المرور يستهدف طلاب كلية المعلمين

[خالد الخالد]

بسم الله الرحمن الرحيم

السلام عليكم ورحمة الله وبركاته

المرور طبعا الجميع يعرف عمل المرور وكل واحد منا اول ما يشوف دورية المرور أقرب مخرج عشان ما يصرف

له مخالفة ... واللي يعرف واحد بالمرور ولو انه جندي وين راسه ما يوقف عند الاشارات بس أحيانا الواسطه ما تنفع

مع بعض العسكر كفانا شرهم يجيك الواحد راسه يابس وكنه واقف وراك يتحراك تسوي شي مخالف عشان يلزق المخالفه

على جبهتك ... موضوع اليوم بصراحه يمكن اول مره يصير بالمملكه لكن هذا اللي صار قدام عيوني وجيت اسرده عليكم

راح ادخل بالموضوع على طول .... طبعا الجميع يعرف مدينة عرعر ... أو يسمع عنها ... عرعر هذه تقع شمال المملكه

يعني بالعربي عاصمة الشمال (أمحق عاصمه) عرعر هذه فيها كلية المعلمين وتقع هذه الكليه 15كم تقريبا شرق عرعر

على طريق( رفحاء – حفر الباطن ) المهم الظاهر انا طولتها وهي قصيره .... طبعا كلنا نواجه مشاكل وحنا رايحين

للدوام .... اشارات ... مطبات .... زحمة سير .... سبع الاف بوري اول ما تفتح الاشاره .... وغيره وغيره .....

المرور جزاهم الله خير حاطين على طريق الكلية اللي هو خارج عرعر نقطة تفتيش لا مو بس نقطة حاطين رادار

الظاهر لقوا الرزق من ورا هالطريق .... طبعا طلاب الكلية المساكين يجيك الواحد يمشي

مليووووووووووووون عشان بس يلحق على محاظرته وما ينزله حرمان .... لكن نسى انه فريسه سهلة لحبايبنا

المرور وعلى طول بدون مقدمات وقف على جنب ولا يراعي ظروفك ولا يهمه ان كنت مستعجل والا لا اهم شي

يخلص هالدفتر اللي معه ويحصل له يومين اجازه على حساب هالمساكين الطلاب ..... والمصيبه ان استهداف

المرور للطلاب متعمد ... لانهم ما هم حاطين لوحة ( الطريق مراقب بالرادار) ويجيك الطالب على نياته مايدري

ويطيح بشباك المرور المشكله انهم حاطين السرعه القصوى ( 100كم) 1001 على طول مخالفه ما عندهم .

الامر الللي ابي اوصله ليش الظلم هذا.. ليش الطلاب بالذات هم يلقونها منين والا منين ... بعض الطلاب يادوب

يدفع الاجار اللي عليه تبع الشقه من غير الاكل وغسيل الملابس وطلبات الكلية اللي ماتخلص.. علما ان المراجع

لازم يشريها الطالب (ماشين على نظام الثانوي ) اللي ما يجيب المذكره ما يحضر .... طبعا المذكره هذه من اللي

مسويها ... (دكتور الماده ) وهو المستفيد وشف الاستغلال بعينه ..... وشف كم طالب راح يشتريها ... طالب يقولي

والله العظيم ان بعض المذكرات اللي اشتريها ما أفتحها ..... ولا أستفيد منها ... يجي الدكتور ويقول أكتبوا وراي

المعلومات هذه ماهي موجوده بالمذكره ... شف التناقض .... المهم ما علينا من الكليه هي حدها سالفه لحالها..

خلنا بسالفة المرور شرايكم بالله برجال المرور ... ياخي أقسم بالله العظيم ولا واحد من العسكر ذولا يرضاها

لنفسه والا لاحد من اخوانه والا احد أقاربه .... الله يعينهم على الدعاوي اللي بتجيهم من الطلاب وغيرهم من

المسافرين ... (خوش ضيافه ) المهم أترك لكم الرأي في هذا الموضوع وأبي أعرف هل رجال المرور على

حق من اللي قاعدين يسوونه.... مابي أطول عليكم أكثر من كذا أهم شي اني وصلت اللي شفته والاستهداف

الغير مشروع لطلاب كلية المعلمين بعرعر

تقبلوا تحياتي

خالد الخالد

[ريم شمر]

حسب مانشوف ان هالشي يحصل مو بس بعرعر ومو مع الطلاب فقط

بل باغلب الطرق السريعه

ودائما يتفاجأ السائق بسيارة المرور مختفيه


عموما ان كان الهدف الحد من السرعه فالله يجزاهم خير

وان كان الهدف الاستفاده من ورا هالمخالفات الله لايبارك لهم فيها


تسلم وشكرا لك

[بالمختصر..]

الظاهر عرفوا من أين تؤكل الكتف ..!!


بس المفروض انكم خلاص عرفتوا لهم ..

يعني روحوا بدري شوي ..

عشآن ماتضطرون للسرعه وبعدها يخالفونكم


.


لفت نظري كلامك عن المراجع ومذكرات الأساتذه

عندنا وعندكم خير

الله يعين بس .. ماندري وش نذاكر !!




.
.

[قهر]

[align=center]تستاهلون ... من قال لكم سجلوا في كلية عرعر

أنا أصالة عن نفسي و نيابة عن سيارتي

ما عندنا إلا محاضرة وحده وبس .. لا و الظهر بعد

يعني أملك يحصلون مني يوم .. قصدي ريال

و بعدين ترى فيه طريق صحراوي قبل النقطة (مفرق شركة الكهرب)

و للمعلومية ترى الرادار قدام المستشفى و تحديداً عند الجسر الجديد

فإنت إذا وصلت للمستشفى هد السرعة

و بعدين أبي أبشرك ابو شلبي مغطوه مخالفة (دكتور عندنا)

و بالنسبة للمذكرات شف الدرج اللي تحت المغسلة ترى فيه

كرتون مليان مذكرات خذ اللي تبي و بعد الدرج اللي مقابل الثلاجة

فيه مذكرات لليل و بعد شف غرفة ابو سعود ترى فيها كم مذكرة


سلامي للبشمرقة كلهم و خصوصاً عبدالباطن[/align]

[خالد الخالد]

هههههههههههههههه

قهر الظاهر أنك فاهم اشغله

أو أنك متعاون مع أحد هالعسكر

وياخوفي لا يكون أنت صاحب الرادار

وبعدين فيه أحد يحط مذكرات بالمطبخ

شكلكم ما تذاكرون تطبخون المذكره وتاكلونها

مستودع مذكرات مو سكن

سلامي

[تأبط خيرآ]

السلام عليكم

اخي الكريم موضوعك مهم وهنا ليس المهم النظام المهم كيف تملأ الخزينه

وكأن الدوله أعزها الله فقيره ؟؟!!

هذه تراكمات ثقافيه بين المسؤولين ان الذي يصرف جيدآ ويعيد عوائد على الخزينه اكثر هو الاجدر بالكرسي

وهم مساكين لا يعلمون انه الاجدر بالاثم - اذا اخذه بغير حق -

اخي الكريم ان من قواعد هندسة النقل والمرور العالميه( أقولها عن علم ودراية) هي وضع لوحة ارشاديه لتحديد السرعه القصوى - ولو كنت في بلد ((( نظامي))) للقوانين سلطه وهيبه فيه كان اشتكيت جندي المرور لدى الجهات المختصه لكي يدفع لك اضعاف اضعاف ما دفعت له جراء هذه الغرامة التعسفيه

اذا كان ممنوع الوقوف يجب وضع لوحة ممنوع الوقوف قبل ان يحاسب المخالف - وكذلك السرعه وما الى ذلك
وما ذنبي انا وانت اذ نعاقب على ما لم نعلم انه مخالفه

ولكن قد أسمعت اذ ناديت حيآ ولكن لاااااااااااااااااااااا حياة لمن تنادي

يا اخي والله اننا نعيش خبط عشواء لا نظام ولا قوانين والواسطه فوق النظام بل الواسطة تصنع النظام كما تريد ليتهم اذ زاروا ضواحي لندن تعلموا من النظام الذي فيها ونقلوه الينا -

حسبنا الله ونعم الوكيل

ولا يزال لدينا بصيص من الامل في انفسنا و كبير الامل بالله تعالى
تحياتي

[ابو راكــــــــان]

السلام عليكم


والله يا اخوان انا من الاشخاص الي احيانن


انزعج من المرور ولكن اذا جاء الصحيح مانقدر

نلومهم لان بعض اخواننا مايعرف شنو معنى القياده

يفكرانه بانزين وبريك ويمكن مايكون فيه بريك ......يستلم القير

برد النمره.............خخخخخخخخخخخخخخخخ

واحيانن نقول ان المرور ماخذين الدعوه لعب على كل من لا يعجبهم

واذا اشتهى يعطيك مخالفه يقولك ..........................................؟

وين الرخص؟......يحصل الرخصه جديده خخخخخخخخخخ انقهر العسكري

وين الاستماره ؟.......الاستماره جديده خخخخخخخخخخ مات من القهر

ليش منت رابط الحزام؟... يحصلك رابطه خخخخخخخخخخ يموت المسكين

اخر شي يبي يعطيك مخالفه وما يدري وشلون يقوم يفر على السياره

مايلقى شي

عاد يبداء اسلوب النذاله يقولك ليش منت لبس طاقيه............خخخخخخخخخخ

وشكرا

[سلمان النبهان]

اهلا بخالد حياك الله ورجال المرور معهم حق وهذا واجبهم يالغالي
الحد من السرعة القضاء على المخالفات المرورية
وقد يكون هناك مكافات اجازة لمن يعطي مخالفات اكثر وهذا صحيح
وهو من باب التشجيع لرجال المرور الذين يتساهلون مع الناس
حيث ان اغلب رجال المرور لازم تشجيع حتى يقوم بعمله ...
ولكن اولا واخيرا معهم حق وهم للحفاظ على حياة المواطنين
فما ذنب عائلة تسير بكل نظام ثم ياتيها طالب كليه يمشي الفين
ويقلب حياتهم دماء واشلاء وصياح وعويل ....
ويدخل اطفالهم المقبرة ورب اسرتهم سرير العجز وامهم العناية المركزة
وباقي العائلة ايتام طول حياتهم ..
على ان عنده محاضرة وخايف يحرم الترم اذا تاخر
اقول عاد يبي يتخرج دكتور في علم الذرة الاخ والا مستشار نووي
هو مفروض اي طالب ياخذ 3 مخالفات مرورية يطرد تلقائي من الكلية او الجامعة
عموما تسلم على طرح الموضوع يالغالي واسمح لي بهذه الصراحة ..

[خالد الخالد]

الشكر كل الشكر للجميع

على قراءة الموضوع والرد بكل صراحه

أشكرك أخوي تأبط على الرد الجميل

أيضا أشكرك سلمان النبهان على الصراحه الجميله

تقبلوا تحياتي