[ دستور المضيف الرياضي + إستفسارات + شكاوي + إقتراحات ]
[align=right][ شروط عامّه قبل كتابة اي موضوع ]
[align=right]- يمنع منعا باتا التعدي على الدين الإسلامي الحنيف أو الإساءة للرسول صلى الله عليه وسلم وعلى علماء الدين .
- يمنع استخدام الألفاظ المخالفة للشرع و التي تخدش الحياء العام وتتعدى حدود الأدب .
- يمنع نشر عناوين أو وصلات وروابط لمواقع [ إلاّ بعد اخذ الموافقه من المشرف العام ] أو صور أو رسائل خاصة لا تتناسب مع الآداب العامة .
- الإلتزام بتعاليم الشريعة الاسلامية ومنهج اهل السنة والجماعة في جميع مواضيع الموقع .
- عدم طرح المواضيع التخريبيه من فيروسات او باتشات او برامج تخص تخطي البروكسي .
- ماتم ذكره اعلاه ليس حصرا شاملا لنهج وسياسة المضايف ، بل يوجد شرح مفصل لذلك [ سياسة و نهج المضايف ] .[/align][/align]
.
- اخواني , اخواتي اعضاء مضايف شمر , هنا راح نتبع نظام و سياسة و قوانين كتابة المواضيع و الردود في المضيف الرياضي , والشي اللي ماله نظام ماله سنع . . لكن حطينا هـ الشروط ويجب ان الكل يتقيد بها ولا تقولون مادرينا وإلا وراك سويت كذا . .
: شروط و قوانين المضيف الرياضي :
- اهم نقطه يجب ان الجميع يعرف ان المتواجدين بالمضيف الرياضي من خلال مشاركاتهم و مواضيعهم , كلهم سواسية ومافي فرق بينهم بالمضيف الرياضي , والمجامله ماراح تكون موجوده بإذن الله عندنا هنا , يعني لايلحق حديكم شك ويقول فلان يتثبت موضوعه وفلان يتقفل موضوعه , ان شاء الله هـ الحزازيات ماراح نشوفها و لا راح نطريها والله يخلينا لبعض ولا يفرق بيننا ولا يجيب لنا المشاكل ابد ابد . . . !!
- المواضيع اللي من سطر و سطرين و ثلاث مكانها مهوب هنا و ياليت الكل يتعاون بـ الرياضه و نبي الناتج يطلع إبداع عضو , مهوب موضوع نسخ و لصق مصيره لـ القرشعه والله لايقولها , وتكرمون عن سلة المحذوفات ونبي ابداع ونبي مقالات من افكاركم و كتاباتكم
- سالفة منهو اطلق ماجد او سامي . . او من احسن النصر او الهلال , او من ازين نواف او الحقباني
هـ السالفه ماابيها هنا , لانها تسبب مشاكل بين الاعضاء , و محد يرضى يقتنع وكلن يقدم العاطفه على الإنجازات , و من باب : الباب اللي يجي منه ريح سده واستريح , تمنع المقارنات بـ أي شكل من الأشكال .
- تبي تكتب مواضيع محد مانعك ولا احد يقدر يمنعك اصلاً , لكن شف نوعية الموضوع الطيب و اكتبه , وياليت كتابتوه تكون بـ طريقتك مهوب نسخ و لصق وخلاص , واذا فيه خبرين لـ فريقين بدوري واحد , يعني : لو النصر جاب رونالدو و الهلال جاب زيدان , وبك شده تنزل هـ الخبر عندنا , نزله بموضوع واحد مهوب تنزل رونالدو بموضوع و زيدان بموضوع , تقدر تحط هالعنوان وليكن على سبيل المثال : ( النصر يتعاقد مع رونالدو , والهلال يرد عليه بـ زيدان ) .
- مواضيع عام الف واربعمية وحطبه مانبيها , من يفوز بالدوري ؟ من يفوز بـ هداف الدوري . . اللي تحس ان مالها سنع احشم نفسك عن القفل ياملّي .
- بـ الصفحه الرئيسية لـ المضايف جزا الله ابو سلطان خير , حاط ايه و اذكركم بـ الايه // ( ياأَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ)
يجب علينا جميعاً عدم التفرقه بين الجمهور الفلاني و الجمهور الاخر , و نبذ التعصب مهما كان , لان السالفه كلها في كوره , وماتسوى تشوّه سمعتك بـ لفظ تجرح فيه اخوك المسلم , وبخصوص جماهير الانديه ياليت ان الكل ينتبه لما يذب على موضوع معين و رد معين محد يمنعه , لكن الذبه اللي فيها مصاله و تحريف بـ الأسماء راح تحذف مشاركته اولاً و إذا كررها يمنح انذار , وضربتين بالراس توجع , واذا مااوجعه راسه و كررها ثالث مره , اكا الحين نقدم المعامله لـ ابو سلطان لـ إتخاذ مايراه مناسباً تجاه هذا العربجي . . النثر , الزعيق , تشاد , نيجيريا , الهلام , النيفيا , الطواقي , العربيات . . معروفه الكلمات اللي مالها داعي ياليت تتجنبها طال عمرك لـ مصلحتك اولاً و لـ مصلحتك ثانياً . . !!
- مواضيع التصويت و التوقعات و الترشيحات ممنوعه و اذا تسبدك تفرك ع الموضوع وتبي تنزله راسل المشرف واذا الامر يستدعي ان الموضوع ينزل كـ حاله استثنائيه لـ قضيه معينه . . لاحظوا مانجامل عضو معين . . ومانسمح له بـ شي و هـ الشي نمنعه ع الاخرين , اقصد اذا كانت قضيه في الاتحاد السعودي لكرة القدم من إخلال بـ العقود , اختلاف في وجهات النظر , فترات تسجيل اللاعبين , قرارات ظالمه , ايقافات متعمده , عفو متكرر . . هالمواضيع يتم التنسيق بين المشرف على المضيف و بين العضو قبل ينزل الموضوع وبإذن الله مايصير الا اللي فيه خير .
- موضوع مكانه بالصحفه الخامسه و الاربعين , ممنوعه رفعه , وطالما ان الموضوع احذ حقه من الردود وجت مواضيع اخرى غطت عليه , خلاص ياليت مانشوف مواضيع قديمه حيل بالصفحه الاولى بعد مرور شهر مثلاً على طرحه و مناقشته .
- المواضيع اللي مالها مصدر , يعني شلخه و بنفس الوقت يقول انه حصري , لازم يجيب مصدره وإلا مصيره لـ الإغلاق . ( مقابله مع لاعب , تصريح إداري , سبق حصري ) .
- راح تشوفون موضوع فوق مثبت لـ الطلبات و الإستفسارات , يعني ماسكه معك ذاك اليوم متابعة
اهداف ماجد الـ 21 بالهلال, تدخل الموضوع و تطلب اللي تبي وراح تشوف طلبك منفّذ بأسرع وقت .
- راح تشوفون موضوع فوق مثبت لـ مكتبة الاهداف و الفيديو , و راح يتم تحديث العنوان بعد كل اضافه , يعني الاهداف اللي تكون فيه حقت الدوريات السنه ذي بس , والمباريات اللي تصير و يحصل لنا تسجيلها .
- حاجه مهمه الكل ينتبه لها ولاتهايط لو انحذف موضوعك او تقفل او علمّت عليك ابو سلطان ونتفك , تسوي تغطيه لـ مباراه معينه ماعندنا اي مانع و نشكرك ع التغطيه و نكافئك و نشجعك , لكن انتبه تتضمن تغطيتك صور حريم , وإلا أغاني وحتى الاغاني اللي بالمنتخب والانديه لا تحطها , هالشي سلمك الله مافيه إلا زيادة سئيات عليك وكل من شاف صورت الحرمه اللي حطيتها زاد عداّد السيئات عندك وهالشي ماودنا انه يصير بكل اقسام المضايف والله يوفق ابو سلطان ويجزاه خير على اتخاذ و تعميم هـ الخطوه .
- سالفة انك تنزل موضوع او ترد على استفسار اخر او ترد على موضوع معين , منيب مانعك او معيي عليك لكن لاتنزل موضوع يتضمن روابط لمواقع اخرى إلا بعد مايوافق المشرف العام على طلبك , وقتها بكيفك عاد .
- الصور ياليت انك قبل تنزلها هنا تسيّر على مركز تحميل الصور حق المضايف وتحملها هناك وتجيبها , هالحركه بس من باب لك و للزمن , يعني لاصرنا اجداد ان شاء الله نجي نشيّك ع الموضوع حقك ونلقى الصور موحوده مهيب مفقوده , سيّر على مركز التحميل من هنا .
,
" المضيف الرياضي "
بتعاون الجميع راح نكون مميزين و هـ التميز يحسب لـ الشبكه اولاً و اخيراً , راح نعتمد إن شاء الله الصدق في مواضيعنا , والأفضليه في تغطياتنا , و الحياد و العدل في ردودنا و بإستطاعتنا لو تعاون الكل مع بعض إننا نشطب و نزيل التعصب من مضايف شمر , والحمد لله كلنا قادرين على هـ الخطوه . .
رد مع اقتباس
ماتسنه طوله 
انت بس قل 
المشاركة الأصلية كتبت بواسطة بسمة العز
المفضلات