هو الشيخ / ساجر بن رجا بن عرمان الرفدي من عشيرة الشملان وهو شيخ عموم قبيلة سلقا من العمارات
من عنزة (راع البويضاء )
نشأ ساجر بين افراد قبيلته ووقد اشتهر هو واخوه عسكر وعمرهما لم يتجاوز العشرين فكانا مضرب المثل
بين القبائل وكان نشاتهما في منطقة الشملي في أعالي جبال طيء وانتقل الى منطقة القصيم....
وبعدها التفت حوله جماعته الشملان وصاروا يغزون معه القبائل الاخرى واخذت سمعته تزداد وتزعم قبيلة
الشملان وكان محبوب عند من عرفه
ولم يبقى ساجر رئيسا للشملان فقط بل تزعم عموم قبيلة سلقا التي يعتبر الشملان بطنا من بطونها
واصبح يشكل خطرا على القبائل المعادية وكان في غزواته يتبعه اعداد هائلة من الخيل والهجن وكان موفقا
بغزواته شجاع لايهاب الموت وكريم الى ابعد الحدود ودمث الاخلاق ومتسامح عن خطايا من حوله وكان
يفضل قومه على نفسه ويعف عند المغنم وهذه الصفات جعلت أكثر قبائل عنزة وبعض قبائل شمر
بالانضمام اليه في الغزوات ...
والحقيقه ان ساجر يعتبر نموذجا عظيما للفارس والقائد والشيخ ذو الحميه والفزعه وصلابة الراي والجسره
على الاعداء وكان محبوبا عند من يقترب منه ولعل قصته مع خليف اكبر دليل على ذلك:
من طرائف القصص والعلوم اللي صارت لساجر الرفدي مع رجل اسمه خليف والسالفه ، أن خليف رجال
مشؤوم وماهو موفق وكرهوه جماعته
وشد عنهم هو وامه وجاوروا الشيخ ساجر الرفدي وكان شهر رمضان هاك الوقت ، الوكاد وطلعوا للمقناص
والشيخ ساجر عنده طير اسمه ((حطاب)) و*** سلوقي تكرمون اسمه ((خطاف)) ويوم انه راعى الشيخ
لها الارنب وهو يهد الطير عليه
ويحده يمين شمال وياكود خليف يقمز ويزهب بندقه وهو يرمي الارنب الا هو مصوب الطير وغدى ميت
، ويسكت ساجر شوي ويكتم زعله
، الوكاد ويراعيله ارنب ثاني ويهد السلوقي عليه وهو بعد يحده والا خليف يرمي هالارنب الا هو مصوب
السلوقي واذبحه وزعل الشيخ ساجر وخلى المقناص ورجع عن المقناص كله علشانه حاس مزاجه
، ويم رجع خليف لامه سولف عليها باللي صار له مع الشيخ ساجر وتشور امه عليه وقالت له ياوليدي
ياخليف رح وحب راس الشيخ ساجر وتعذر منه
، الوكاد وينصى خليف الشيخ ساجر ويم جاه لقاه شاب ناره ومقلطن دلاله ومزهبن السبيل العظم اللي
يمزون به التتن
، وكان الشيخ ساجر متحرين الفطور لانه بشهر رمضان ، وقاله خليف أنه ماكان بنيته يصير هالشيء وانه
يبي يعتذر وسامحه ساجر
يوم جاء يبي يحب راس ساجر والا هو ياطا على العظم ويكسره وعفره بالتراب وزودن عليها ينشب البشت
بالدلال ويقلبها على النار000 يعني كملت اربع بيوم ياملا القرد اعوذ بالله0
وعقبها ساجر انجن والشيخ ساجر شيخ وولد حموله وماتطلع الكلمة الشينه منه ، الوكاد قال لخليف
ياخليف خذ ماتبي من البل وشد عني تراه ازين لي وازين لك
وضاع على الشيخ ساجر حطاب وخطاف والسبيل ودلاله وعقب ماشد خليف من يمه وهو يقصد الشيخ
ساجرالرفدي قصيدته :
[poem=font="Simplified Arabic,5,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
البارحة يا خليف عزي لحالــــــي=مضيت أن ليلي حزينن ومحتـــــــار
أمرن جرى ماعمر مثله جرالــــــــــي=يا تقل تـوقـد بالـضمـاير لـهـب نـــار
تعوكست ياخليف باول وتالـــــــي=من خلقت البدوان ما مثلها صـــار
من خلقتي ما شفتها بالليالـــــي=اربع مصـايب لوعـنــي مـن الــجــار
الاوله حطاب يسوى عيالــــــــي=اشقر عديمن لابرق الريش نثـــــــار
والثانيه خطاف ماله مثالـــــــي=شـره عـلى تـيـس الجـمـيـلة الى نــــار
والثالثه نثرت غوالي دلالــــــي=وقصرتها وفاحت علي بن وبهـــــار
والرابعة بالعظم تتن الشمالــــي=وافلست منهن عند حزات الافطــــار
لو كان جتني قوم وافنت حلالـــــي =اصبر على مر الليالي والاعــــزار
هذا وأنا مهزابة للرجالــــــي=وياما كسبت من العدا جل وابـــكــار
والعمر يفنا وآخـره للزوالـــــي=والحظ يلقى عند حصات الاوبـــــار[/poem]
وقد قرر ساجر الرفدي الخروج من نجد وماحولها بعد ان علم ان الامام عبدالله الفيصل ال سعود اطلق يد
ابن رشيد ضدهم واصبحوا الاميرين ابن سعود وابن رشيد ضدهم جميع فقرر الرحيل قريب من عرعر شمالا
للابتعاد عن شرورهم فقال:
[poem=font="Simplified Arabic,5,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
الله من عينن تزايد حزنها =والقلب من ضكات الأيام مسمور
من شوفتي دارن تغير وطنها=من عقب ماني داله القلب مسرور
دنوا لي الحمراء ومدوا رسنها=وهاتوا ذلولي وانسفوا فوقها الكور
ياماحلى المسلاف بأول ظعنها=مستجنبــين الخيل يبرالهن خور
يوم إنها نجد وأنا من سكنها=واليوم مايسكن بها كل مــمــرور
شامت لعبدالله وأنا شمت عنها=اللي يصبح به على شقت النور
وأنا أحمد اللي فكني من شطنها=متكيفن مابين عرعر وأبا القور[/poem]
وهنا يربط بعض الاخوه بطريقه الى الان لم تدخل مخي بين قصيدة عبيد بن رشيد اللي يقول فيها:
(يامير انا جيتك مسير وبلاس) وفي روايه ( عساس ) يربطون بينها وبين سبب قصيدة ساجر التي ذكرت
فقصيدة عبيد على وقت الامام فيصل بن تركي ماهي على وقت عبدالله الفيصل00
فمدام القصيده هي السبب فلماذا يقحمون عبدالله الفيصل بالسالفه؟؟
واذا كان رحيل ساجر على وقت عبدالله الفيصل فلماذا يقحمون قصيدة عبيد اللي يكون فات لها حوالي
خمس وعشرين سنه لماذا يقحمونها بالسالفه0000 لانها كماذكرت قالها لفيصل بن تركي وكانت في
بدايات حكم عبدالله الرشيد ايضا المتوفى عام 1262 للهجره تقريبا000
في حين ان الامام فيصل توفي عام 1282 للهجره ولم يطلق يد ولده عبدالله بالتصرف الا في الاربع سنوات
الاخيره من حكمه والتي يكون وقتها عبدالله بن رشيد قد توفي له ثمانية عشر عاما00
والخلاصه انك اما ان تضع السبب قصيدة عبيد وتخرج عبدالله الفيصل من السالفه او تكون على وقت
عبدالله الفيصل وتخرج قصيدة عبيد من السالفه لانهن مايجتمعن وكل وحده عن الثانيه بعيده بوقت00
فقصيدة عبيد هذه ليس لها دخل بموضوع ساجر ابدا وانما يحاول عبيد بن رشيد ان يجعل الامام فيصل بن
تركي لايغضب لمهاجمة عبيد لاهل القصيم وهو ماعناه بقوله:
[poem=font="Simplified Arabic,5,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
مالي ورى وادي عنيزه مطاليب=لاقلت هذا حدكم يزعل الشيخ
ان جاز له قولي فنعمن وترحيب=والا بماتلـــفــظ افــام الصلابيــخ[/poem]
لان عبيد كان يريد حدوده الى وادي عنيزه وهو مايرفضه اهل القصيم0 وهو سبب القصيده وكان يغري
الامام بأهل عنيزه وبريده وليس بساجر ولا ابن مجلاد 000 واذا كان ساجر وابن مجلاد هكالوقت موجودين
بالقصيم فعلا وعلموا انهم سيدخلون ضمن دائرة المشاكل فلماذا يقحمون بعض الرواة عبدالله الفيصل هنا
لانه مايكون موجود بهالوقت00
وهنا رد ابن دهيثم من شمر على ساجر الرفدي بقوله :
[poem=font="Simplified Arabic,5,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
هو ليــه ياساجــــــر تنحيت عنهــــا= هربت منها نايـرن تقـــل مذعــور
حدوك عنها اللـــي وســــاعن طعنهـــا= هوش الطنايا هازعة كل طابور
نجد حموهــــا زوبــــعن مــــع يمنهــا =وعن من يبيها كلنا عنده حضور
يوم ان عبدالله بكفــــــه حضنهــــــــــــا= وغدو معه صبيان شمر تقل ســـــور[/poem]
وهنا ملاحظه كيف يقال انه يقصد ( عبدالله بن رشيد ) وعبدالله لم يحارب كماهو معلوم للجميع وانما كان
عبيد هو اللي يحارب؟؟ لماذا ماقال عبيد ليش عبدالله؟؟ هل فقط لكونه الامير اللي تحت اسم امارته تكون
الحرب؟؟؟
ثم انه يقول ( اللي يصبح به ) وهذا يدل على تكرار الصباحات في حين لانعلم سوى وقعه وحده بين ساجر
وشمر على وقت عبيد وعبدالله وقصيدة ابن دهيثم قال:
[poem=font="Simplified Arabic,5,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
يالله طلبتـك ياحسيـن التدابـيـر=يالواحـد اللـي للعبـاد معبـودي
عدواننا جونا علـى بلجـة الطيـر=يتلون ساجر زبن راعـي البلـودي
زبن العيـاد الجاذيـات المقاصيـر=ان ثار حس الماطلـي كالرعـودي
راعي البويضا ستر بيضٍ غناديـر=رجلٍ بفعـل الطيبـات معـدودي
ساجر شجاعٍ يجمع الشـر والخيـر=وبالمرجله فعلـه تعـدا الحـدودي
قايد جمـوعٍ كالهضـاب المزابيـر=ويتليه جمعٍ مثـل رمـل النفـودي
من يوم صار الهوش عند المضاهير=وطار الحيا عن ناقضات الجعودي
لي عادةٍ نطح الوجيـه المشاهيـر=صيـارمٍ فريـس مثـل الاسـودي
واليا ركبت معسكـرات المساميـر=ارويت حد المرهفـات الحـدودي
ماهي جبانه مـار هـذي مقاديـر=حضه هفى وحنا سعدنـا يـزودي[/poem]
ولا نعلم غيرها فياترى قوله ((اللي يصبح به )) هل تعني التكرار ام انها خوفا من اللي من الممكن ان يصبح
بها دايم لعلنا نتناقش بها مع الاخوه00
وممايدل على ان رحيل ساجر من نجد هو على وقت عبدالله بن رشيد وليس ابن سعود ماذكر ان رحيله
كان بعد قصيدة الشاعر العنزي سليمان التريشاء(نقال هم عنزه) عندما اراد ابن رشيد جمع الابل للاتراك فقال:
[poem=font="Simplified Arabic,5,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
كون جرى بغنيم من شدهة البال =واللي يــعرف الزوم عاف الطعامي
من واحـــــد يقـــــلط لنا تقل نزال =بيـــن الســــموك بحد نقرة ردامـي
يـــــامر عـــلينا ونتبع كل ماقال =يبي الجـــــــــمل والا ردوم السنامي
ادعوا على خيبر وأهلها بالإمحال =تاخذ عن البارق ثمانين عامي
اللي ينظــــــم زملهم بس رجال =وهم كثر سيعان الجراد التهامي [/poem]
ومما يدل على نخوا ساجر وانه قوي الشكيمه عند الحاجه والجد ماياتي 000
ثار المشهور من الروله على سطام ابن شعلان وغصبوه الشيخه واخذوا ( المحمل ) وهو علامة الشيخه
واللي يصير معه المحمل يصير هو الشيخ 0 فهرب سطام بن شعلان وزبن على ساجر علشان يساعده
في ترجيع الاماره وفعلا فعل ساجر حيث غزى المشهور واللي معهم مرات متتاليه حتى قتل منهم العديد
من الرجال واخذ المحمل وسلمه لسطام بن شعلان000
وهو في نشوة الانتصار هجم على ( الاجفر ) بسربه وشال جيش بن رشيد ( ذروات ) المشهوره وذهب
بها بعد ان قتل بعض الرعيان والمسؤلين عن الابل فقال مفتخرا بفعله :
[poem=font="Simplified Arabic,5,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
مزن تزبر عم عرعر وابا القور=سيله على كل المشاريف ضافي
اول خياله صار فوق ابن مشهور=جاهم على وضح النقا مع كشافي
ياما اقبلن باخوات ربدا تقل سور=وياما انتحن باخوات ربدا مقافي
كسيرة فيها احمر الدم منثور=واقــفوا عليهم لابسين الغدافي
وخيل ضبابه وانتحى السيل بحدور=وابن زويمل شاله السيل طافي
فاجاه من فوق الرمك كل مصطور=خيال ذروه يوم هي بالعوافي
غرنا على ذروات ويبرى لهن خور=ويفداك مالك ياربيع الضعافي
غرنا على ذروات مع فجة النور=وتخـــززوهن ناقلين الشلافي
والفاطر اللي عندكم فات له دور=حنت ولاتــالي حنينه عوافي
هذي عــوايد مدبة كل صــابور =قول على فعــل وكاد يشافي
وسطام خليناه يركب على الكور=عقب العنا والكود شاف العوافي
والمركب اللي فوقــه الدل منشور=جانا بضرب مصقلات الرهــافي [/poem]
وهجوم ساجر الجريئ والشجاع كان على وقت امارة محمد العبدالله الرشيد وليست على طلال كما ظن
البعض لان المهاد هاجمه على ((السلمان)) وهزمه واضطر ساجر ان ينتزح اكثر واستعاد ابن رشيد الذروات
وهي اللي قصد بها حسن التبيناوي بقوله في رواية اخينا مبارك طناء التبيناوي التي ذكرها هنا:
[poem=font="Simplified Arabic,5,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
مزنن نشاء عقب الضحى ضاف الأركان=خيالن من المنشاء تناحا رواياء
مزنن بروقه باالدجاء تقل ضيان=رخمن نشت من عاليات البناياء
من راس لينه للخشيبي لفيحان=خيالن تضايق به وسيع الثناياء
وسميتن تنبت مع العشب فقعان=ويحرم على من ذاق نبته شفاياء
مخيلتن هلت على بيت رفدان=ترعد بسمحين الوجيه الطناياء
وآحلوا يومن به خذا الدين ديان=بالفاطر اللي عندكم له حكاياء
كزت حنينه يم طلقين الأيمان=وناداه شيال الحمول الملاياء
باالخيل والحله وشاكم وقطعان=دلالك لزينين المحازم حذاياء
لسهلة شراف ثار عجن وميدان=ليالليل يطردكم عطيب الهواياء
جبنا حديد خليف والبال طربان=لعيون من يلبس جديد الحضاياء
ياما حلاء ياخليف ردن بالأضعان=وركاب كيره فوق جال الركاياء
وياما حلاء ياخليف والبال طربان=وياماحلاء تحذاء عليه الحفاياء
وياما حلاء ياشوق مردوع الأوجان=ردوا على السلمان صيفن رعاياء
وآحلوا ملحتكم على الكبد شملان=متبوعتن ياشوق صاف الثناياء
ياخليف شدوا فوق عدلات الأمتان=رملن لهن قطع الديار الهواياء
كزوا سبور الموت طلقين الأيمان=يبغون عشر عطاف بين القراياء
باأدنى الغطاري طالع السبر دغمان=وسراء على النومه غثيث الحلاياء
بلم كلابه وإنهزم شاف الأوطان=ودرق بربعه عقب هكاالحماياء
ودورك وجب ياعمس الأشوار بوقان=يوم الزمايل مايبدن ضحاياء
حاديك صلوا المصطفق عز الأوطان=أسباب تقطيعك جميع العناياء
جمعت من جرعاء السماوه لحوران=هذي إعمولك ياخبيث السجاياء
سحابتك صارت على راس جدعان=سيله على الفدعان ماينتناياء
سيله ثلاث ألوان جيشن وفرسان=ورجلن ودهمن ناحلات الشباياء
بيومن عبوسن به عجاجن ودخان=غطاء الشنافيه وهاك االصراياء
ثار العجاج العدملي تقل جيلان=لياما كساء الفدعان عج السباياء
وردوا كما ورد المعاطيش غدران=وجملة عيال دهام جيبت حضاياء
ياسين منها ياقليلين الأضعان=هذي إعلوم دغيمن والحكاياء
أقفى حمول الخيل طلقن الأرسان=غصبن وخلوا راكبات الحناياء
نسوان أخو قطنه تقل وصف غزلان=ينخنكم باالصوت ياأهل الحماياء
ردّن بوجه الشيخ فراق الأقران=شيخن يحمل معورجات الجناياء
شيخن فرق بنت إبن ملحم وجدعان=وبنت الغبيني مثل عنز الشغاياء
سبحان من حط المهاء فوق قعدان=وأذراهن اللي ماتجيه المناياء
بيومن يهيل المنتضر كل الألوان=شبعن به العقبان هن والحداياء
وشبعوا على الديره وشمر وضفران=وشبع به اللي قاعدن بالقراياء
وأوقد بعمدانن على دور عرنان=جردن ومن طول الليالي تناياء
وكونن جراء ياخليف ماجاء بالأكوان=من ركبت الحكام فوق المطاياء
أعطاء المجره والعساكر والأوطان=وأعطاء الضفيري ياقلوب العماياء
ياما فرق به من خليلن وخلان=محمد زبون الجاذيات الوناياء
محمد زبون اللي على العمر شفقان=في ساعتن به مثل مل الشواياء
ذعار السباياء وإن تعاقبن الأيمان=ليا أطلّعن رقراق العجاج السراياء
بك من عرار وفعل أبو زيد نيشان=أشقر بك أوصاف القبايل تعاياء
ياالمصطفق ماأدري على أيات الألحان=أنت المحير اللي يلم الشغاياء
يالمصطفق خلف السباياء باالأطعان=يااللي لك الجرد الأصايل عطاياء
نامت عيون أمواتنا والسلف بان=ولهودنا اللي ماضياتن براياء
جمعت كون اللي لهدنا باالأقران=لعشرين جمعن ماعليهم دعاياء
أو دعت نثر عظامهم شت نجران=إلا الحشر مايفلحون التلاياء
يادرتن تغني القبايل باالأثمان=ياجوهرن يسقي الكبود الضماياء [/poem]
وكذلك رد راشد بن عمرو البقعاوي رحمه الله قائلا في الرد على ساجر وعلى نفس قافه :
[poem=font="Simplified Arabic,5,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
ياراكبن من عندنا فوق مذعــور=وقـــم الربــاع مزينـــن بالــعــسافي
مافوقه الا المزهبة هي ويا الكور=ودويــرعن من فوق الامتان ضافي
ياراكبه دزه اليابيــت ساجـــور=قل له تنـــبه كانــت بالـــنوم غــافي
صدقن عديتوا بين عرعر وابالقور=مــع الغــتار مدلبحن ماتشــافي
وتذكر لنا خذيت ذود من الخور=جن من عمامك يالشجاع السنافي
ماهن حلال الشيخ ياتايه الشور=حلالهم حدب السيوف الرهافي
حلالهم غوش السناعيس وحيور=مقيمات ماترحل وساع الخوافي
اللي نماهن للمسايير منثور=زودن على اللي قلطوا بالصحافي
ياقرد عينك يوم ساروا من السور=من فوق حمر الجيش قطمن خفافي
عدوهم لو هــو ورى يمــة الهور=مايهتني في لذة النــوم غافي
سحابتن جتكم على فجة النور=سيله عليكم يالعمارات ضافي
ترعد وتبرق فوقــكم قيمة الدور=خلت عمدكم ضعيتها السوافي
دلا بردها والزبـــد يصعــد القـــور=واللي تواكم سيلها مايشافي
ياما خذت من عين ذودن ومظهور=وياما غدى في سيلها من سنافي
عشبه عيافن بس للسبع وطيور=ولغير الحوايم نبت عشبه عــيافي
على الركايا خلت النزل مزبور=وهدمن بيوت مرفعين الرفافي
ياوين قولك مؤدبة كل صابور=عن حروة الصابور عطيت قافي
يوم طالعوا بيتك تغازوه دعثور=معهم سيوف الهند زرقن خفافي
كلام شمر يالله اليوم ساجور=مامنهم اللي من فعولك يخافي
رحتوا كماصيدن من الرمي مذعور=منكم كسبنا لابسات العطافي
هذا قضى ذروات ياتايه الشور=فضية منازلكم ورحتوا مقافي
وقدام بيتك يرقص العبد صنقور=بين العمد يرقص على كل قافي
دين الضياغم ماهو دين ابن مشهور=عادات شمر تعطي الدين وافي
ولاشمر الفدعان تصبر على الجور=ايضا ولا منك الطنايا تخافي
رحتوا كماسيلن تقفاه حادور=من مدلهمن تالي الليل ضافي
من بيرقن يطرخ على فجة النور=يودع صماصيم القبايل ضعافي
دلا يزير الزير والجمع مزبور=واللي ورى الوديان منهم يخافي
يامغذي الجذيان يامصلفح الثور=خمك شطنها واعتلاك الهرافي
والله لاعسفك عسف اهل فيد للثور=وياحلو راس مطاوعن بالعسافي[/poem]
هذي القصايد الثلاث المشهوره بشيلة ذروات الشهيره وهن قصايد ساجر وحسن التبيناوي وراشد بن
عمرو البقعاوي 000
واما وقعة (ام رضمه ) بين ساجر وابن علي شيخ عبده فقد احجمت عن ذكرها عمدا لاسباب عندي منها
ان بعض ضعاف النفوس قام بالتحريف بقصيدة اليمني شاعر ساجر الرفدي المشهور والتي منها:
[poem=font="Simplified Arabic,5,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
حـطــاب هـــام يـــم طـلعـة جذبـنـا=طير الحبـاري لأبـرق الريـش عفّـار
شفـنـا و أغـرنـا فوقـهـن و أنتسـفـنـا=وشالن أبن لامـي علـى الوجـه عبّـار[/poem]
وذلك لان اي خبير بالشعر يعلم ان الابيات التي زيدت ليست متطابقه مع القصيده حتى بالقاف لانها على
حرف الباء والنون(ركبنا) والابيات اللي زيدت احيانا على التاء قبل النون واحيانا غيرها وذلك لكون اللي حرفها
فوق كونه كذوب صار غبي جدا ومايفهم بالشعر والشعراء خاصة الفحول منهم مثل اليمني ومن رجع الى
القصيده سيجد انها كلها على الباء والنون ماعدا خمس وهي اللي زيدت والكذوب لازم يكشفه ربي0
وعنما كبر ساجر بالسن بعد عمر من الجهد والمغازي والانتصارات والتعب والاخذ والعطاء شعر انه ضعف
وان الدنيا ليست كما كانت سابقا ايام الشباب والقوه فشبهها بالبنت التي تعاف الرجل اذا كبر بالسن
وماتبي الشايب فقال:
[poem=font="Simplified Arabic,5,black,bold,normal" bkcolor="transparent" bkimage="backgrounds/27.gif" border="ridge,6,orange" type=2 line=0 align=center use=sp num="0,black"]
عيني قزت عن نومها واسهرتنــــــي=ماهي مريضة مار بالقلب ولـــــوال
واحسرتي من عشقتي عايفتنــــــــي=وشامت ونسيت ما مضى لي بالافعال
تعطرت يوم انها باغـيـتـنــــــــــي=واليوم ماحـطـت علومي على البـــــال
وقرونها جـرد السبـايا تلـتنـــــــي=وعـطـورهـا دم النـشـاما ليــا ســــــال
عاهـدتها بالله وهـي عاهـدتنـــــــي=واليوم اشـوف افعـولها اقـفاي واقبال
دنياي بحـمـول العـنا ضاهـدتنـــــــي=والكبر يرث بالرجل كل غربــــــال
من مـدهـا بالـجـود يامـا عـطـتنـــي=ويامـا ركبنا فوق عجـــــلات الازوال
وياما على طيب الفعايل هـدتنـــــي=وخـليت عـيرات النـضا تهـذل اهــذال
نمشي على ما كاد لو ساعفتنــــــي=وان عـاضبت نـذكـر بـهـا زيـن الامثـال
وكم سربـتـن نجـرها تابعتنــــــــــي =وخليت غارتها على القوم تنهــــال
والله لخوض بحورها لو عصتنــــــي=ما دام جسمي باقي ما بعـــــد زال
مالي حسايف كانها خالفتنــــــــي=للي يخـلـط الـخيـر والـشر عـمـــــــال[/poem]
هذه فقط رؤوس اقلام لتكون مفتاح للحديث والحوار المفيد بين الاعضاء 0 ورحم الله ساجر فقد كان رمزا
من رموز نجد فترة من الزمن بالرغم ان خصومه كانوا في اقوى قوتهم في وقته لكنه حفر اسمه بينهم000
رد مع اقتباس
المشاركة الأصلية كتبت بواسطة راعي المغاتير
المفضلات