[align=center]السلام عليكن يالقرمات السلام عليكم يالربع ..
8
8
تتبع مبدأ (النسوان اولاً) ..
الظاهر أني تعودت على السرقه وصارت شيء مني .. هالأسبوع شفت العرب
مخليتن مضائفها ويتفرجون على الديكور اللي مسويه أبو سلطان يامال العافيه بالمضائف
وشفت يالتحدد أبو فيصل ( راعي الوقيد ) يلعب بالزاويه ياما سكرها يامال فتحها
تقول وده يشقها ... وأنا أنتهز هالفرصه وأدخل مضيفه من باب القصص والقصيد ..
حزة الضحى .. والدكاكين مسكره ( يعني مافيه احد يفتن علي )
المهم وأقشع لكم مضيفه ..
بس خليت مواضيعه وأفتح تاريحنا وتاريخ اجدادنا المشرف المشرق
وأجيب لكم من قصصهم وقصائدهم ما يطرب لها السمع وترتاح لها العين ..
اليكم هي وكما هي .. وهي هي ..
---------------
قصة قوم / زبانة العايل وذباحة الدخيل
---------------
يقول في ذيك السنين وبالتحديد بسنة الغدراء ذيك السنه اللي ماظهر فيها القمر ولا
ليلة بوه قومن شمال الجزيرة العربية من جهة الجنوب يقال لهم الطراطيق يسمى الرجل منهم الطرطنقي
أشتهرت بين القبائل الثانيه برخامتها وضعفها وقلة حيلتها وبعد ان طفح فيها الكيل أن تغير من حالها
أستخدمت هذه الصفه ناموس لها بين العربــان وقلبت الموازين لدى هذه القبيلة حيث انها أدعت
أن العرب والعجم قديماً تفرح بالرخوم وتقدمها بالمجالس وقد ذكرهم التاريخ كثيرأ
أمثال : صويلح بن جحا وومفلح بن أشعب و مطلق أبو دولامه ..
فكانت من أسس هذه القبيله
أنها ترحب بالضيف لاجا من خلف البيت وطب بالحوش
وتكره الرجل الذي يأتي لها مسالم ومسلم وتعتبر انه شجاع صعلوك
وتزوج الشاب المشهور بالسطو والسلب والنهب والتتن
وترفض كل من تلبس العفه وقلة المســأله
وأما بالنسبة لضيــافتهم
فكان الشيخ الطرطنقي أذا حضر الضيف
أمر (الصبي) الذي يشتغل عنده أن يطب على بيت قصراه ويسرق دلة القهوة
ويـنـقـز على أقرب نخلة في أي مزرعة قريبه لسرقة التمـر
وبعد هذا يأمره بأن يعترض لحدى البنيات اللي تسرح بالغنم ويلعب عليها بكلمتين أو يطقها فلقتين
وياخذ منها خروفين واحد للذبح والثاني أحتيــاط (يمكن جارهم يسرقهم أثناء الذبح)
وبعد إكرام الضيف تبدأ التعلله .. والسهر مع الضيف .. على طريقة هذه القبيله
فمن الأبيات اللتي وردت من مجالس هذه القبيله في التعلله
قول صاحب الدار في أم العيال أمام الضيف :
تشتاق عيني لشوفتك لا تبسمت
..... وتطري علي في بسمتك عنــز خالي
وقولهم .. عنــد النار
يامحلى البـيـبـسي على صالي النـــار
.... و شاهي(ن) بارد مثل وجه راعيه
وقولهم في قدوم الضيف
يامرحبا ترحيبتن كلها تــــراب
.... في وجه من يكرهك ولا أنت محشوم
ومن المعارك التي خاضتها هذه القبيلة :
معركة ( دمجه ) عام 1877 ق.هـ
معركة ( شمطار ) عام 1977 ب.هـ
حيث خسرت هذه القبيلة بكل شرف وكانت هاتين المعركتين وسام عز على صدور شباب هذه القبيله
حيث سلبت أموالهم وسرق حلالهم و وترملت نسائهم
حتى أن الفتيات بعد هاتين المعركتين أبين أن لا يتزوجن الا من أبناء هذه القبيله الطرطنقيه
وعلى طاري العرس
يذكر ان الأباء يتقدم لفتياتهم من أبناء القبائل المشهورة الأخرى
أمثال (بني هاجر - وبني مره )
هذه القبائل المشهورة بالعز والنخوه وحتى ان الأخيره فاز ولدهم بشاعر المليون
فمن باب الأحسان تقدموا لفتيات هذه القبيله فكان الجواب من أبيها :
(العفو ياولـدي ما نزوج أجـــواد .. الطرنطقيه في سلمنا ماتاخذ الا طرطنقي ..
وانا أدري ياولدي ان خيركم عند الله أتقاكم بس سامحنا .. مجبور أني أردك
والله يستر عليك .. وأنا أدري انك مالك ذنب أن الله خالقك ذيب ولد ذيب
بس وش اقول للجمــاعة ؟ زوجة بنتي أجودي؟ ..عزالله بياكلون وجهي بين الرياجيل )
والحديث عن هذه القبيلة لا نهاية له ..
حتى كتب التاريخ عجزت ماذا تكتب فيهم فآثرت السكوت
---------------
قصة // غريم المحــبه
---------------
يقال انه في ما مضى سنة يفطمون لطيفة رجلاً سمى نفسه (غريم المحبــه)
ولا يحب أحد يناديه بغير هذا الأسم ..
وفي ليلتن من الليالي أجتمعوا رجال القبيلة في بيت الشيــخ علشان يتعللون
وفيهم واحدن عيــار ويحب النشده
ويوم شاف ذاك الرجال المقبل الحزين ورحب به الشيخ وقال : حيا الله غريم المحبه
قال الله يحيـ ـ ـ ـك (التقطيع دلالة على الصوت الحزين )
والله وتذبح هالعيــار الشفايه كعادة أهل الفله في مضائف أبو سلطان ..
وهو ينشد اللي وزانه (بجانبه) قال : يالاخو هو أسمه غريم المحبه ولا النك نيم ؟
قال : والله أنا لي مده معهم وانا ما اسمعهم ينادونه إلا بغريم المحبه
قال العيار : وأنت من متى ساكن بهالديره ؟
قال : قبل العصر نزلنا هنــا
قال العيار : كش عليك ياوجه العنز .. (يقال ان أم العيار طرطنقيه )
ويقوم العيار بعد ان أستفحلت فيه الشفايه
ويجلس قدام غريم المحبه وينزل عقاله وغترته وطاقيته ومسباحه وبوكه وجواله N70
ويقول يالأجودي طالبك بوجه الشيخ وبوجيه العشيره أن تقول تم ؟
قال غريم المحبه : أبشر بسعدك تـــم .. ( يقال أن أم غريم قبيليه )
وهو يتربع العيار و قال : علمني وش له أسمك غريم المحبــه ؟
وهو يقوم غريم من محله ( ضاقت به الوسيعه ) ويـمسك الطنب ويطالع للقمــر
وجرها : أمممممممممممممممم يابري حالي
لا تزيد المواجع خلني قد نسيت لا تقلب بقلبي صفحت الذكريات
قبل خمس طعش سنه (وفي رواية خمس تعش سنه ) مريت على ديرتن أبي حليب
ذبحني الجوع والعطش وشفت لي نياق ترعى قلت أنزل على أهلها
وأطلب لي جغمه ( رشفه ) من حليب هالملحات ..
وادور الراعي أو صاحب هالنياق ولا لقيته .. قلت غريبه مو معقوله أن هالنياق مامعها أحد
وأفــتــر عليهن لين سمعت لي صوتن تقل موهب من صوت اهل الأرض
صوتن ماينوصف لو وصفته
وانا اتليش في محلي وأسمع لي صوت ماء يصب
شكل هالبنت تغني وتغسل ..
بس غريبه ما حولنا بـيــر (بئر)
وأنا أنـخش ورى الحصاه أبي أشوف هالصوت من وين
وهي ترفع صوتها ( أنطربت )
يــا هلي ياهلي وين دار الوليف ..
منزلي منزلي منزل الوحي بلادي ...
أفتدي أفتدي افتديها بفؤادي ..
يلالا يلا لا يلا ...
وتغســـل شعرها بوزر الناقه (.......) >> الترجمة ممنوعه VIP
وأنا أتليش مكاني من زين ما أشوف وأسمع ..
حتى أن البنت خذت نياقها وراحت وأنا مازلت ورى حصاتي أنتظر رجعتها بكره ..
ولارجعت .. وأنتــظر ليلتن ثانيه .. ولارجعت قلت انتظرها أسبوع و سنه المهم اشوفها
وهو يدق جوالي واحدن من العيال يقول : هها خلص عليـنا تعال ..
وأنا القى لي فحم في مراح عرب شادين ( أجل أمريكان بيشدون)
وأكتب على الحصاه :
لو أدري ان الصحاري تنقل الأشواق
.... كان أنقل لك مع كل جربوع ورده
أخــوك / غريم المحــبه >>( أخوك ) حب على وضح النقــا
وبعد شهرين رجعت لهالحصى لعلي وعسى ألقاها ردت علي ..
لقيت الضيـــم بعينه والقهر براسه
لقيت واحدن ماسح كلامي وكاتبالهلال عــز )
يعني شهرين ولا لقيت لها رد والأكيــد انهم رحلوا لأن راعي الأبل مايقعد محله
وين القاها ووين أشوفها ..
و تصيبني ذيك السنه الحصبه تقول أمي أنها مطعمتني بس مدري ليه جتـنـي
يمكـــن من المحــبه ..
وأسمي نفسي ( غريم المحبــه ) كود يمر عليها هالأســم وتذكر الحصــاه ..
وهذي سالفتي .. ياولد الأجواد ...
ولا بقى أحد بالمجلس الا تغارقت عيونه ويوم تهيض غريم المحبه
وهو يركب ددسنه ويريوس ويروح ويزيد بكاء المجلس يوم شافوا
مكتوب على ددسنه من ورى :
( ؟ أرسلت لك ياعزوتي كم مرسول .... وأبطى جوابك ياحبيبي عليه ؟)
( أخوك / غريم المحبــه )
------
هذي بعض من قصصنا و أبياتنا الشعريه اللي توارثوها الأجيــال ..
أن شاء الله يستفيد منها الجيــل القادم .. وياخذ منها العظه والعبره والفائدة ..
مع طحيات / عجايب.COM[/align]
رد مع اقتباس
المشاركة الأصلية كتبت بواسطة طنخااان
المفضلات