للشاعر ابراهيم بن جعيثن
يمدح محمد العبد الله الرشيد
[poem=font="Simplified Arabic,5,white,normal,normal" bkcolor="black" bkimage="" border="none,medium,gray" type=2 line=0 align=center use=ex num="0,black"]
قلت آه من صرف النيا والتعايس=وجرحٍ بلاجي مهجة الروح قابس
اروم التجلد والشقا مـا يطيعنـي=والأيام فيما قيـل حيـلٍ غوامـس
يجني بغاراتٍ على فايه الضحى=ويودعن بي ناب المقادير غارس
لاتجزعي يا نفس وارضي بالقضاء=تر الحي فالدنيا للاشياء معانس
صروف الليالي كم جلن من مهمه=وكم اوضحن خافي على الطل دارس
اعاف الكرا ماخذ من الليل ساعه=الى دك في قلبي من الهم هاجس
ادبي على بالي دلال رسلان=وبرّية يطرب لها كل حامس
اديره على كيفي عن الني والحرق=وادقه على هوني بزين المهارس
ادقه وثم ازله من عقب فوحه = بريحٍ فضيحٍ طيّب للمنافِس
ازلّها على خمسة وطوفٍ توالا=كل واحدٍ ريحه للآخـر يجانـس
ترى الاربعه منها هوى كل شارب = هذاك عن مثلي يزيل التعامس
صحا هاجسي وولف القيل بالي = وجفني جفا نومي ولاهوب ناعس
اعدل من القيفان ماكان مايل = على غيبة الواشي خبيث الدسايس
طلبت الذي يمنع ولامنه مانع = مجيب لمن يدعي بداجي الحنادس
ياقا عثرتي حيثه عليمٍ بزلتي = ولا يمتحن حالي بوقتٍ معاكس
ادير افتكاري وين ملقا هديتي = الى صرت من بعض المشاحي مراوس
دورت ماثوقٍ على كل حاله = صبورٍ صموتٍ في حضور المجالس
ولا شفت يقضي حاجة الامر غيره = يمشي لها بين الضحى والخرامس
طلبت الله الخيره على السير عازم = دنّيت مرداتٍ على الدّو عانس
صلابٍ قوايمها من السير والسرا = لها بالمهامه والمتايه تمارس
خطرٍ تكسر كورها من اصطارها = الى لان حبل المحطمه له تضارس
يقال امها فرحه وابوها جديعي = وهي مشيها يسبق طيور الملاهس
انسّف عليها مزهبٍ لي وقربه = وآخذ عصاي وفوقها العبد جالس
والعصر قيد خلافها ويسارها = وهي كنها لدانقٍ به العود تارس
اودي سلام سالم الزيغ صافي = من الشهد ممزوجٍ لبيب الملابس
الى منتصا قلبي ومشكا همتي = ذراي الى هبت علي النسانس
محمد حيا الممحل الى صيّف الحيا=وحال بذر العشب بالأرض يابس
فنا الكوم كلّ ذاكرٍ طيب عينته = وهو مثل قول الناس لقران خامس
محمد خذا الطولات على كل طايل = في لجة المعروف والجود غاطس
محي الندا حاوي خصالٍ حميده = عن المد ما تكثر عليه الوساوس
ابو اليتاما ما يتلف المال بالقدا = بالعون ما وجهه على الضيف عابس
امينٍ وحيش الدار يُخشا ويرتجا = شدادٍ على ضده ولوده يوانس
حجا الجار ريف الملتجي راعي النقى = وهو زبن من دبّت عليه النوامس
ينوس لحريبه لو تنزح ادياره = عفيفٍ نظيفٍ عن جميع المدانس
شجاع يقود سهوم الاقدار للعدا=باسه ضحا الهيجا على كل فارس
محمد ضفا حكمه من الطور لليمن=للجوف والمشهد وبلـدان قابـس
مصواط حربٍ مابعد صار مثله=ولا نشا بالجود له من يجانس
الى قيل ثوّر صار في البدو ريبه = شيخانهم كلٍ من الذل فاطس
يخافون من قول الشيخ مشّى بيارق=ومسيّر على هذا بهذا ايعابس
قيدوم شمر كم ذا فاج غره= الى انسد من ذروا وجيلٍ كوانس
سناعيس من جد لجد تسلسلوا = على العز والشيمه اسودٍ فوارس
اوصيه ولا مثله يوصى بسيه = حيثه لصعبات المعاني امداوس
ما يلتقي واشٍ يجي مثل ناصح = كل حاسد من رحمه الله آيس
ولا توري الجافي بعد لين جانب = من الصد ما يشفي كثير التمالس
الدرب ما يوصف لمن فيه دارب=والجود والطاعة خيار الملابـس
هيّضت ما بالصدر سمحٍ مثاله = وحكمه له مع طيّب الراي واهس
قلت ان ذا حظٍ قاعدٍ من رقاده = نوا عقب ماهو ثاويٍ ما يرافس
يسامح خمال القيل ان شاف زله = عن سابقٍ او من تداليه خانس
حيثه فهيمٍ في خطا الهرج والقدا = ماهو على الزله يسوق الملابس
الشعر يكفي منه واضح رسومه = ابذكر الله عن عيون المناجس
تمت وصلى الله على سيد الورى = عد النجوم وعد رمل الطعامس[/poem]
اتمنى تعجبكم .
تحياتي
رد مع اقتباس
المشاركة الأصلية كتبت بواسطة ريم شمر
المفضلات