اللهم صلي وسلم على نبينا محمـد ,,
بســم اللـه الرحـمـــن الرحيـــم
السلام عليـــكم ورحمــة الله وبركـــــــــاته ,, وأسعد الله أوقـاتكم بكل خير ..
أعزائي رواد هـذا المضيـف الراقي والرائع , يشــرفني أن اكون أحد أعضـاء
هذه المضــايف ..
لا أخفيــكـم أني قد احترت كل الحيــره أمـام هؤلاء الشعراء العظـام بماذا
أبتدئ أوّل مشــــاركـه .. بحثت وبحثت وبحثت ولم أجد أفضــل من موضوع
مدح نبيـنـا محمـد صلى الله عليــه وسلم والدفاع عنـــه ..
لـن أطيــــل عليــكم .. اليــكـم القصيـــــده /
يا هاجسي منت بعلى الضيم صبّار
وأمة نبي الله تذوق المراره
يا كثرهم لا قلت بالكون شعّار
ويا قلّهم لا قلت شعره مناره
ياشعري ان ما قلتها كلمتي عار
قصيدة ٍ ترجع عليّه بشاره
لله أبكتبها ترى ما هي بـثـار
ونبـينا له ربّ ياخذ بثاره
وأنا هنا في داخلي كومة أفكار
من وين أببدأ والحشا به حراره
غِـيره على ديني وتوقير مغوار
للطيّب المقدام راع البصاره
محشوم ياللي ما شكى منّك الجار
يا هادي الأمّـه وسبّة وقاره
يا نور ياللي غير عن كل الأنوار
نبع الهدى .. وكر النقى .. والنعاره
يالحازم الزيزوم يالعابد الـبار
ياناشر الدعوه يميـن ويـساره
بآبوي وأمي أنت يا خيـر بشّار
يا مالك الحشمه وراع الطهاره
حنّا فداااكـ ولو يروحنّ الأعمار
يا صفوة الأمّه وصاحب عماره
وأمّا الحمير اللي يسوقون الأعذار
عقب القطاعه .. والفقر .. والخساره
تـبـا ً لهم تبّه وتـبـّات مدرار
والله لا يـحرم هل السوء ناره
يـا الله أنا طالبكـ يا وال الأقدار
يــا ربنا اللي ما يعسره قراره
ترسل عليهم صفـقة اعـصار باعصار
مـع غيمـة ٍ سوداء يُخايل مساره
تمطر عليـهم يالولي نـار وحجار
تـاره تـصيب الصرب والروم تاره
يا أمّة الاسلام يالعُرب الأخيـار
اليا متى ما تفهمون الاشاره ؟!
صـوتي تقـطّع لو يفيدنّ الأشعار
أوّااااه يا صـرح ٍ تحرّى دماره
قـفّى زمان القدس والوقت دوّار
وعراقنا قفّت بعد .. يا خساره
ان ما صحيتوا فاعذروا كل غدّار
الـيـا أقبل بجيش ٍ يحدّه غباره
والا تعودنا عـلى الكي بالنار؟!
وحـقوقنا صارت قضايا مثاره
متفرعنين وبيدهم كل الأشوار
ويخـططون لكل شي بشطاره
وحنـا لك الله ما لنا سيف بتـّار
هم الرجل فينا سميره وساره
الله ُ أكبر يا زمن قب الأمهار
ليله وضوح ونور يشبه نهاره
وين أنت يا فاتح عظيمات الأسوار؟
لـبّى زمان العز وأعظم حضاره
وأمّـا زمنّا مع تواريخنا عار
عــزاااه والزيـزوم فاقد وقاره
يا قل ما نفعل .. ويا كثر الأعذار
والجار ينزف ما درى عنه جاره
هذي نصيحة شاعر ٍ دون ديـنار
للمـسلمين بكل ديره وحاره
اليـا اعتبرنا جارنا ماهو بجار
ولا تـعاهدنا نـردّ اعتباره
نمـشـي مــعـــا ً يـم المـآسـي والأخـطـار
والـحــرّ يــصـبـــح مـاشي بشـور فــــاره ,,
وسلاااامتكـم ..
مع تحيــــات أخوكـم /
عبـد المجيــــد بن محمد الشمــري ,,
رد مع اقتباس
المفضلات