[align=center]
اول شين ابشركم مابي خلاف
والحمد لله على لطه وكرمه
وبس تذكرت سوالفن تضحك بالحادث وقلت ابعلمكم به
يالربع
والربعات ( ذليت يزعلن علي وينتفن شوشتي )
هكا اليوم طالعن من الدوام الساعه اربع العصر
وداعس للبيت ابي اقضب الارض بس
وهي تدق علي ام ماجد
قالت وينك
قلت توني بالدوام والظاهر ابتأخر عليكم
( انا قلته من باب الاستهبال ابسوي به مقلب ماحسبه تبي تصير صحيح )
الوكاد يوم دخلت الرياض وقربت شوين
وانا اجيلي تقاطع خطير
واوقف بجنب قلابي
المشكله اني ما اشوف اللي جايين من هالبليه
ومن كثر ذهانتي وحنكتي بالحياة ( وراثه اب عن جد )
قلت ليامنوه طلع القلابي ابي اطلع معوه اتذرابوه
والله وهو يمشي القلابي وانا امشي معوه
وقبل يخلص الطريق وانا انقرد ( وراثه اب عن جد )
قلت اكيد مافيه احد خلن ادعس
وانا ادعس
دقيقة صمت بالله وكلكم قيام احتراما للذكي اللي خانوه ذكاوه
واول ماتعديتوه ليمار جاين ابو لمز ( ليموزين )
وانا اديلوه على الباب
وحنا نقوم نفتر كلن بجهه
وغبار ماتشوف يدك
عاد انا من شفت هالغبره والدعثه كلت مابدهاش ميت ميت ياشبيثان
الله يجيركم وهن يمرن ذنوبي كلهن دزدامي
واتذكر مره تكلمت على شنقل
قلت اويلي ياهني اللي يشوف خشتوه بس ابي اتعذر منوه
( عاد هو ملعون رقبه ما يسامح بالهينه ولا يعرف حاجه اسمه تسامح )
وتذكرت بلاوي سوداء الله يكفينا الشر تودي بداهيه
المهم يوم فهت وركد الوضع وانا اقوم اتحرا هالشفايين يجون
بس تأخرو
غريبه مالهم بالعاده الله يستر عليهم تسان مابهم شين
وانا اقوم احاتيهم
المهم سميت بالرحمن ونزلت وشكرت رب العزه والجلال على فضلوه
وانا اراعي لبو لمز ليما ليهالحين مانزل
قلت وليييييه لايكون صار فيه شي
وانا اروح لوه
يوم جيتوه ليمار باكستاني
ومعوه راكب سوداني ( التم المتعوس على خايب الرجا )
قلت الحمد لله على السلامه
قال السوداني الله يسلم يازول غزااااااء وغدررررر
قلت خويك ليه مايرد
قال ممكن يكون مصدوم
قلت ياخي الحمد لله على السلامه يا صديق
قال كويس
قلت يا زول هذا مصدوم صحيح مهو يمكن
الوكاد قمنا نتحرا المرور انا والباكستاني والزول
ويوم خذيت شوين وانا اراعي للسوداني
قلت يا اخ العرب انا والباكستاني ننتظر المرور علشان سياراتنا
انت وش تبي
تحسب الباكستاني يبي يوصلك
رح دور لك ليموزين ثاني الله يجزاك خير
قال والله صدغتا
وهو يقوم من عندنا ينزي
المهم
جانا المرور
وخذا اوراقنا
قالي وين التأمين حقك
قلت والله ماني مأمن
قال انت يالباكستاني روح الله معك
وانت دق على اي احد من خوياك موظف يجي يكفلك عند المرور وتمشي
قلت متى اخليه يجي
قال الحين حنا رايحين دق عليه الحين خلوه يروح هناك
وادق على واحد من جماعة ربعنا قلت رح للمرور
الوكاد قال اركب
وانا اجي ابركب بجنبوه
قال ارتسب وراء يالحبيب
والله وانا ارتسب ورا على قولتوه
وهي تبداء الحفله
وهو يقوم يمتر بي الرياض
وهذا حادث بجنوب الرياض يروح يموه
وهذا اخر شمال الرياض يطلع لوه
وهذا اخر شرق يدوس يموه
وهالحتسي من الساعه اربع ونص العصر
ويوم جت الساعه ست المغرب وحنا على هالفر
قلت ياخوي انت شايفن ضحية حاطن ورا وتمتربي الرياض
قال لايكثر
قلت لا يكثر لا يكثر حكومه
وانا انسحد ورا وانام
وهو يقعدن المغرب عند محطه
قال انزل
وانا انزل
قال غسل وجهك
وانا اغسل فيسي
قال فيك شي
( بهاللحظه عرفت ان الرجال يحسبن تعبان )
قلت وش مافيني كل بلاوي هالدنيا فيني
والظاهر بي نزيف
قال طيب رح لاهلك
قلت شلون اروح لاهلي
انا الحين وين
قال حنا الحين بمنفوحه
قلت ياحبيبي وانا وش يوصلن لاهلي
الا قل وش يطلعن من منفوحه هذي
قال الظاهر منت كفو طيب ( الظاهر اكتشف اني تسذوب )
يالله ارتسب مكانك
قلت انت الحين تحسب انك متجملن بي
ارتسب ارتسب
وهو يقوم يلاهدني
من رصيف ليا رصيف
وانا لي صياح ورا
الله لا يوفقك
الله يقطع بذرك
الله يوريني فيك يووووم
وعلى هالحاله ليما جت الساعه تسع ونص
يعني خمس ساعات وانا بجيب المرور ( بالله هذي حاله )
الوكاد وصلنا للقسم حوالي الساعه عشر الا ربع
والمصيبه ان جوالي كل هالمده هذي قفل من البطاريه
واهلي مايدرون وين انا
وكفيلي مايدري وين وليت
الوكاد وصلنا القسم واشوى لقيت الكفيل
ويالله نفتك منهم
وقبل اطلع مريت على العسكري اللي بهذلني
وللحين كراعيني وظهري يوجعني
وضاربن ابو وجه
افمي برقبتي
وتقلدوا تحيتي
[/align]
رد مع اقتباس
الحمد لله على الصلامه ياشبيثان
هاالسولافه هاذي
المفضلات