مسيكم بالخير وشلونكم ياربع كل ابوكم ..
اليوم شريت لي سيارة ددسن موديل 83 << وجع قولوا مبروك
المهم طايرن به من الفرحه لأني أحب السيارة الونيت كثير ما كنت
أحتاج لسيارات العيال وكل واحد إذا أخذت موتره يعطيك وصيه
(لا يتمخش الصندوق ) وهو إذا أخذ موتري ما يجيبه ألا لعن جدف
أجدفه ولعمري .. بديت لجيت أخذ موتر حداهم أقوله (تعطين موترك
ولا يتمخش الصندوق) كان عندي لي كسرت موتر ونيت ومعبراً
لنخيته بس أنقردت وبعته .. المهم رحت أشوف الموتر ومعي أحد
العيال .. وهو يفتح الباب وناظر بوسط الغماره ويدي على جنب الباب
وهو يبي يسكر الباب .. ولا وش يسكر ؟؟ يسكر على أصبعي الله
يقلعه .. وأنا هالحين وأنا أكتب هالموضوع مبعداً أصبعي أخاف ألمسه
وأنا ما أدري .. لأنه الله يقلعه كسر ظفري ودم الله يكفيكم الشر ..
ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ ـ
ومرة حصلي قريب لهالموقف لكن عند بيع مثله ..
أول ما شريت موتر شريت ددسن ... المهم ويصير له مده معي ..
أسواقه راكدة ومهنا أحليلي .. يوم جيت أشري سيارة جديدة ..
وبيع الددسن .. أنقردت قالي واحد من العيال خذ حقك منه ..
قلت وشلون ؟؟
قال فحط به كله يومين وأنت بايعه .. قلت أنا ما أحب التفحيط أن كان
أنت تبي تفحط به شف مفتاحه عليه .. وحنا كنا جالسين لنا بنفود ..
وهو يركب ويشغل .. وهو يروح لسكه مسرع ويسحب جلنط .. تمام
قال لا هالمره أبسرع فلت أمهن ابو كتره << من زين الجهده
وهو يقلع ويسحب جلنط .... الله ياخذه ..
وهو يقلب بددسني .. بديت أشوف النور يدور مره يرقى ومره ينزل
ويطلع هو منه تقل (بس) ماجه أخلاف .. وتدخل الورشه وتقعد له
شهر ونص ما أطلعت .. وكل ما جيت للهندي قالي بكرا .. عساه
للبكرة ألي ترمحه يوم أطلعت وأنا أبيعه (بكليب سرق أهله )
وأنقطع ما شريت سيارة يمى أطلعت هالكسره من الورشه ..
باركوا لي << لكزس بفيزة ددسن ..
.. ولي يبي دوره بعشره .. والمسؤل عن التذاكر (يوسف
العطاوي )
تحياتي ..
رد مع اقتباس
المشاركة الأصلية كتبت بواسطة حيل حليل
المفضلات