يبتعد منصور البلوي والا يبقى !! وأنا وش دخلني ؟!!

**ريم شمر** · 08-06-2008 17:29

مساكم الله بالخير ياأهل الكوره ،

أتمنى تكونون مروقين وهادين على الاقل دامني عندكم

مابي اطلع من هنا مصابه

قبل أقولكم وشوله مسيرتن عليكم اليوم ودي اعطيكم نبذة عن تاريخي الرياضي

علشان تعرفون أني منيب غشيمه بهالمجال

.
.
يوم أني صغيره بعمر تسع سنين كنت ومجموعه (مبزره) من العائله في بيت عمي الكبير

وكان هناك نقاش حاد بين اثنين من اعمامي واحد فيهم هلالي والثاني نصراوي

كنا نتابع الحوار اللي كان في بدايته سلمي ثم تحول لـعنيف

وفي الاخير زي العاده الهلالي سكت النصرواي

وفي اثناء احتفال عمي الهلالي بالنصر والهيمنه التفت لنا

وكانت عيوننا تشع بالبراءة ، وقال من فيكم هلالي ومن فيكم نصراوي

طبعا مافيه أمل النصراوي يعترف ...يدري انه بينجلد

وأنا شخصيا ماخليته يكمل

قلت على طول : أنا هلاليه

قام طلع البوك وجدع على كل واحد ووحده فينا خمسين ريال

من يومها صرت هلاليه متعصبه

مادري عاد ..هو خوف والا طمع بالريالات

الى الثانويه وانا اتابع الهلال والمنتخب

وتخيلوا اتابع المباراة من أولها الى آخرها

واليوم اللي يفوز فيه الهلال اعتبره عيد ثالث

اسوي حفله واعزم صديقاتي

هذا كان سابقا

حاليا اذا سمعت صوت المعلق يجيني اكتئاب

واذا مريت صدفه وشفت فيه مبارة في التلفزيون يصدع راسي

اذا قريت الجريده اطمر الصفحه الرياضيه

مع اني مازلت احس بشوية فرح اذا فاز الهلال

يمكن لأن أبوطلال هلالي

المهم أني الآن علاقتي بالرياضه سلبية جدا

مااحبها واكره طاريها وآخر شي افكر فيها اتابع اخبارها

ولايهمني أبدا لامنصور البلوي ولا غيره

ومع ذلك أقوم اليوم الصبح على رنة الجوال ورساله مضمونها :

(عبر عن رأيك هل أنت مع أو ضد إبتعاد منصور البلوي
عن المجال الرياضي واربح 500 ريال )

انا من شفت الـ 500 شكيت ان عمي له دخل بالسالفه

السؤال

هل بيعطوني الخمسميه اذا قلت ايه او اذا قلت لا

والسؤال الثاني

من اللي اعطى نفسه الحق انه يقرر عن الادمي مصيره يبتعد والا يقعد.... لا ويحط جوائز بعد

السؤال الثالث

هل الموضوع هام ومصيري لدرجه انهم يزعجون خلق الله برسايل مثل هذي

السؤال الرابع

هل بقاء البلوي والا ابتعاده بيأثر على الهلال بطريقة ما

السؤال الخامس

منهو منصور البلوي اصلا

**ريال الفسحه** · 08-06-2008 22:24

منصور البلوي معلم شورما بمطعم عندنا <--اويلك على ابومرزوق " الفيتو "

ريم

مشكلتس هينه انا من كرهي للكوره ودي ان المنتخب يخسر وان
الدوري السعودي يغلق والملاعب يقلبونه صالات عروس

انحشششش لايجيك سالم

**المطنوخه** · 09-06-2008 01:34

لالالالالالالالالالالالالالالالالالالالا لالالالالالالا

ما أحد يعرفه الا أنا

تدرين منهو

أنزلي تحت

منصور هو

منصور

منصور

أخبر توصيل طلبات اللي عند بيت ريالين فسحــــــــــــــــه

هههههههههههههههههههههههههههههههههههههههه ههه

وبعدين تبين ريالين اهلا وسهلا خمسين مافيه أكلتها الاسهم

هههههههههههههههههههههههههههههههههههه

**ابن جشعم** · 09-06-2008 02:03

تقول ام طلال منهو منصور البلوي !!!!!!!!!

منصور هو اللي له نسبه في اي اتصال من خلال الرقم 700
فـــ يمكن له ضلع بكثير من أرقام الــ اس أم اس الوهمية

همسه:
امتدحي هلالك باللي تبين كلام ولكن لاتسبي نصرنا العالمي.........

تحياتي لأم طلال والأخوه العابرين

**ريم شمر** · 09-06-2008 12:46

هلا بك ريوم ..منوره ياغاليه

وانا كنت حاسه انه تبع الاتحاد اسمه يناسب الاتحاد اكثر من غيره

بس هم وش بلاهم عليه ؟!!وش هو مسوي ؟!!

**ريم شمر** · 09-06-2008 13:00

حياك ياريال ........مااظن فيه فرق بين رئيس نادي ومعلم شاورما ، كلهم يمطرسون

بس غريب انه مالك في الرياضه

**ريم شمر** · 09-06-2008 13:09

هلا بك المطنوخه .. مشاء الله راعية فزعه أبرك من سميتس

شرفني حضورك

**ريم شمر** · 09-06-2008 13:25

منصور هو اللي له نسبه في اي اتصال من خلال الرقم 700
فـــ يمكن له ضلع بكثير من أرقام الــ اس أم اس الوهمية

اجل هو اللي مرسل الرساله

همسه:
امتدحي هلالك باللي تبين كلام ولكن لاتسبي نصرنا العالمي.........

ومن يقدر يسب النصر

<<<خافت

النصر احلى فريق بالعالم كله

والهلال وش يكون الهلال قدام النصر

حياك الله ابو سليمان

**نافع بن طواله** · 09-06-2008 13:37

وش مزعلكم على منصور البلوي

هذا رجال فلوسه واجد <<<<<< الله لا يضره ويعطينا مثل ماعطاه

لو يعد فلوسه ينشف ريقه وهن ما خلصن

وبعدين وجوده رزق لهاللاعبين المساكين الرجال يدفع بالملايين خلوه يعطي هاللي ضاعت اعمارهم ورا هالكوره لا شهاده ولا صنعه غير الكوره ولو ينكصم واحد بهم يموت جوع عياله

الوكاد

نرجع للهلال

انا شجعت الهلال بالحميّا

اذا سيرت على خوالي لقيتهم متحمسين مع الهلال البيت كله حتى جدتي

وكان يسير على خوالي خالد التيماوي وكانوا يقولون لي هذا يلعب في الهلال وكان توه طالع

ومنها وانا هلالي >>>>> هلالي بس من غير هوشات ولا مضاربات يعني هلالي مؤدب

ومع الوقت تهلهلت صحيح وصرت متابع لتطورات الهلال

بس احلى شي فيني ما احب المجادله احب التفرج على اللعب والحماس محدود فقط بحدود المباراة ومابعدها بربع ساعه

وعقبها ما احب اسولف بالمباراة

اووووووووووووووووووووووووووووه يالأزرق يامووووووووووووج البحر

**حمـود** · 09-06-2008 16:59

ريم لقد اخبتي

ظني فيكي

وانا زعلان بالحيل

هههههههههههههههههه

هذا هو منصور حمدان البلوي

هذا في زمانه الانديه السعوديه ذهبت للعالميه

حينما كان الداعم الاساسي للاتحاد

هذا منصور حمدان البلوي

الرجل الوطني المحب لوطنه

هذا عام 2005

دفع قيمه تذاكر اكثر من 75 الف مشجع لموازه الاخضر باستاد الملك فهد

هذا هو منصور حمدان البلوي

الذي يتهمه اكثر الناس

بانه يحب يهايط بدون سبب

وقال منهو هذا منصور البلوي

دمتم بخير

وادعوا للرجل بالشفاء العاجل

فهو الان لايريد ان تفتحوا

مواضيع لسبه او شتمه