لماذا تموت الحيوانات الأليفة في منازلنا ؟؟؟

**مهاجرة باحساس** · 14-01-2008 11:05

السلام عليكم كلكم دفعه وحــده ,,, ماني فاضيه أعدكم بالاسم

مالكم بالطويلة

هذاك اليوم لاماابي اقول اخاف تطلع السالفه ماقسه

هاه تدرون ابي أقوله عادي

اسمعوا هكاليوم بالجامعه أتمشى أنا وخويتي ساره , وبالعاده اذا تمشينا لحالنا يكون فيه

سالفه خطيره او شي مهم وسري للغايه

هذاك اليوم سبحان الله ماعندنا شي نقوله

تسان اقوله سوير وشبلاتس ماتسولفين وضاربه بوز

قالت : لاني احس اننا حقيرين , متوحشين , مابقلوبنا رحمه

نبي بس وناستنا أنا تهولت

قلت : تعوذي من ابليس قولي وش السالفه

قالت: وش اقول تبيني اقول اننا نذبح الارواح البريئه بدون رحمه في سبيل وناستنا انا انهبلت

ذبح ياربي انا داخله عليك

ياويحي ياريتني مانخشتس وخليتس تحتسين يملى الفرقا

قلت : تقولين وش طاعونتس والا اروح للعميده واقول البنت هذي معها جوال n70

>>>> تقل عاد مو كل يوم يلقطون جوال من بيننا , صار الامر عادي

المهم انها قالت لي الحكايه من طقطق للسلام عليكم

والسلام عليكم

هيه

وين

اوه ماقلت لكم

شوفوا تقول سويره أنهم هذاك اليوم على الغداء ويتعشون >>>

الزبده

تقول ناكل ومركزين , كل واحد يكبر لقمته اكبر من الثاني

الا جاي اخوها عبودي يركض ويقول ثديم ( سديم ) ذبحت القطوه , تقول ماردينا عليهم

وكملنا أكل

تقول جت سديم ووقفت وقامت تستعرض وتقول ايه القطوه شمخت ايد عبودي , وانا خنقتها

كذا ,, وتمسك رقبتها بأيدنها الثنين ,

تقول ولا حركنا ساكن .. قامت ساره للمطبخ تغسل ايدينها والفاجعه كانت

القطوه ممدده على الارض وترفس تقول دارت الدنيا فيني

واركض لأبوي يبه يبه صحيح ذبحوها

تقول ويجي يركض الا المنظر المفزع قدامه .. تقول قال : لحول

شيلوها ونضفوا مكانها وقطوها في الزباله,,, قطوتنا نرميها في الزباله

قلت لها رميتوها

قالت ايه ولفظت أخر أنفاسها في الزباله

المشكله تقول أن البزران محد هاوشهم ولا قال لهم شي , وتقول ولا كانهم مسوين شي

تقول : قلت شوفوا اذا ماعاقبتموهم ترا تصير مهي اخر جريمه

..

عاد ذكرتني بــ الكناري اللي جابه ابوي لنا ذيك السنه

تخيلوا كنار ي طيور حب , تصير في قفصهم جريمة قتل

والسبب فيها أخواني

تصوروا جابوا عصفور من الشارع , وحطوه عندهم في القفص

يوم قلنا لهم ليه , قالوا حرام خلوه يعيش معاهم

عاد تخيلوا أنجن واحد من الطيور ,, الظاهر أنه الذكر , قام يطير ويصير فوق راس طير الشوارع

وينقره على راسه وتلفيخ وتبسيط وأخرتها مات طير الشوارع

ولا ارتاح الكناري وهو يصير شروه عاقد على زوجته وهاتك ياتلفيخ ونقر على الراس ونتف

لين قتلهاااااااااااا

وبعدها هرب من القفص وشرد >> الظاهر جته صدمه نفسيه وعصبيه

لانهم قسم بالله اول ماجوا عندنا يهبلون 24 ساعه متعانقين

..

سؤالي وسؤال سويره خويتي

ليه الحيوانات الاليفه تصير عندنا شرسه وشريره , وليه نكون السبب في موتها ولا نحس بالذنب

وسوالنا ليه كل مانجيب ببغاء نبيه يكبر ويتكلم يموت ...

طيب نوكلهن نفس كل الناس , ليه القطاوه تموت عندنا معنهن بالشوارع مستانسات وعايشات

ابي جواب شافي و وافي ...

**الولد الكبير** · 14-01-2008 12:46

صحيح كلامك شيء يدمي القلب قتل هؤلاء الحيوانات الضعيفة والأليفه بدم بارد من قبل أطفالنا الصغار إنها القسوة المفرطة والجهل وسؤ التربية.

خلوا سديم تمر علينا الله يحفظها عندنا قطوة والد إغديها تتعامل معها ومع صغارها ال4 في نفس الكيفية الخنق حتى الموت وإعطيها على كل قطو نافق 10 ريال.

هذه تربية ابو عارف مايحب الحيوانات ولا الطيور في البيت فيه جنية ماتطيقهم بالمرة إلى درجة إنه إذا سافر للرياض من الشرقية يشيل كل ماوطوط حولنا من ميو ولايرميه حتى يتعدى خريص هالشايب.

سلام

**منصور الغايب** · 14-01-2008 13:31

عودة موفقة لمهاجرة ...

انا اقولك ليش تموت ...

لان حنا لاقين ناكل علشان نوكل هالحيوانات الاليفة علة قولتك

اذا البيت فيه 243546 نفر وين تبين القطوة تلقى مكان بيننا ..

وهالحيوانات قطة وجه تطرده ترجعلك ...

فما فيه الا حل واحد ..

نخلي سديم وامثالها يتصرفون معاها

ذكرتيني بقطوة سوينا كل الحيل علشان نطرده من البيت وما قدرنا ..

تدرين بالاخير شسوينا ...

طردتنا الحكومة من البيت وخذته والقطوة ظلت بالبيت

**سعد الشمرى** · 14-01-2008 16:23

مهاجره بحساس اى والله صدقتى يا بناخيتى عاد عندى حدا وغدانى اسمه صطام والف نعم من هالوغد طالع على عمته مهاجره بحساس وهذا الصغير بهم كل يوم يذبح من الحيوانات البريئه كل يوم الله يجيرج ولا هو دامغن صرصور بيده لا وصدقى مره بيده ومره بأفمه حنا ناس متوحشين زنتى ولاهنتى ونصيحه خلج مثل ولد اخوج صطام جبل مايهزه ريح بقتل الحيوانات البريئه

**ريال الفسحه** · 14-01-2008 16:31

[align=center]
8

هههههههههههههههههههههههههههههههههههه

قسم بالله تشلعت تسبدي من الضحك اجل طلعتوا
وملعونة العصب هالبسه قاعده بالبيت

مهاجره

ذكرتيني بموضوع الشبث [ ابوماجد ] الله يذكروه بالخير
يوم يطرد البساسه خصوصا يوم يقول بعد مالحق البسه مع عياله
وحشرهم بالزاويه انصفر حدا عيال البسه وجا يبي يذبحه الشبث قالت
ام البساسه وش تبيبوه والله انوه ميت

وموقفه الاخر يوم يكشخ بالعقال ويوم شاف البسه طلعت من
الدرام لحقه بالعقال

الله يرحموه رحمتن واسعه <--- ذبح الرجال

كان خوش عضو وخوش مشرف

نرجع للبساسه الي عجايب هي ابخص الناس بهن

والله اني محتاج اختكم سديم هذي ليوم واحد فقط

والله ياعندنا بس يدبل التسبد يحوم حول البيت وشوين تلقاه
فوق الجدار ووالله لو يصير بينك وبينوه متر مايبعد ولايتحرك تهوشه
تحذف نعل

يوقف ويطالع لك من فوق لتحت باستحقار

قسم بالله كنوه يقول انقلع ياورع

ترا سديم واخوه ثروه لاتهدر ابدا

شووكرن مهاجره
[/align]

**الأصيل** · 14-01-2008 16:32

إنا لله وإنا إليه راجعون

مأسااااة بمعنى الكلمه وبكل ماتحمله الأحرف العبقة

أهكذا تموت البساس؟!!

أي فئران ستبتهج من هذه الجريمة الشنعاء

ألم يكن من حق تلك البسه أن نقيم لها مهرجان عزاء

أوبلغ البخل بنا أن نشح على قبرها بـ بوكيه ورد

.
.
.

أيتها الدمعه المحترقة في أجفان الأصيل

أيتها العبرة المختنقة في حنجرة أبو ثوب

آن لك أن تسيلي بعد أن أيقنت أن (مهاجره)لابد أن تدخل مستشفى لأمراض العقلية

**ريتاج** · 14-01-2008 17:35

مهـــــــــــــــــاجره شكلك تمووتين بالحيواانات

يااابنت الحلال هالكلام موجه للاولاد والوغداان هم الللي يذبحوون انا ما اداني اقرب له عشااان

اذبــــــــــــــــــــــــــحــــــــــ ــه***وخاااصه القطااوه

اتذكر ولد عمي وهو يسوق دعسه متعمد .........مجرم

مشكوووره على هالموضووع
الى اللقاء........

**AL-SAAD** · 14-01-2008 20:24

ياحااااااااااااااااااااااااااااله

ناسن تشوف قتل القطاوة ومقهورة ومتخوفه وووو

اجل وش رايك باللي يشوف قتل الانسان بقضايا يوميه>>>>>>حاله بعض الناس

الله يعين بس يالمهاجرة

**يـــوسف** · 15-01-2008 02:48

ياعل يديتس ياسديم مايطبن النار

انا صراحه بصف سديم واشوف انه مو توحش هالعمل بالعكس قمة البراءه

حرام يعني تعبر عن شعورها وتفزع لأخوها عبود

مره حشرنا قطو بالحوش وحنا كانا قليل 18 وغد وكلن شدوقه أكبر من الثاني وماخليناه إلا يوم قامت تزحف زحف وآخر شي مسكه واحد من ذنبه وفره كانه قليل اربعين فره وقطه بالسماء والعلم به متجه لسطح الجيران

ليه الحيوانات الاليفه تصير عندنا شرسه وشريره , وليه نكون السبب في موتها ولا نحس بالذنب

لأننا من طلعنا على هالدنيا نشوف اللي قبلنا يسوون كذا

أبوي شاري لي سكتون وانا بصف سادس يقول اذبح القطاوه موذياتن الشايب

^
^
اتمنى انه جواب شافي

أما بالنسبه للقطاوه تموت عندنا وبالشارع مبسوطه لان قطاوتنا سرابيت تربية شوارع

بس جيبي لك قطو شيرازي والله من الدلع إذا مشا يتكسر يمين ويسار ولا نبيله عبيد أيام عزه ونموت قبله بعد

**بالمختصر..** · 15-01-2008 22:19

تخبرين بستنا

للحيني حاقده عليه .. سببت لي رعب الله لايرده

مره كنت بالمطبخ وهي تلحقن وجت تمغـــط تبي تنطط على الدروج

وانا اوقف قدامه وهي تروح من الجهه الثانيه وكمان وقفت ماخليته تنط

قسم بالله تقل نـّدح انا وياه ( دحه )

يوم عجزت لاتنط وهي تطالع لي .. انا خفت قلت الحين تشوهن بأظافره

وهي تنط علي .. وايدينه على كتفي يالله اتخلص منه ..

قالت حيوانات أليفه ؟؟

اقول اسكتي بس .. مافيه شي اسموه حيوان أليف

سلمي لي على ثديم

.
.