.
.
كان ياما كان
حكاية صارت من زمان ..
يوم حنا صغار يعني كنا وغدان
كنت انا واختي حنان ومعنا ايمان
نعيش بامن وامان
كنا ساكنين برى حايل ..
ولنا مزرعه بحائل نقضي فيها اغلب الصيف<< آآيه يابيروتنا
اكبر احلامنا
متى يصلي ابوي العصر
عشان ننطلق للمزرعه وناكل الكمثرى واليوسفي
.
.
بـهالمزرعه
سوينا العجب العجاب ..
والمستحيلات الغراب
.
.
المهم المهمات ...مالكم بالطويلات
ياحنا لنا مصايب صارت بهالمزرعه
اشكال والوان ...
ولااحتراف الف فنان..
بيوم من الايام العصر وكالعاده تمشطنا امي قرنين <<طلعنا تقل عنزات
وماتخلى هـ المشطه من المناقر والمجاعر<<بيننا وبين امي
وننطلق للمزرعه ونلعب شوي الايوم لقينا بنات جيراننا طالعات
هن وغنمهن يسرحن
بهالموقف وقفنا انا واختي <<< موسيقى مسلسل هايدي
قالت اختي ياحظهم مثل هايدي ياعطر قلت اي والله
وانا مفهيه افكر بيتر وينهو؟؟<<< كلن على هموه سرى
....وحنا نركض نبي معهن
وحنا يغدي لنا مناقر
....... نبي معكن!!
لا رحن استأذنن من امكن !!
......تكفن مانغثكن !!
وهي تزقرنا الكبيره<< كش وجه للحين حاقده عليه .
واختهن الصغيره وراهن حاطتن يد على يد ومبققتن عيونه تقول حميقراء حميقراء وتمد لسانه
(( ااااه للحين اقوله لواهني لو سحب لسانتس وغالتس بوه اكالساعه))
وحنا ننكس لاهلنا ونجلس بجنب ددسن ابوي ومن القهر لنا تمرغ بكالبطحاء
ونقعد لنا مجاعر وبتساء كلن له شوط
واختي من العوابه تقعد تلطم وتضرب روحه بالتراب
وشنوح هن بس اللي يرحن وحنا لييييييييييييه <<< ياما ينقطع الحبل الصوتي صار حسه بوه لوه شحطه
ويالله ترد النفس *-*
ويبداء شوطي انا واقعد واااااااااااااع آآآآآيه حنا بنات البطه السوداء يااااااااااربي <<<تخبرون هزار ^-^
وهذي حدى خواتي مهي معنا يوم شافتنا نصيح ويقعد له جعير بتسبد الخضيراء مع الخيل ياشقراء
مشتركه معنا انا اقول واااااااااااااااااا وياسكتت شالته وااااااااااااااو << تبتسي بالفزعه
وواااااااااااع
ويييييييييع
واااااااااع
وييييييييييع
وابد يالربع قعدنا على هالحاله لنا حول الربع ساعه
آخر شيء
// ...قررنا نصير بدويات مثل بنات جيراننا اللي يسرحن بالغنم ..//
.
.
وقلنا لازم نناقش اهلنا بهالسالفه اشنوح ناس وناس لا ..
شوي الا تصير فوق راسي غيمه طلعت عيون امي وهي تنطط علينا <<جاك الموت ياتارك الصلاه
وهي تضيق الوسيعه علي وتكتن العبره واقعد افكر شلون نحتسي
.
.
يوم طلع ابوي من المسجد يامار العيون دواويح حمروالرجلين لهن غبرتن من البطحاء
قال عوذا ... يادافع البلاء
وشبلاكن ؟!!
يقول المثل ياشفت امي جانن غمي
وحنا نقعد نبتسي
وبتسي
وبتسي
وبتسي
وبتسي
و بتسي
الوحده تفتح عين وتغمض عين
<<تجس النبض هو انكسر خاطروه او لا؟!!!
والله يوم قال ماعاش من يبتسيتسن وش تبن الحين ؟!! اجيبوه لكن
قلنا بنات الفلان يحمقرنا انهن يسرحن بالغنم وحنا لا ..
ويقلن اهلكن مايحبونكن يحشورنكن بالبيت
وحنا على كيفنا نسرح ونمرح << زودناه وحطينا له ريش
قال وانتن اسرحن كل هالمزرعه لكن
مار يوم مرت من حولنا دجاجتن معه صيصانه حول الـ 15 صوص
قال..
شفن هه هذيتس الدجاجه وصيصانه رحن اسرحن بهن اليوم ..
<<< يلعب بنا
وهويروح يم الدتسه يتقهوى
وحنا نلحقوه ويابيي ويابيي ونقعد نمشط لحيتوه واللي متلولستن براسوه
واللي تخموه
ويابيي تكفى
اخر شيء .. وافق نسرررح بالغنم
<<< الظاهر قال فكنن ياعله ماعادت
قال بشرط الحين رحن اسرحن بالدجاج
وباتسر يحله الف حلال...!!!
وياطولك يايومنا متى تجي ياباتسر ...!!!
ونقعد نخطط
وش نسوي وش ناخذ معنا
.
.
ويوم جاء المغرب وهن يرجعن وهي ترجع ام الحميقراء تبي تلعب معنا وحنا معطينه اشكل
.
.
راحت اكالليله وحنا ننتظر السرحه الموعوده باتسر
ومن الصبح نقعد لنا مناقز ومهنا حليلنا ونرتب مع امي ونلقط الحوش
وامي تقول ياعساه قدمت هالوعيده
ويوم قيلو الناس تخبرون اول الناس تقيل وتهجد الشياطين مهو مثل هالوقت
الواحد ياجت الساعه 2 جاك ينقل خبزتوه وجبنوه
.
.
وحنا نغزي لدولاب ابوي ونسرق شماغ
ونغزي المطبخ ونجيب اكياس لحم ونعبيهن برندا ونحطهن بالفريز عسكريم بدو
ونغزي المستودع ونجيب بسكوت وعصير وشقليط وحلاو بقر
وحنا نقعد لنا رثعتن بالبيت تقل جرابيع
ونجمع عزبتنا ونحطه بالشماغ ونهربه برى البيت
ونقعد نتفق كل وحده له اسم بدوي
عمشاء وعميشاء وسلمى
اجل شلون لازم بدو صدز
.
.
يوم اذن العصر مار حنا متولمات وحازماتن قرونن بكاالبكلات
وحنا نقعد لنا مناقز من الفرحه نبي ندبغ راعية الحميقراء من القهر
شوي الا يوم جاء ابوي ورحنا معه للغنم وهو يقعد يحرصنا
قال اسمعن لاترحن لاقصى المزرعه ولاتقربن للنخل والشجر
وهاه بناتي لاتقربن للبوابه القصياء الزفلت كلوه تريلات
وحنا ابشر ابشر ابشر<< محد يموه عيننا يم شبك جيراننا
وحانت ساعه الصفر وانطلقنا
وحنا ناخذ بقشتنا << الشماغ
ونجيب عصا نبي نسوي مثل بيتر << وهي تقبس بيننا كلن تبي تاخذوه
المهم ... اتفقنا كل شوي وحده تاخذه
ومشينا شوي الا هذولا جيراننا يوم طلعن ووووه يالوناسه وهي تقعد تصدصد راعية الحميقراء
عاد تعرفون المزارع بجنب بعض بيننا وياهم شبك بس وكلن يسرح بمزرعتوه
.
.
المهم ....
البدويات يقصدن
ياعين لتس بالهوى لفته ........ منتي على دين الاخواني
ومحيرتس واحدن شفته ........ عوده من الزين روياني
.
.
وحنا ياربي لك الحمد
الله ربُ الخلقي ...... أمدنا بالرزقي
اذا دعاهُ الداعي ..... يحقق المساعي
وحما حيلنا نبي هذولنك يشفننا هع هع هع
وناصل لاخر المزرعه ونروح يم اطرف نخله ونفرش شماغنا ونحط عزبتنا
ونعين من الله خير
شوي الا نتذكر العسكريم بالثلاجه وحنا نرسل اختي للبيت قلنا جيبيه
وشوي الا نسمع صوت بين الشجر
ونطالع الا عيال عمي عند التين يقطعون وحنا ننقز :0029:
<< ياشر اشتر وانا اجيلك جابكم الله
قلنا نبي ننتقم منهم وهات ياتسحت وتمسط لين طردناهم لمزرعتهم
وحنا نرجع نختخت بين الشجر
مار بوه لوه عش عصفور بشجره ونقعد لنا تنخيش بالعصيان يمين يسار
.
.
.
.
المهم ...
يوم جت اختي مار ماحنا بوه قالت بس تريترا خطفتهن <<< ابوك يالتفكير
وتقعد له جعير << جته الذله لاهي اللي رجعت ولاهي اللي دورتنا
وهالحتسي كلوه ماندري وين الغنم علمنا بهن يوم ناصل هههههه
اشوي يوم رجعنا مار تقل طايحاتن عليه من السماء
وينكن وين رحتن وحنا نعلمه بالسالفه
شوي ونقعد نلعب عته وزقطه ^-^
مادرينا الا حس العامل وابوي
والناس يااشرون وياشرون ماندري وش العلم
شوي وقربو وابوي يخانق
طلعت الغنم داخله بين الشجر واللي تاكل من الطماط
واللي عند التين واللي واللي <<< رثعن بحسبة الشجر
ياليلتن سوداء وحظن منيل <<< رحنا وطي عز الله
ويالله باليالله يسيطرون عليهن << الغنم
ويرجعونهن لشبكهن وحنا ننقز للبيت
.
.
عاد مالكم دخل وش صار بنا يوم رجعنا للبيت
مافيه لابقوس ولاشيء
.
.
بس كانت اول مره واخر مره
يسمحون لنا نصير بدويات
وسلامتكم
رد مع اقتباس
المشاركة الأصلية كتبت بواسطة ابو عارف
المفضلات