[align=center]
بسم الله الرحمن الرحيم
بعد السسسسلام ،،، حياكم الله اخواني واخواتي
مابي اطول عليكم بالموضوع وهذي قصة متعب بن عبدالله آل رشيد وغادان بن مهلهل المخلفي الحربي ــــــ> راعي النحيتيه .
يقولون أن متعب العبدلله آل رشيد طالعن ناس قالوا (( غزو )) وناس قالوا (( قنص)) وكثر الشيبان اللي قالولي القصه اجمعوا علي انوه غزاي ،، وان الرجال اللي طلعوا معه ماهم واجد الوكااد انهم ما يتعدون العشرين رجل (( هذا ولله اعلم )) . وهو بمغزاوه تصاوب متعب آل رشيد ويامار اقرب ماله (( النحيتيه )) وصلوا خوايه لنحيتيه وهو ينزل عند غادان بن مهلهل الحربي وهو يضيفه ويكرمه ويعالج صواب متعب آل شيد . خذي له فتره متعب علي هالحله عند غادان الحربي لين طابت جروحه وعرف انه يقدر يركب الفرس وينكس لهله بحائل ، وهو يستأذن من ابن مهلهل الحربي ويشكره علي طيبه وعمله معه .
مشي متعب وجهه لحائل ولا ابعد بالحيل عن النحيتيه ، وهو يصادف أخوه طلال آل الرشيد بالطريق يامار طلال معه فريس ورجال واجد ، سلموا علي بعض وقال متعب لطلال منين انت جاي وين تبي هالحين رد عليه طلال قال أنا غزاي وخالص من المغزي بس عقب ما عقبنا (( النحيتيه )) نكسنت ابي الحروب ،، بوجهي أبي أغزيهم وبي انكس لحايل .
عيا متعب علي طلال وقاله ما تغزيهم ولاتنكسلهم بزعل ،،، هو يقول طلال بزعل ما نكست علي الحروب إلا ابي أغزيهم ولا أناكس لحائل إلا بحلالهم .
وهو يقمز متعب زعلان وقال لطلال :
ولله ما ينشق جيب معزباتي ... ملحتهم ببطني ... وأن عزمت علي غزومه يا طلال ترن ولله لذبح روحي وأنت تشوف ،،،
بعد قول متعب هون طلال عن غزو الحروب ،،، ونكسوا لحائل هو ومتعب
وقال /// مخلف بن ابراهيم بن هديرس الشمري
قال أبــو بندر يا عميـــــس الــدلايل *** يوم أن كل مشوربن تاهت رياه
قال أخــو رثعه لازمي كــل عــــايل *** ومعــزبــاتي ما يكشــــف مغطاه
تقابلــــوا مثــل الفحـــول الشوايــل *** هذا يبي يــدلي وهــــذاك ينـــهاه
متعب يقـــول الزود عندي قــــلايل *** ولا خير في مطعوم اللوم يقضاه
ميقن أن غـــــادان يقــع بالحبــايل *** ولا أيقنت ان المراسيـــل تلــــقاه
أشوفهـــم أعــدي جميــع القبـــايل *** مار أن ملحتهم ببطني ولا أقواه
والحكم لك صدق صحيحن صمايل *** والوجه شبر كيف وجهي تخطاه
أنت وأنا مــن صلب وأف الفعـايل *** وما ريت في نفسك فني مثلك أراه
هذي اللي أحفظه من قصيدة مخلف الشمري و سلامتكم
أخواني اللي له أي تعليق او توضيح بهالقصه أو القصيده كامله لا يحرمنا مشاركته
هذا والسلام عليكم روحمه الله وبركاته [/align]
رد مع اقتباس
المفضلات