صباحكم / مسائكم أحلا من الورد
مع جو الأختبارات الوجية عابسة وتمحق الرزق وهو مقبل
بين يارب سترك ويارب نجحنا ونفتك
مع اني خلصت وأفتكيت الأأني حاسة بمعانات الطلاب
وأولهم أختي الصغرى
المسكينة صار لها ثلاث سنين بأول ثانوي وهذي السنة الثالثة
كل سنة تدخل تدرس شهرين وبالكثير ثلاث ثم تقول : أنقلوني لمدرسة ثانيه
وننقلها من حكومية لخاصة ..
ثم تقول : بنات الناس العز والهوامير مدلعات مايعات ما أقدر أتحمل دلعهن
ومدرساتهم مصارية ما أفهم عليهم رجعوني لصديقات في المدرسة القديمه
ولما الوالد يرفض تقول : خلاص ماني رايحة مدرسة أبي افصل .. سنتين على هالموال
طبعاً بما انها اخر العنقود مخلينها على راحتها تغيب .. تدرس .. تفصل بكيفها
المشكلة على هالأهمال تقول ابي أصير دكتورة
والسنة هذي هي رقم 3 بأول ثانوي بس هالمره مجتهدة حيييل مع انها أول السنه
رجع لها نفس المرض وهو : أبي أنقل ولا أفصل
أخوي الكبير عصب عليها وقال : أقول يابنت والله لو نحطكي مع العجز في محو الأمية ما نجحتي
بس اجلسي في البيت وريحينا
انا مادريت انها حساسة لهذا الدرجة الا وهي تفز من مقعدها من عقب هالكلمة
وتصك على نفسها باب الغرفة وغطت أكثر من ساعة شوين وهي جايه ومعها دفتر وقلم
تصوت علي من ورى الباب زعلانه ولا تبي أحد يشوفه
هديبا تعالي شوي ابيك
وانا ماني يمها عيوني مبققه بالتلفزيون مع جويل وبصراحة أحلا
متهولة بالمرة اللي اول الحلقة شي وأخرها شي ثاني والله طلعت كأنها جمس من الوكالة
والله وأختي مازالت تحتري هديبا تخلص من الصدمه .. الا وهي تنفخ هاه تجي ولا وش لون
>> عصبت وهي عصبية خلقه
وحنا نجتمع بغرفتها وتمسك الدفتر وتنحنح تعدل الأحبال الصوتيه عقب ما
صرخت علي و أرعبتني
قالت : اسمعي هالقصيدة كتبتها الحين وانا معصبة من كلمة
( تدرسي مع حريم كبار )
والله قصيدتها تحفه ههههه
أثاري صدق الشاعر لما يتأثر بموقف يكتب فيه
أسمعوا وش تقول بنت ابو تركي
عنوان القصيدة ( ذكريات يوم غثوني )
عاد مناسبه النص مذكوره عندكم
تقول :
ماكتب ربي علي حكم الأقدار *** وماحرق قلبي الألوم أهلي ليه
سنتين وانا في خفايا الأسرار *** حكم القدر وانا منه بريه
قهرتوني أشعلتوا بمستقبلي نار *** هدمتوا طموحي ماخليتوا امل فيه
تقالوا ما انفع الا مع حريم كبار *** عجزتوني وانا في شبابي صبية
قالوا اللي تقولوه اخترعوا الأعذار *** وانا والله من هالملامه برية
يمرهالعام واللي عقبةوالزمن دوار *** كان امس علي يجي بكره ويصير لية
عطوني فرصة وتصير مشاعل من الشطار **وانجح واجيب واحد فوق المية
يمكن يجي يوم جنب اسمي D.r *** يواجهني من قال عني غبية
وسلامتكم
ركزوا على D.r
سألتها وش المقصود من D.r كمحللة وناقدة للقصيدة
قالت : ياطويلة العمر ابي اصير دكتورة في علم النفس وأعالج هالمجتمع المتخلف اللي عندنا
>> قوية صح
أدري ان قصيدتها فيها كسور كثيرة بس كمبتدئه بهالعمر حلو اللي كتبته
وعلى فكرة هي ماتدري اني سارقة قصيدتها والأ كان مذبوحة الليلة مذبوحة
أدعوا لها تنجح هالسنة تقول : لونجحة بأبروز شهادة اول ثانوي وأعلقها بالصالة
لأنها تقابل شهادة البكالوريوس
وبالتوفيق لكل الطلاب والطالبات
رد مع اقتباس
المشاركة الأصلية كتبت بواسطة يوسف
المفضلات