الجنازه مع الاشقر

**الجلغم** · 09-07-2003 02:55

سعدون جاك الضاري اللي حكابك***وافي الوعيد الليا هرج قايل شين
من يوم سرتوا طاحنين زهابــك***واويل ياسعدون من نطلبه دين
ياأشقراً جاك اشقراً مايهابــك***لاتنهضم هذا صعوط المجانين
ياتايه الاشار هذا عقابــــك***مدم المخالب مودع الخرب كدعين
اصد براسك لاتلمك كلابـــــــك***ان لمكم ماتردفون المزايين
يامحد وشلك بالميدين كابـــك***قبل تناحون الضياغم سلاطين
بنا تمحرش يوم قرب خرابــــك***وياما زعلانا واول الحين من حين
على الخميسيه نوسم ركابــــك***وعلى الشبيبيه نحط المحاجين
قضى ان لمست خبزنا سد بابــك***ولا فعل الا فعل عدل الميازين
الحمد لله يوم بين خرابــــــك***من فعل شيخاً بالعدل له نياشين
ناتي بزيزوم الطنايا رعابــك***ياشفت ابو متعب تخلي السوادين
ضفى ضيا له يوم ضحضح سحابــ***وسمية منها تلم الشعابين
اشقر لضف الجناحين جابـــــك***على دماغك ماقعك بالصعانين
وادهم يطير ماسكن من ترابــك***ونركي على كبد الحريب المصاخين
مير انت خبلٍ ينزع الله شبابــك***قبلك لعينين المخاليق مطنين
دونك حصاةٍ بس عضه بنابـــــك***ياللي تقول محيران حب شاهين
اما بنوا الخير ماينحكابـــك***انتم مربين اليتامى القديمين
ندخل على الله مادفنا حسابـــك***انتم ضواري بس حنا ضررين

"حب شاهين" نوع من انواع الارز وهو غالي وهو مامنعه سعدون عن ابن رشيد

من إعجابي بالقصة عدلت الأغلاط بها إسمحولي يالطنايا:D

**بنت زبيد** · 16-07-2003 14:55

أختي جواهر ،،

موضوع رائع ،، سلمت يداك ،،

عند الحديث عن الأشقر (ابن سعدون ) تظهر لنا روايات وأحداث مع شمر لا حصر لها .. من أشهرها خيانته و غدره بعبدالكريم الجربا ،رحمه الله، وتسليمه إياه للأتراك لقتله..

وهاأنت توردين لنا مثالا آخر ،،، سلمت يداك مرة أخرى

لا تحرمينا من هذه المشاركات التي نستمتع بها ...

مشكورة أختي ..

**فواز الغسلان** · 08-02-2007 19:48

السلام عليكم .... اشكر الاخت العزيزه على هالقصه الجميله واعتقد ان اسم الشاعر صاحب القصيده هو حواس التبيناوي حسب علمي وتقبلي كامل التقدير والاحترام =
الراوي ابن غسلان

**ابو محمد الحجي** · 28-11-2007 16:52

جزاكم الله خير على الموضوع

**الفضيلي.** · 12-12-2007 13:42

بسم الله الرحمن الرحيم
الاخوة الكرام السلام عليكم ورحمة من الله وبركاته
عندي اضافه ان سمحتوا باضافتها
بعد ماحرم الشيخ سعدون باشا الاشقر المكيل على شمر غزاه الامير عبدالعزيز المتعب رحمه الله
وهزمه وابطى الامير عبدالعزيز ماجى وجاء الليل والامير مارجع ونام كثير من شمر بعد ذلك رجع الامير وهو متقفي سعدون الاشقر (أسره ) نزل الامير وباركوله بالنصر قال رحمه الله خلو الشعار يجون ( يعني التبانا ) دوروهم ولقوهم نوما يمار بس ولد على أول شبابه جالس من التبانا قالوله الامير يبيك
جا وسلم على الامير وباركله بالنصر وقصد القصيده التي ذكروها الاخوة هنا
بعد ذلك قال الامير : اكرموا سعدون لااحد يسمعه كلمه ولا احد يغثه
ويجلس سعدون ثلاث ايام معزز مكرم
وفي ليلة الثالث قال الامير لاحد المقربين لديه باكر خلو سعدون يروح لاهله ورح معه انت ومجموعه من الفرسان معك
يقولون اصبح الصبح وتقهوى سعدون وحنا كذلك بعد ذلك نحسب سعدون انجن فجأة جلس فوق الشداد ودلى يضرب الشداد بيده وهو يردد أبيات لشمر
يقول : ياعز عيني ياهل لبده * يللي على الموت دلاقه
بن صباحٍ هبد هبده * وسعدون ماطلق نياقه
أشهد بالله انه صحيح عزالله انكم انتم هل العز والوفا والشجاعة
بعدها نزل من الشداد وجلس مثل اول قلناله مشيانا ياسعدون ومشوا ووصلوه لمشارف ديرته قالوله ياسعدون هذي ديرتك واعذرنا ان قصرنا بخوتك قال مامنكم قصور يوم مشوا من عنده قال سعدون يافلان يعني حديهم قاله هلا : قال : اويلي عليكم اويلي عليكم اويلي عليكم

بعد ذلك صدروا من عنده وهو توجه لعربه

اما ماذكره احد الاخوة الافاضل هنا ان عبدالله اخو سعدون قتل في هذه المعركة فالحق انه قتل بالصريف وقاتله هو عبداله أبا الميخ الملقب ( عبدالله المديفع )

يقول احد الشعرا في قصيده له بالصريف

يوم جانا اخو مريم هو وربعله * هيض مطير والعجمان واجنابه
جاك شره على حايل يبي ظله * مادرى انه بلادٍ دونها لابه
وين سعدون ومرده لعبدالله * يوم حامت عليه الخيل ماثابه
وين فيصل وشرب الكيف بالدله * ماثنى سابقه لارحم من جابه

هذا وتقبلوا شكري وامتناني وبحفظ الله

**فواز الغسلان** · 12-12-2007 22:14

نعم اخوي الفضيلي مقتل اخو سعدون الاشقر كان بالصريف

وهو سبب محاولة سعدون منع التموين عن شمر وحايل كنوع من الانتقام

والشاعر كما ذكرت سابقا انه حواس التبيناوي الذي حصلت بينه وبين الهربيد مساجلات

فيما بعد فيها الكثير من الطرافه بسبب راجي بن طوعان اللي سب غرايس الهربيد ودخل بوجه

حواس التبيناوي وكانت سببا لهذه المساجلات العديده000

تقبلوا شكري وتقديري00

**الفضيلي.** · 16-12-2007 19:38

مساكم الله بالخير الجميع

هلابك بن غسلان
التبيناوي نعم اسمه حواس ومساجلاته والهربيد معروفة ومليئة بالطرفه وهي في زمن الامير محمد المهاد الرشيد صاحب العصر الذهبي لدولة حائل سابقاً حتى ان الطرافه في هذه المساجلات وصلت الى قصر الحكم قصر الامير محمد الرشيد (برزان )
الى الامير المهاد رحمه الله ورحم اموات المسلمين
وشكرا لكل من شاهد مشاركاتي