شق الضياء والعين ما ذاقت النوم ..
بسم الله الرحمن الرحيـم
متواضعـه اتمنى ان ترتقي لسمو ذائقتكـم ..
.
.
.
شق الضيـاء والعين ما ذاقت النوم
,,,,, تسهر..عسى الله ما يضيًع جهدها
تذرف كمـا وبل ٍ على القاع ديموم
,,,,, قطرات .... والله ما حصينا عددهـا
مدري من الأشواق والا من اللوم
,,,,, و الا مـن (الثنتين) تذرف وحدهـا
بس الوكاد .. اني تمسيت مضيوم
,,,,, راحت حياتي .. ما تحقق سعدها
يا مل قلب ٍ دايم الدوم مهـموم
,,,,, عايش على ذكـرى وليف ٍ جحدها
يقصد ولا يبعـد عن الصيده الحوم
,,,,, قصيدة ٍ لا من قصدها ... قصدهـا
له قلب ما هزه ثمانين زيزوم
,,,,, قلب ٍ مواااكيـر الرجولـه صعـدهـا
والله لو يغزونه الفـرس والروم
,,,,, ساداتهم من ياس ترجع بلدهـا
واللي غزتني واستباحتني اليوم
,,, من حسنها ما استفزعت في سندها
يفزع لها ليل ٍ على الراس مقسوم
,,,,, من فلًته ,, لسن الأوادم عقدهـا
ويفزع لها ورد ٍ على الخد مركوم
,,,, غيمه,وشمس الصيف حبًت جسدها
ويفزع لها ثغر ٍ به اللول ملموم
,,,,, ما أظن يروى ضامي ٍ من شهدها
ويفزع لها رمـش ٍ عن الميل معصوم
,,,,, ( أسود ) .. بليًا ما تمسّه بيدها
ويفزع لها قلب ٍ عن العار محشوم
,,,,, يستاهله من يعشقه في مهدها
لعيونها سويـت لي درً منظوم
,,,,, قصيدة ٍ من شافها .... ما نقدها
أم العيون اللي عن الرزله تشوم
,,,,, أطلب من الله ما يطيًح عمدها
في وصلهـا طش..وهماليل وغيوم
,,,,, والله يعلم كيف حالي بـعدها
من عقبها كني ضعيف ٍ ومـظلوم
,,,,, ما بيده الا (سجدته) لا سجدها
أونً من حـرًه كـما شيخ مهـزوم
,,,,, غدى كسيـر.. و حاجته ما وجدها
لو أنها بالمرجله ؟! ااااخ يا قوم
,,,,, و الله لأجلب حاجتي من بلدها
لكنًهـا حكمه.. وأنا شخص محكوم
,,,,, مكتوبة ٍ قبل المهاد و لحـــدها
وسلامتكـم ..
محبكم
عبدالمجيد بن محمد الشمري
الأشمـل
رد مع اقتباس
المفضلات