سلام عليكم ياجماعة الخير
هل تعلمون أن عندنا عادات شينه أم لا ؟
إذا قلتوا نعم أقول صح أما إذا قلتوا لا أقول خطأ
ليه أقول خطأ ؟ لإني بالرغم من كبر سني أكتشفت هذه الليلة واحدة من هذه العادات الشينة بالصدفه.
العادة الشينة الي إكتشفتها هي عرضنا على الواحد شيء غير جاهز أو غير موجود مجاملة أو بأمل أن يقول لك لاء ما أبيه.
مثلاً أن تقول لأحدهم تفضل وهو يمشيء مار مع الشارع من أمام بيتك ومن ثم يوافق وتقعد به مثل مايقولون ولاسيم أن كنت طالع عند الباب تبي تمشيء وعرضت على هذا الرجال أن يتقهواء مثلاً ووافق.
اليوم مرة علي حاجتين من هذا النوع واحدة خرجت الساعة 11 لكي الحق على السوق قبل الظهر لي حاجه ملحه وشفت واحد من زملاء العمل سابقاً يمتر الشارع رياضة مشي من أمام البيت سلام عليكم السلام تفضل تقهو ياابو فلان قال الأجودي لايكون عندك شغل ؟ قلت لاء لاوالله ماعندي العود أقلط.
قلط الرجال وتهولو هلي توك طالع مستعجل وهالحين تعزم وقت هالظهر وين الحاجة الي أنت رايح لها؟ قلت خلوها العصر وخذ هذا وخذ هذياء من هالفناجيل حتى أذن الظهر فقام الرجال يبي يمشي فقلت له وليه ماتصلي معنا بمسجد عبدالله بن عمر ونتغداء سواء ؟
فقال لاوالله أبي أروح لأهلي أغير ملابسي وأصلي بمسجدنا وأجيك للغداء ولاصيدي الغداء لكن مشتاك للحديث معك وأبي أنشدك عن أرامكو والرئيس الجديد لذلك أجيك بعد الصلاة.
صلينا وجاء الرجال وتغدينا وروح الله يستر عليه ويوم جت صلاة العصر زهمت على وايت الماء الحلو مصري إسمه محمود يامحمود مر علينا ماعندنا ماء وصل محمود شغل الماء وقلت له ويش تشرب تبي عصير تفاح أو شاهي فقال لا جيب عصير تفاح دخلت عطونا عصير تفاح قالوا متى علمك به شربوه هالوغدان مافيه شيء.
رجعت له قلت الله يهدي هالوغدان اليوم عندنا ضيوف وشاربين التفاح ويش رايك بالشاهي فقال يامرحبا يالشاهي دخلت وقلت عطونا شاهي وجاوبوني أنت ويش بلاك ماتبي تروح تجيب غاز خالص الغاز والشاهي قضى وأنت بس جالس تعزم حتى المصارية تبي تبلشنا بهم مافيه شاهي.
رجعت لمحمود قلت يامحمود الغاز قاضي والشاهي مافيه تبي برتقال قال إيه جيب أي حاقه رحت عطونا برتقال قالو مافيه إلا شيء منتهي صلاحيته قلت أعصروا لنا برتقال طبيعي يالله بسرعه ونأخذ خمس دقائق ننتظر البرتقال وشرب وهو زعلان يقول عطلتني عطني زيادة فلوس.
ما أدري ليش نعرض شيء من أجل نسمع كلمة الله يغنيك والله مستعجل أو ما إشتهيه.
صح هذه من العادات الشينه عندنا.
رد مع اقتباس
المفضلات