 = انبط ، جدلا ، مسعود ، خشم سنار ( اسماء مواقع في ديار شمر شمال نفود حايل جنوب الحجره ) وتقع بالضبط جنوب هجرة ابورواث التابعه لمنطقة الحدود الشمالية / عرعر .
الراسي .... بشير اللويش
رد مع اقتباس
المشاركة الأصلية كتبت بواسطة رادار الحرف
المفضلات