تصحيح لما ذكر عن "معارك بين عنزة وشمر"

[خيال البويضا]

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
أما بعد :
كل عام وانتم بخير و بارك الله لكم في أيامكم وجعل لكم من كل هم مخرجا
ومن كل ضيق فرجا وشكر خاص لكل من رد و علق و ساهم بما يعرف عن تاريخنا المجيد
وشكر خاص للأخ الغسلان على كلامه الجميل والذي اعتبره وساما لي

أخوكم / خيال البويضا

[إبراهيم الشميلي]

ياجماعه الخير كل يومين تطلع سالفه مختلفه

ماعرفنا الصح من التحريف

الجيل القادم راح يتعب من تحريف هالوقت

ولا ندري من الفاعلين والمقصود منها

وخصوصن بالانترنت

والتارريخ واضح ولايحتاج الى ذلك


لاهنت يالناقل الموضوع

[العساف]

ياأخوان ياكثر الطيب بين شمر وعنزه (والروله ) أذكروا سوالف الطيب وتبادله بينهم جتى نعلم أبناءنا أشياء تفيدهم وخاصة إنهم متجاورين منذ القدم في شمال الجزيرة العربيه ومن أكبر قبائلها.
أذكروا محاسن موتاكم

[ابو عبدالعزيز]

مايفرقنا عن الويلان ياكود البطاقه === ابك حنا دولتين كبار بمسمى قبيله


شمر وعنزه عداء ،،ووفاء ،، والله ماينظام شمري وعنده عنزي ولاعنزي عند شمري رغم الحروب اللي بينهم



يقول الشاعر العنزي

يعني على قولة هل العرف ياحسيـن
لاخيـر فـي رجـلٍ بليـا جمـاعـه

ولانـي ولـدت بـدار فكاكـة الديـن
اهل الكرم والطيب واهـل الشجاعـه

ويلان لا وردو على المـوت عجليـن
فيهـم علـى ورد المنايـا بتـاعـه

الطيبـيـن الطاهـريـن النقـيـيـن
الخيـريـن الصادقـيـن السبـاعـه

موفين حق الجـار بالطيـب والليـن
للجار فـي قـرب النشامـا مناعـه

معهم سليت ورحت بالمذهـب الزيـن
راحت معاهم حفنـة سنيـن ساعـه

ثلثيـن عمـري راح يـا وي ثلثيـن
مايـوم جتنـي العايلـه واللكـاعـه

صاروا لي الطف من غطا الجفن للعين
وارق من حكـي الحديـث بشفاعـه

تحس في قـرب الرجـال المياميـن
انك اخو من ((دم)) ولا ((رضاعـه))

حمّاية الوضحا مـن اللـي مغيريـن
لاوين مـن طالـت عليهـم ذراعـه

واجب علي اذكـر فعـول الكريميـن
اللي شروا كسب المراجـل بضاعـه

مدامنـي وافـي واحـب الوفيـيـن
وقناعتـي فيهـم تفـوق القنـاعـه

لازم علـيّ اعـد فعـل الحشيميـن
واترك حديـث الناكسـه والرعاعـه

اترك علوم عفون الاشـوار مهفيـن
حـق الرجـال الطاهـره بالشناعـه

نقالة الحكـي الملفـق علـى ويـن
بالهون ياهـل الواطيـه والبشاعـه

ياحسيـن ماتوخـذ قبيلـه بخبلّـيـن
مادامهـم مـا يـوم جابـو قلاعـه

دحوش الرجـال مقابليـن النساويـن
اهل الحكي والكذب واهـل الخناعـه

وياحسين قالوا في حديـث القديميـن
تحشم كـلاب القـوم رغـم الدناعـه

وانـا لـك الله ماسمعـت المقفـيـن
واللي مشا لـي بـاع دبلّـت باعـه

مايرخـص الغاليـن فعـل الردييـن
راعه بقلبـي حـب الاجـواد راعـه

ياحسين جيت ونبض كـل الشراييـن
حب عنزه باعلـى عوالـي رفاعـه

ولاتحسبنـي جيـت لانـي مسيكيـن
ولا سـلايـل دافعـيـن الرتـاعـه

جيتك ولد مـن روس ربـعٍ عريبيـن
شبـوب نـارٍ عـالـي بانـدلاعـه

انـا سـلايـل لابــة بالملايـيـن
بالضبـط امـه كاملـه باتسـاعـه

شمر على عرش المراجـل سلاطيـن
اسياد عرش الطيب من فـوق قاعـه

ان جت على الفزعات نعمك ونعميـن
وان جت على المده تموت المجاعـه

ولا جت على وصل الرحـم للقريبيـن
اقسـم قسـم مـا بالطنايـا قطاعـه

الحاصل ان القلـب مابيـن عرقيـن
متساويـات بنبضـهـن واندفـاعـه

عرق النسب واسم الطنايا العزيزيـن
وعرقٍ مع الويلان صعـب انقطاعـه

وامنت في قـول الرجـال الحكيميـن
مربى الولد يغلب على الاصل طاعـه

ياحسين واللي نـزل الطـور والتيـن
واللي هدى الانسـان فـن الزراعـه

ماقلتها ياحسين واقصـد بهـا شيـن
غير الثنـا بالطيـب مامـن طماعـه

حبي لكم ياحسين اصـل المضاميـن
ومداد حرفٍي مـع سنـاه وشعاعـه

حـرف كتبتـه ورد فـل ورياحـيـن
وياليت كـل النـاس تقـدر سماعـه

وربـي لرددهـا بـكـل الميـاديـن
ولو لي بعد قـدره نصيـت الاذاعـه

لاني وفـي عشّـاق طبـع الوفييـن
وقناعتـي فيكـم تفـوق القنـاعـه

وختامها بالـورد والعطـر ياحسيـن
مني لكـم ياهـل الوفـا يالجماعـه