..عجايب من القيلولــه ..

**عجايب بنت الشايب** · 15-03-2008 15:26

سلام ياقادة الشعب

سلام ياحماة الأرض ..

سلام ياحملة باكيتات الزقاير .. عسى الله يصلحكم غصبن على خشومكم

غصب غصب >> طيب طيب ياخاله طيب أعصابك

الآن القايله .. أو اواخر القايله

طبعاً تدرون اني توني جايه من الدوام .. >> تطلع اخبارها بأهم الأنباء ..

تدرون ليه ماقيلت ... ؟

بتقولون لأنتس جني ..

هو صح

بس ماهو ذا السبب

السبب يالربع ان ضميري يأنبني .. وضميري توني ادري انه حي

اليوم الحصه الخامسه .. وبعد مرور اربع حصص من الكرف والجهد والتعب عند فصل واحد

نفس الفصل ونفس الخشش ونفس الديكور

زهقت .. صرت اقلب محلات البنات يعنني في صف ثاني ..

احاول اصير ذوق اتيكيت .. اتروومس .. عندهن اغدي يصيرن بنات ورديات

تدرون عاد ان المصريه تقول لي ..

حظك وحش ياعجايب أصلي انتي اخذت فصل زقرت مش بنات ..

قلت : عااااااااشوا ( مع دقة الأصبع )

انا عارفه ان مصايبي في حياتي .. بدت تطلع نتائجها

يعني مو كافي ساكتين على المناهج اللي تهد الحيل فصل يجيب السخط

الحصه الأولى طبعاً

الأخلاق عال العاااااااال

الحصه الثانيه

هاه وهاه

عاد وانت طالع .. تسمع تفحيط صراخ .. داخل الفصل ..

أذكر اني دخلت عليهم مسويه معلمه حنون جايبه معي حلاوه وبطاقات شكر

طلعت من الفصل ولا وحده عطيتها .. بالرغم انهن حلن صح .. بس كذا لعانه دبلن كبدي

وياحبهن للسوالف ..

ابد ياعرب تقل ربي جايبهن لي .. اشوف نفسي فيهن

ابد عجايبيات صغيرات

نرجع لموضوع الحصه الخامسه ( الخبل مايسج عن سالفته )

استفحل فيني الوضع اني اقول لبنت

( أسكتي لأفقع وجهك )

يافضحي عند وزير التعليم

يافضحي عند ولي العهد ورئيس الحرس الوطني

أمحق معلمه .. يامعلمة الشر على قولت مرة جيراننا

وعلى طاري مرة جيراننا

مادريتوا .. >> تضيع السالفه الأولى

بنت جيراننا .. ضعيفه ياعرب ..

أكتن عندها ذاك المرض اللي يجيي بالطحال

مرض ( النقص العاطفي )

هذا ياطويلين الاعمار

البنت الي ماهنا زين ولا هنا قريشات .. ولا هنا شهادة

عاد ياربي لك الحمد الحياة ماشيه بدون الزين ولا القريشات ( هذا انا عندكم مثال حي)

تقوم يالربع بنتهم لا اظلم الليل ..

جمعت من خوياتها

كم جوال كشخه وكم قرطاس كاكاو من النوع الغالي

وكم ورده مجففه

وشمعه على شنق .. ذايبه ...وذوبها الحنين>> > اخس ياعجبجب من ورانا

وصورتها ..

ياعيشة الشر ياعرب

اثر الكشخه هاللون ..

عاد انا نزلت لمستواها وحاولت أواكب عصرها ... و الشفايه ذبحتن ابي اعرف المناسبه

قلت .. يا عكشه ... عفواً .. يا عمشه عفواً يا عبير

وش يصير يعني ؟

قالت اللحين .. لا شفتي هالصوره وش يوحي لك ... ؟؟

قلت :

انتي تبين الصدق ولا ابنا اخيه
............. ولا تبين ارضي غرورك بمغناي

قالت : الصدق

قلت والله تقل صورة ..

رومنسية جذابه حساسه مزيونه ماتعرف غسل الصحون ولا شيل القدور بين قوسين
( برنسيسه ) >> زين ماقلتي قسيسه

قالت : خلاص .. سوي هاللون وافلحي ياعجبجب

ولا احد ينافسك بالبرنسيسه احد

جمعي وخمخمي لو تسلفين من قصراكم مثلي

ولو تشوفين شيء كشخه ماهو لك صوريه وقولي لي ..

وهذا طبعاً يااخوان علاج للنقص العاطفي والجمالي

اكتشف اهل الطب والجغرافيا انه سبب مؤثر في عزوف الكثيرات عن الانتحار الأجتماعي .. !!

ادري يازيني ساكته ..

انتهت القايه . اذن العصر وراي .. كأني بالمذن يقول صلي ازين لك ..

وصول على محمد

طحياتي ......’’

**يـــوسف** · 15-03-2008 15:52

عليكم السلام طال عمرك

فريق ركن عجايب

أول شي يقولك من طول الغيبات جاب الغنايم وانتي تغطين وتغطين وتبطين وتبطين

وتجيبن لنا موضوع اقل مايقال عنه رائع

طيب سعال

وين هدايا البنات كانك ماوزعتيهن هاتيهن حنا أحق

طيب عجايب يعني دايم على هالحال نفس الوجيه ونفس الطالبات

كلهن طقم زي خشت ريتاج

بس زين كلهن زيك يومنك صغيره معجباتك

عمشاء قصدي عبير مقطعتن روحه يعني مسويتن رومنصيه
طيب وش تبي بالجولات تجمعهن واحد يكفي ولا تبي تخش جو انها بنت نعمه وتصفهن قدامه على السرير وتجيب قراطيس الكاكاو وترصه جنبهن وتتحلم الضعيفه

البرنسيسه عجبجب <_ نبي نناديك كذا

**وحش الاسلم** · 15-03-2008 16:03

والله انا اقول الله يعينج بنات هالوقت مصابن مو بنات صايرت اللقف من القافه يصفرن ويصيحن ويشخبطن شنو داش حي عبيد

على العموم الله يعينج بس

**فواز الغسلان** · 15-03-2008 17:52

ياحول ياعجايب علمت على روحها انها ماهي مزيونه00

وبعدين شطانة البنات ماهي غريبه وانتي مدرستهن مثل مايقول المثل

ذاك الشبل من ذاك الاسد000

الا على طاري الشفاوه كان عبير المزيونه ماتزوجت قولي لها فيه

مزيون المضايف الراوي يطلب القرب منك ويمكن تكسبين معروف00

خاصه اني اعاني من نقص حاد في الحنان000

لكن مايؤثر على كوني مزيون000

**عجايب بنت الشايب** · 15-03-2008 18:57

حيا الله العطاوي

من متى الميانه يوم تقول موضوع رائع ؟ >>> فاهمه خطأ

أرحب يالذيب ولاهنت ..

وقل الله يعين بس .. وخلها على ربك

مكتوب علينا نعيش مع نوعيات من البشر ويعيشون معنا << مدري ليه حاسه انها مسئله عن الناس

أرحب يالعطاوي .. يالأقرد

تعال كل يوم .. ياراعي الأوله

طحياتي .....,,,

**عجايب بنت الشايب** · 15-03-2008 19:00

المشاركة الأصلية كتبت بواسطة وحش الاسلم

والله انا اقول الله يعينج بنات هالوقت مصابن مو بنات صايرت اللقف من القافه يصفرن ويصيحن ويشخبطن شنو داش حي عبيد

على العموم الله يعينج بس

ياوحش

بالله .. بسألك .. وشو زيت شعرك .. ؟ >> شغل شماته بس

بجد اله يخلي لك شعرك ويخليه لك

لأن مافيه بنت بالدنيا تتمنى شعر ولد .. ( الله العالم وش فيه )

خلنا من شعرك

وشو حي عبيد

لا عبيد ولا سعيد

عين خير

واذكر الله لا يجي علمن آخر ثمن .. توسدها عدل

هها عاد

طحياتي ......’’

**عجايب بنت الشايب** · 15-03-2008 19:04

أرحب ياذيب الغسلانيه

ارحب

تقول

ياحول ياعجايب علمت على روحها انها ماهي مزيونه00

وش اسوي ياخالي .. اهلي علمونا مانجحد النعمه ..

بعدين ... عبير .. عندها نقص عاطفي وانت نقص حنان

بتجيبون وغادين فيهم نقص كالسيوم ..

الله يعين المستشفيات بيمشي سوقها على عصركم

بس اللي اخبره انك راوي والرواي يجيب القديم والعالم تبي التقدم ..

يعني خلك عند مريتك .. الله يجزاها خير يوم انها جزفت بحياتها وخذتك

عسى الله يكتب ذلك في ميزان حسناتها يارب

أرحب يالذيب وجودك يقند الراس

لاهنت

طحياتي ......’’

**ريم شمر** · 15-03-2008 19:56

وحده من امنياتي اني اصير طالبه عندتس

ماتدرسين محو اميه
.
.
.
المهم ....خلي عنتس عبير وشورها المهبب
هذي واشكالها تاليتهم انفصام بالشخصيه

**حمـود** · 15-03-2008 20:45

اهلا بخالتي الثعلبه

اسف اقصد الذيبه

ايه وش صار بالحصه الخامسه مدري رقيه او سبيكه

كملي سالفتس

كلي شوق لاسمع سوالف خالتي بالقايله

خاله ابي اسير يم الشرقيه وين عنزاتس ابي اسرقهن

وخاصه النياق يقولون الشايب ابو عجايب >>اخس سجع

نياقوه حلوات >>ما شا الله

دمتي بخير

**اكملي يا ابلا سالفه الحصه الخامسه

**ابو عارف** · 15-03-2008 20:56

ويش فيها هذي قامت تهذري؟

صارت تنقز من جرف لعدامه

بغيت أجمع شيء ماحصلش

هذي سالفة يوم واحد لفة فينا كل هالفة كأننا مع دئري القصيم

وشلون لو يصيبها مس وتحكي علينا سير خطها في إسبوع؟

يمكن ضاربتها شمس القيلووووووووووووووووووووووووووووووووووو لة وصارت تخربط

تحيه عسكريه سكريه لك هديه يقصد الطقم لاتصورينه مع الجوالات والكشخة البرنسيه