.اويطي لو محد عبرني لاني جديده

**غريبه** · 13-01-2009 23:38

بسم الله
بخش على طول بلامقدمات بلا خرطي بلا ضيفه جديده

المهم انا مره من هذيك المرات عام 1370 هجريه العب مع ترباتي < خوياتي

وكنا ندوده باللعب وطيره والحذيان حطيناها عهده عند راعي الدكان سعيد وامه تدلعوه سعيد ابو اذوني .
الوكاد وانا غافله العب الا هذيك المركبه .مدوره وفيها درايش واجده الا يخطفني واحد منهم لامار وانا اتراعش وين موديني قال تسذا كيفي انا وانتي بنروح رحله لعام 2009.اهب وش هالعالم ووين بوه قال ابد بخطفك يعني بخطفك.وانا استسلم لوه ويغمى عليه
الا واجد نفسي في الفله .اويطي اويطي وانا اندس بقسم الطبخ منها اتعشا وابكي على حالي اويطي واويطي...لامار مااذكر منكم الا ابو خلوف كان وغيد عمره شهر.مسرع ماصار بالخمسين .
المهم وانا اشوف كلامكم عن حرب غزه الله ينصرهم واشوف تقولون حكامنا العرب تخاذلو ومحد تحرك.وهنيا انا يتطاير شرر من خشمي< اللي يقول ثور بوقف عضويته هذا انا نصحت .
الوكاد لاتظلمون الحكام وهذا ملكنا شوفو شلون يبكي محروق عشان القدس.الله يطول بعمروه.
شوفوه والله ماكذبت
http://www.youtube.com/watch?v=hhM7IiPvQ1k

اللي يبي الخير يدور لي على اله الزمن ودي اعود ....تركت حذياني عند سعيد ابواذوني

**يـــوسف** · 14-01-2009 00:31

رحم الله الملك فيصل ...

وياليت كل حكامنا يكونون فيصل ..

والله يابنت الحلال عقب ماشفت اليوم أخوانا بالكويت زعلانين على قطر يقولون ليش تسوي قمة طارئه دريت أن ربعنا ماعندهم إلا الضعوي

واللي غاثن وحارق دمي هو هياط الربع

ماودي اتكلم حيل وأذكر أسمـــاء لأن وراي مستقبل ووراي عوائل <_ بالع العافية

بس فيه تسائل ثاني قطر دام علاقته مع اسرائيل قوية وبينهم صحبه ليش مايكلمونهم علشان يهدون القصف شوي أقل مافيها يمدي يطلعون المصابين ..

ولا مجلس الأمن الدولي بغو يحبسون البشير ولافيه شي عليه
وإسرائيل تقصف بإسلحة ممنوعة دولية ولحد يقولهم شي

عزتي لنا يالعرب عقب مالمعتصم مشا جيوش عشان وحده قالت وامعتصماه ..
هذولا يشوفون عجز يترجنهم يتحركون ولا فيهم من قال شي بس يقولون عقد قمة طارئه وصارلها الحين 18 يوم

أحبك ياعربي

وحياك الله يالضيفة ومنتي ضيفة انتي راعية محل والقهوه الساعة 5 الفجر

توسدي إحترامي

**السنعوووسيه** · 14-01-2009 01:35

ايييييييييييييييييييييه ياحزم الضامي

حاتس اختي منورتنا

*

**يـــوسف** · 14-01-2009 01:38

^
^
حاتس

من زود القهر ياخاله مافيه تركيز مالومتس ههههههههههههه

**السنعوووسيه** · 14-01-2009 02:02

8
8
8
8

هههههههههههه

ايوالله يوسف ظغطي 2000

************

اقصد حياتس الله ومنورتنا

هالابيات لشاعرنا عبدالمجيد الشمري

عزالله انه صدق

حريمنا .. خوذن الحانا منّـا ,,,

,,,,,,,, أظنّكن كـفـو ٍ لـ رد الغااااره

(تهنا) عقب ترك الصلاه بوقته

,,,,,,,, و (ضعنا) عقب وتر ٍ يهز أسحاره

عراااقنا راحت بعد ما راحت ..

,,,,,,,, (جاره) .. وفلّي مقصدي يا (جاره)

صح لسااااااانه عزالله قال ابيات الاشمل

وشلون نعذرهم عقب هاذي

اويطي صدز

**أحمد** · 14-01-2009 02:22

ياهلا والله خالتي انا عن نفسي اقول مايلي:

إذا طلعت من جو الفلة اقول لازم الكل يعترف بالتقصير حنا نبي من الحكام ونبي من المسؤولين ونبي ونبي والواحد لو يسأل نفسة عمرك صليت ركعتين بجوف الليل ودعيت لغزة وللعراق ولكل مسلم ؟؟؟؟؟؟؟؟؟
يكون الجواب مدامي انا مقصر ليه الوم الناس......

وإذا انا بجو الفله ابقول عليتس توقيع ذكرني بمحمد عبدوهـ ايام الابيض واسود واغنية اسمحيلي يالغرام خخخخخخخخخخخخ

الاكيد فكرة طيبة الله يجزاتس عنا الف خير اختي

**أحمد** · 14-01-2009 02:29

[align=center]
طراااااااااااااااااااااخ

وانا ارفش من جديد

صح لسان عبد المجيد الشمري على الابيات اللي جابتهن السنعوسية والله هذا الواقع

وانا اعرض سكسوكتي بسعر رمزي لاي وحده من اعضاء الفله خخخخخخخخخخخ

لاهان الجميع
[/align]

**السنعوووسيه** · 14-01-2009 02:31

طراااااااااااااخ

الجثري يرحم امك عدل نضارتك ماهي حاطه توقيع هع هع

**يـــوسف** · 14-01-2009 02:34

الجثري يقصد صورة الملك فيصل رحمة الله عليه

<_ يرقع للجثري ههههههههههه

أقول صح لسان الشاعر بس الضرب بالميت حرآم

والله لو هو فندق وتصير بوه أحتفالات خاصه تسان ماتطلع الشمس الا وهم حالين مشكلته

يالربع لحد يتعمق حيل ترو اهلي يبوني لو انهم يدبوني بس يغلوني