انا و ساقسوق

[حامد]

السلام عليكم

كنت جالس بالمكتب قاعد افكر بحالي وانا مداوم بهالحر الموت والعالم كلهم
طالعين اجازات بهالصيف الي عند اهله والي مسافر بار والي والي والي..الخ

المهم طرت علي ايام الطفوله ايام ما كنا ساكنين الكويت ونتحرى الاجازه
الصيفيه علشان نصيف بماربيا الشمال (حايل) ..وطرت علي سالفه ساقسوق
وقلت خلني اقولها لكم مدام ان الوقت ظهر الحين و مايطلع من مكتبه هالوقت
الا الخبيل

المهم...كنا سلمكم الله سانين الكويت..بس قلوبنا و عقولنا ساكنه حايل
(وغيدان ما نعرف الا حايل و مصدقين انها عروس الشمال) ..المهم..

كنا نعد الليالي والايام طول السنه نتحرى الصيف والاجازه الصيفيه علشان
نروح نقضيها في بيتنا الريفي (لا تصدقون بيت شعبي) في احدى القرى
التابعه لمنطقه حايل.

كنا دائما نصل حايل تقريبا على غيبة الشمس..ويا سرع ما ننسى تعب السفر
وندوبك مع عيال خالنا ببيتنا وبيتهم ننزل العفش و نتفحص التطورات(وش جرف
سيل هالسنه معه) الي طرت من السنه الماضيه.. وما يجي وقت النوم الا حنا
دايخين من السف وحالتنا حاله...

وقت النوم..وقت النوم عادة يكون حول الساعه تسع بالكثير عشر..نلتف حول
مرة خالي العجيز و تقص علينا قصص تريترا و ابا الخصى (عاد القصه اسمه كذا
و تراثيه ..اعذروني يعني)

عاد وقت النوم هذا نحسب له الف حساب لاننا ما بنا صبر وودنا ننام على طول
علشان يطلع علينا الفجر ونقوم ونفطر مع رحمه ابوي و خالي على خبز صاج
وسمنه ..وبعدين نروح مع عيال الخال ونقضي يومنا كله لين تغيب الشمس
...بالمزرعة.

المزرعه ..مغامرات الطفوله كلها كانت بالمزرعه..سنين الطفوله كله كانت
كوم .والايام المعدوده من السنه الي نقضيها بالمزرعه كوم ثاني

المهم المقدمة صارت اطول من الموضوع...الزبده

هاك السنه يوم رحنا اول يوم باجازتنا مع عيال الخال للمزرعه دريت ان الاجازه
هذي غير عن باقي الاجازات..طبحنا من السيارة نركض بالمزرعه وندرس
التغيرات(السيل) والتطورات الي صارت بالمزرعه والي طول الطريق عيال
خالي يسولفون به..

فجأة جاني ولد خالي عبيد وقال: عندي لك هدية
قلت: من يد ما نعدمهاش..
قال: وشو؟
قلت: ولا شي.. وين الهدية؟

قمنا و رحنا يم جهة حوشة الغنم و البعارين شبوك الارانب..شكيت بالموضوع..المهم ..

دخل حوش الغنم وطلع وهو يقول سق سق ..وطلع وراه صخيلن صغير يركض وراه

قال: استلم هديتك..ساقسوق..
قلت: ساقسوق؟!!
قال: ايه سميناه ساقسوق..
قلت: ساقسوق ساقسوق..

صخيل صغير حتى امه مادري شفيها عليه ما يرضع منها كود يرضعونه برضاعه.
وكان الحب المتبادل من اول نظرة بيني وبين ساقسوق.

صرت وين ما اركض بهالمزرعه يركض معي ساقسوق..مرتن تلقانا بالحصيد..
ومرتن عند النخل..نوبات تحت عشش العنب نتظلل و نبلع..ومرات بسريان
الجح والخضره. الوكاد انهكانت فله حجاج وقضيت معظم الاجازه هذيك مع
ساقسوق في المزرعه..


و يوم من الايام على اخر ايام الاجازه...
..
..
مات ساقسوق...
..
..
وبكيت لين صفى راسي...
..
..
اكذب عليكم لا مات ولا شي..ولو مات اشوى له المسيكين..المهم..


كنا نلعب بحياض البرسيم انا وعيال خالي نتغيب عن بعض بوسط البرسيم
والشاطر الي يلقى الثاني قبل..المهم..

اشتهيت جحه..وانا اروح انا وساقسوق للسريان الجح واتنقى لي اكالجحه الي
على كيف كيفك..وانا اشطبه واحطه تحت ظلال نخله بجنب ترمس شاهين
وكاساتنا علشان تبرد..ورجعنا لحياض البرسيم نكمل لعب..

وحنا بحياض البرسيم ..فقدت ساقسوق.. مادري وين راح..قلت مهو رايح نيه
و كملنا لعب لين تعبنا..قلت عاد الحين جاء دور الجحه البارده الملهلهه الي تبرد الكبد

..ويوم رحت لجحتي.... يا مار وش اشوف..
..
..
المصيبه
..
..
الكارثه
..
..
المصاب الأعظم
..
..
ساقسوق..حبي الأول..خان الحب ..خان العشره..خان الخوه..
.
.
.
ودرع بجحتي مسبوع الأبو

عاد انا بهاك اللحظه حضرت عنزن لي خاصه ما تحضر الا اذا تقدت الحجان
واستوى بعيني الكبير والصغير والعدو والحبيب..وغيمت جاركم الله..

وانا اطب على ساقسوق اكالطبه القشرى..متعلمها من سنوكا..و متدرب
عليها على اخوي الصغير انط عليه من فوق الكبت وهو على السرير..

وبلمح البصر..

ليا انا فارطن على كبد ساقسوق..طاح بالقاع وانا فوقه باركن عليه ما يقدر
يتحرك المسيكين..وانا افرك وافرك وافرك فرته بالقاع لين غدت كله عقب
الجح تراب..وانا استدني حدى كاسات الشاهي الفاضيه وادق فرته بقاعته
لييين صارت فرته دم وتراب..

وبقدرة قادر املص مني ساقسوق.منصدم وش هالي جاه..وش هالقوم
الي شالوا به..وش هالعاصف الي عصف به ..مفترن راسه و مندقتن فرته
ويبي السلامه ..بس وين؟

وهو يحط رجله من غلاة الروح..

بس عنزي عيت تقنع ولهالحين براسي حب ما طحن..
وانا احط لك رجلي وراه ..
ووراه
ووراه
ووراه
لييين لحقته.... عند البركة (من قرد حظه)

وانا اجوده مع رقبته.. وفرته تقطر دم.. واسحبه للبركه..

وانا امسك لك راسه واهطسه بالبركه..واهطسه واهطسه واهطسه
وهو له ثغاء يستنجد..بس مامن مجيب..عيال خالي و ما قدروا لي ويعرفون
عنزي لي حضرت.. واثروا السلامه..

لين بغى يسنفذ انفاسه الاخيره..

الا على جيت خالي فزاعن له وهو يفكه مني ومن بطشي ووحشيتي...

ليه ليه ..ليه يا وليدي هاللون؟ وشعلمك على صخيلك؟

بديت استرجع الوعي وادرك وش سويت وبنبرة صوت غريبه رديت:

كلى جحتي يا خالي

خالي (هالعور الاقشر) ضحك.. وجتني رحمه من الله انه ضحك و ما قالي
شين.. ولا كان الحين بانين بركه جديده فوق قبري.

هذي كانت ذكريات طفولتي البريئه و نهايه حبي الأول والأخير ..وطبعا كأي قصة
حب تنتهي بألم وفراق (مع نزيف حاد).\n
طبعا ساقسوق شفتكم ولا شفته ..ولا ادري وش كان مصيره الي اليوم..

بس اتوقع بدرام المندي

[متجند سيفه]

الاخ حامد وش هالعنز عندك عساه ماتجي الصديق

خوش ذكريات الله يعيده عليك هالصيفيه ان شاءالله


لكن طلب صغير لو تكرمت
8
8
8
8
8
8
8
8
8
8
8
8
8
8
8
8
8
8
8
8
8
8


نبيك تهذ علينا سالفه تريترا و ابالخصى:D

[حامد]

ويعيد كل الذكريات الحلوه على الجميع يا متجند سيفه

عموما ابشرك بكرا رايح لحايل اقضي اجازتي الصيفيه شهر كامل هناك..اول مره من
عشر سنين..زياراتي بالسنين التوالي يومين والثالث وداع (الله يستر كان ما جوزوني هالسنه)

عموما ابي احاول اهذ لك سويلفات تريترا و ابالخصى من ربوع حايل علشان تكون
طازجه (السوالف طبعا..مهن فيدات ابالخصى:D)

عموما يالغالي مشكور على الرد والنفس الخفيفه

اخوك

حامد

[فلاح السعد]

صخيل صغير حتى امه مادري شفيها عليه ما يرضع منها كود يرضعونه برضاعه.
وكان الحب المتبادل من اول نظرة بيني وبين ساقسوق








حامـــــــــــــــــد


واللـــــــــــه خوش محبه ياحامد




اجل سقسوق هاه


ترك راعي صخول وحنا ماندري



اشكرك ضحكتن




تحياتي لك


اخوك فلاح السعد

[فزاع]

قصه............رائعه يا اخ حامد
يا انت عيشتنا جو يا زين هكا العيشه
........والظاهر ان عنزك ما تطول
بس تراك لو رحت صح يمكن الجو زين بس ترا اول اونس وين هكا الايام..........غير

[الشمري محمد فهد]

اهههههه ..


ذكرتن بحواري صايل يوم يرفسن


قبل لا انولد بسنة





\=--=/ \=-=/


QUOTE][النص الأصلي مرسل من قبل حامد

وش هالعاصف الي عصف به ..مفترن راسه و مندقتن فرته

[/QUOTE]

8
8
8


والله مهو انا :D :p

[أبو فيصل]

هي هي هي هي هي |8| |8| |8|

ذكرتن بعنز لي رحمها اللة
وكما فال الشاعر :

عنزي ضاعت بالفلاة ام اذان مشتاراة *** وركض ياماجيت السوح

عنزي ضاعت بم ارقيب ** وحسب كلاها الذيب * ** حلفت الذيب وحلفلي

ومن شاف حالى يارثلى ** حرمني عرش كريعاتة وذانة وكليواتة **ومريق العنز المملوح .

القصيدة طويلة بس ذكرن موضوعك اااااااااااااة ياعنيزتي


طرح ووصف اخى حامد راااااااااااااااااااااااائع
شكرا لك

[الشقاوي]

سق سق

اوه نسيت

شقا شقا

شقا شقا

شقاوي يادنيا البلاوي

:D :D الا اقول الماخوذ هو ضربه الذراق والا لا

:D :D اما تريترا واباخصى ماسبقت عليهن لعنبو عدوك

شقا شقا

شقاوي

الا وشرايك بتوقيعي :D :D شطفه مالمه داعي

شقا شقا

ارس ياترس واعتدل ياملف

[الحسيني]

[c]

كنت جالس بالمكتب قاعد افكر بحالي وانا مداوم بهالحر الموت والعالم كلهم طالعين اجازات بهالصيف الي عند اهله والي مسافر بار والي والي والي..الخ

8
8
8
8
ياشينه من حاله <<< يبي يعلمك انه مثلك

اجل ناوين تجيب سويلفات تريترا ؟!! تكفى لا تأخر تراني ناسيهن ومشتاق لهن

اجل انت مثلي آخذن اجازة شهر
<<=== يبي يعلمك بعد ا عنده اجازة شهر :D:D

تسلم على هالسالفه



[/c]

[حامد]

فلاح

فزاع

القلب العاصف

نورث وب

الشقاوي

وراعي ضبيعة (الحسيني)

مشكورين على الردود اللطيفه (اغرف منه) الطريفة (بالتاء المفتوحه). القصد والله يا
بنيخي المشاهد والوناسة ولا خيركم سابق ويجعله ولدن صالح ويطرح به البركه ويجعل
فوالتكم الولد...اقول شلونكم انتم ووشلون الي جيتوا منهم؟ اقول وش السالفه؟؟ تروني
منداش شوين..عموما ما صيدي والله الا مشاركه هالوجيه الطيبه (ولا الحلى الله واعلم به)
r
وانت يا فليح اتفاهم معك بعد الاجازه


على ما قال ابو الليد الجو ما مثله بس الوناسه مهي مثل قبل..الوناسه والله اخبره..بس كود ختم

اخوكم

حامد