كـل عام وانتم بخير يا اخوان ويا اخوات
وعيدكم مبارك
ويا علوه يعيد عليكم من السالمين الغانمين
يالربع صارت لي سالفه بهالعيد وحبيت اني اقدمه لكم على طبق فسفوري
عملاً بالمثل القائل ( من شاف مصيبة غيروه هانت عليه مصيبتوه )
ولتستفيدوا وتأخذوا العبره من غيركم
والسعيد من اتعض بغيره والتعيس من اتعض به الناس
عاد ما شاء الله اغلب الزقرت والزقرتات بهالعيد تجيه جنيه
تلقى هذي له جعير بأول عيد
ولا تعايد امه وابوه علشان امه ما شرت له شباصه الله يشبص وجهه
وهذا مبرطم بأول عيد ليش ابوي ما عطاني فلوس ابي اشري طاقيه
من زين راسك هاللي كلوه فلاق
عاد ابيكم تدرون ان فيه ناس ما حصل لهم عيد
نجي للسالفه
بأخر يومين من رمضان مشوا الاهل لرفحاء علشان نعيد عند الربع عمامي وخوالي وجداتي
والعيد برفحاء احسن من الرياض
عاد قالوا لي امش
قلت لا انا ابي اخلص كم شغيل وجايكم
ليلة العيد وانا عندكم ان شاء الله
وهم يمشون
وبأخر يوم من شهر رمضان المبارك وهو يخبط قير السياره ( خرب والعن والدوه )
وانا اقعد به
بس قلت عادي هذي اللي يسمونه صيادات العيد
وانا اروح للتكاسي حقين المشاوير
والقالي واحدن على كيف كيفكم
وارتسب معوه
وهو يطير
يمشي 200 بوه من الحنشل بعد وجه
بس عاذروه نبي نلحق العيد مع ذوينا ( من زين ذويك ذوي الدخل المحدود )
وطول الطريق وانا وياوه سوالف وضحك
يوم اقبلنا على الحفر وهي تخرب سيارتوه
ولييييه
بنص الطريق ولا حولنا احد
وننزل انا وياوه
وهو يقوم يراعيلي
قال كله منك
قلت افااا ليه
قال انت مقرود وقردتن معك << معلموه بخراب سيارتوه
الوكاد انوه غسلن غسل بالحتسي
ونقوم نشر على الخط انا وياوه
ويالله عقب ساعتين ياقف لنا راعي باص محملن بنقاليه يبون يعيدون بالحفر عند
ذويهم (( حتى هذولا عندهم ذوي ))
عاد ياسلام على الريحه والعطورات
ايش كزنوفا ايش باريس بكبره
ياشيخ فقدت على الريح
ولا التسريحات
قلهم فارقين الشعر وه يافرقت العربان
ولا وادن الله العالم لقبوه ببنقلاديش مسدح الصبايا
مدهنن الشعر ولافن الجذله على جنب ( اطعجني يا امير خان )
وينزلوننا عند باصات النقل الجماعي بالحفر
واراعي لرفيدزي
قلت احجزلك معي
قال مالك شغل بي اندزلع عني ماني رايحن لرفحاء
قلت افاا شفيك علي انت وخشمك
قال ابروح اجيب سطحه واشيل سيارتي وانت اذلف
قلت اذلف اذلف ابشر
واروح واحجز بالباص لرفحاء
وبهالحتسي الساعه 7 الصبح
يعني الناس عيدوا وخلصوا
انا ما ابي رفحاء رفحاء
ابي قريه قبل رفحاء
ونسيت لا اقول للسواق
وانا احط راسي وانام
يوم قعدت ولا حنا برفحاء
ياشيخ
عدل بدل
( الساعه الحين 11 وربع وعمي سطم عندوه غدى )
وارجع وارتسب مشوار من رفحاء للديرة اللي قبل رفحاء << افلقوني تسانكم فاهمين
الوكاد اني طول ما انا بالخط وانا مهو بس مركز
الا قمة التركيز
ومن زود التركيز بغيت اخليه يفوت لكنب الهباس
ويالله اصل اهلي حول الساعه 12 الا
واحط راسي وانام
ولا قمت الا ثاني عيد
اول عيد ما عايدت اي بشر
فمن هذا المنبر اقول لكم كل عام وانتم بخير
وحتى اعداد هذا الخبر وعمي سطم متحلفن بي لاني ماجيت غدواه
افلق يالجبعاء تسان مسكتن << فلص بمعيارة عموه الخبيل
وتقلدوا تحيتي
المفضلات