تمـر جيراننا حلو وسكر ..تصدقون .؟؟ (من سوالف عجايب الفجريه )...^!^
[align=center]
سلام عليهم قميعاً ..قمعاً وقماعات
>> وش هي ياخاله ؟
لا بس تجيك حالات تعجب بكلامك قبل ماتقوله ..
مدري عاد هو خبال ولا ردات حظ
الوكاد
ياعرب
تصدقون ان تمر جيراننا حلو ؟
تصدقون ان طعمه حلو طعم سكر ؟
انا بصراحه اكتشفت هذا الشي من يوم وانا وغيده وقبلها يوم انا شباب
كانت امي كل يوم تنصح و تصيح على روسنا
التمر مفيد
التمر زين
واكل الرسول والصحابه من قبل
خلوا عنكم هالخرابيط
وحنا نطالعها ناقدين عليها يوم تقول عن غندور خرابيط
هذا غندور اطلق من 34399 نخله ونخله
مابين تمر ورطب وبقل بعد
يمه وش فيك ماتعرفين انتي ؟
يعني ولا همنا كلام النصح والصحه والتغذيه المفيده
طبعاً مو بس التمر .. يشمل كذلك
الفواكه والخضره والخبز والجبن مع الحليب
تصدقون عاد ولا تحلفوني
اني اذكر اني اذا كليت برتقال ولا تفاح عورني بطني ..
عكس العالم الصاحيه اللي لاكلوا من هالوجبات السريعه عورتهم بطونهم ..
عاد وش نسوي ..
الوكــــــــاد
جيراننا لاجت عندهم عزيمه ولا قالوا لنا تعالوا الاجتماع عندنا القايله
وحطوا لنا ذيك المقدعه
اللي متروستن تمر
وتقعد ناكل ناكل ناكل ناكل لحد ما ننبعـج
تقل مافي بيتنا تمـــر ولا قد شفناه بحياتنا
و أمي تقول : فشلتونا فضحتونا في العالم تقل مجاعه
تصدقون حتى التفاح والبرتقال عندهم غير ... عن اللي بثلاجتنا
\
/
\
/
تطورت الحاله لدى بناتنا وعيالنا ..
وتجاوزت التمر والعيشه بكافة انواعها
الى البشـــــــر والمخلوقات الناطقه
فتلقى .. بناتنا لا قالوا فلان (ولد جيرانهم)
قامت تمدح فيه وفيه ومزيون ومؤدب وموظف وشهادة
واذا راعيت لولد عمها الا ياهو يشق من مافيه من صفات تهول
واطلق من ولد جيرانها بــ 6859 فشقه ورصاصه
والوحده لا خطبت من جماعتها
تقل زايمتن تسبدها
ولا خطبت من اردى منه من عائله بعيده
مابقى صلبي ولا عربي لا عرفوا انها خطبت له
( دلاله على انهم حتى بخطبة الأجنبي ينذخون )
\
/
\
والله هالعالم ودك تسطرها .. بس كيف ؟؟ ماتدري ..
فاهمين الحياة بمناظير ابو ريالين ودرابيل ابو عشره
أفهموا ياعالم .. صححوا الرؤيه
أمس بالأسري يحتسون ويقولون
)) فشل الزواج من الأقارب ((
يامل العقارب
هاللحين ابوي وجدي وجدهم وحريمهم ماهم اقارب ؟
يعني زواجهم فشل ؟
يعني انتجوا فشل
بالعربي
حنا فشل ؟
اي والله صحيح
دام تمر جيراننا طعمه حلو عز الله اننا فشل بكبره
مير عاد تدرون اننا خايفين من مباراتنا مع اليابان
يازين تمر اليابان ياعرب
عاد هاللحين صحيح
لو تفحطون
تمركم ماهو مثل تمر اليابان
تصدقون ولا تحلفوني
ان تمر اليابان اذا كليت تمره الكترونياً الفصم ( النوى)
يطلع من التمره من بطنك على طول
يعني لا تخاف لو اكلت النوى ببطنك وان ماتدري
وعلى طاري اليابان
طرى علي الصين
هاللحين كل شيء بحياتنا made in china ؟؟
خير ان شاء الله ؟
تصدقون حتى المقص بو ريال made in china
هاللحين عجزانين
تجيبون حديديتين وتربطونهن من النص بمسمار ؟
والله من الزواله عندكم يالعرب
يقول أبوي في كلمته الشهيرة وعاد بيجي يوم اذكركم فيها :
يقول :
(( سياتي على العرب يوم يستأجرون من يلقمهم العيشه ))
مير انا كلي امل وتفائل . ..
أن ترجع ايام الثمانينيات
وتختفي البرمودات
عن الأسواق
وتعود البراقع والصقور
لذا انبهكم ونفسي على التالي:
تحت شعار ( حتى لا ننسى )
==
[poem=font="Simplified Arabic,4,orange,bold,normal" bkcolor="transparent" bkimage="" border="none,4,gray" type=0 line=1 align=center use=ex num="0,black"]
لا تقل : مرحبا واهلاً = بل قل : أرحب والله حيوه
لا تقل : صديقي ورفيقي وعزيزي .. الخ = بل قل : سنايدي وعضيدي
لاتقل : واجهه = بل قل : وجهيه
لاتقل : ياساتر ياربي = بل قل : يادافع البـلا مع هالحركه >>
لاتقل : أبقى مع صديقك = بل قل : ألـزم خويك
لاتقل : شكراً =بل قل : بيض الله وجهك
لاتقل : صباح الخير ومساء الخير= قل : صلخير وسلخير
لاتقل : خيرها بغيرها = بل قل : أبشر بالعوض
لاتقل : بانفذ طلبك = بل قل : أبشر بعزك
لاتقل : الحياة ملل = بل قل : ياحياة الشر والشرير
لاتقل : أسكت = بل قل : سقها سقها[/poem]
وزانت علومكم .. وماتشوفون شر
اسمحوا لي بالرواح .. وشوفوا لي الطريق ..
أحم احم
يــــــا بنت ..,,
طحياتي ......’’[/align]
رد مع اقتباس
المشاركة الأصلية كتبت بواسطة كلي بكم إعجاب
المفضلات