سلام يا أهل المضائف
بما أن رمضان قضى الله يشرفه و يعيده علينا
عندي لكم سالفه أو بالأصح مغامره من المغامرات الرمضانيه
و هي تفيد الطرفين لتحقيق مستقبل مشرق
و حطو تحت مستقبل ثلاث خطوط حمر
و علامتين تعجب
و جذر تربيعي بعد
جايتكم السالفه
في رمضان دورية فطور بين الجماعه ( رجال فقط )
يتم فيها تقديم الفطور ومشتقاته و أحيانا يصل الهياط الى عشاء وسحور
و يا نسوان كدن و شمرن السواعد
طبعا أنا لازم أشمر
لأني أحب شمر
ولأني بلا فخر
أطلق وحده تسوي اللقيمات
ولأن الفطور يجينا في الشهر حول ست مرات
يديني بها ست حرقات وشلوطات سبة هالزيت
أدري بتقولون : وراتس متحمله ؟!غريبه!
جايتكم السالفه
يوم كبرت وفهمت
قلت يابنت الله لا يضيع لتس تعب حراق وشر وشرير
لمن ؟
و هل يستحقون ؟
وتبدأ الآن المغامره
وأنا أدخل المقلط وهو عباره عن غرفه
مخصصه لتقديم الأكل للضيوف
و فيها بابين = اثنين من الا بواب
( حشا قوطي بوني لازم فتحتين )
الأول
لتدخيل الأطباق من المطبخ ومن ثم يقفل
والثاني
يفتح لدخول الشيبان والعصافير
والشيبان //
هم فئه من الرجال أكل عليهم الدهر وشرب حتي تجشأ منهم و ياكثرهم حولي
والعصافير //
هي الفئه التي لولاها لم أتقن اللقيمات
وسميناها بالعصافير للتشفير
و لسببين :
1_ أشكالها منوعه و ملونه
2_لأنهم ما نلبث أن نطالع فيهم إلا و يطيرون منا يابري حالنا
أهاااا نعود الى الباب الأول
و أقف أمامه لمدة ساعه أتفحصه بأشعة أكس حتى لقيت فتحه مايدخل منها الهواء
بس يدخل منها الهوىأمممم >> تهورررت
و تشوف منها100%
في الفطور الأول
أشتغلنا بضمير سجلوا عندكم
_شوربه _معكرونه_شعيريه_مرشوش_جريش_جلي _محلبيه _ كريمه _ومع القهوة_ سمبوسه نوعين_ بيتزا _لقيمات_جيوب التاجر_ فطايرزعتر_ غير العصاير _ برتقال_فيمتو_ليمون لأهل الضغط_وطبعا كطعوس لبن خلفات <<عزالله صلوا التراويح !
ومتحمسين أول يوم
وأنا أتمتم الله لايضيع لي تعب و أرسل إشارات للسحالي حولي :
جت العصافير ؟
يالله ننتظر باقي نص ساعه
جهزوا وأفرشوا و المعجنات بعد الصلاة
أبشر طيب يا سعادة الوالد
أذن المغرب وتغلق البوابه الأولى لتفتح الثانيه
و أمسك تمرتي و أنسرق و أنطلق كأنطلاق الفشق من المصكمه
وأتجه للفتحه السريه التي تقبع بين نقوش الباب (للمعلومية عمر الباب 27 سنه )
وأناظر و أفتش ألا مابه ألا هالغربان (عفوا" أبي) هالشيبان
ومافيه ولاعصفور ولاحتى خويره ولا صوص
قهررر ياضياع تعبتس عليهم (و إلا أجرا" عندالله مايضيع )
وأرجع أفطر ويوم صلينا وأنا آخذ صينيتي و أعبيها من هالمعجنات و أغلفها
أسمعي يا يمه خويتي عازمتني وبأروح لها بعد التراويح وباخذ معي معجناتي
قالت: هذي للشيبان بعد الصلاة
قلت : أقول سمبوسه وكم لقيمه تخب عليهم بعدين مالهم سنون يآكلون البيتزا
وأروح أتمتم (والله ماتشدونها وأنا عجايب بنت أبوي )
ومع مرور الأيام وقرب العيد بأسبوع وكم يوم
طنخ الوالد وحب يجدد بالبيت و يعدله
وأنا معه أيه يبه أصبغ برتغالي ولا فستقي و وسع المجلس وزين ذا وحط ذا
المهم و يجيب هالعمال يعلمهم ألا أسمعه يقول:
غير هالبيبان الخربانه من عرفنا هالبيت وحنا ماغيرناها
وأجيكم طايره لااااااااااااا
نهي نهي
وأتعلبش ببابي باب المقلط .... تقل كني أم ماشافت ولدها من سنين
لا تغيرونه لا تغيرونه
قال : ليش ؟
قلت : زين اللحين يسكر و يفتح ليش تغيرونه ؟
قال : قديم
قلت : أصبغه أو نقشه بس ماتغيره
يـــــــا بــــــــوي
( أسمعوا الحكمه )
يا بوي فيه مستقبل راح نشوفه من ورى هالباب
هاللحين هالباب موهب قديم ؟
خلاص أصبر شوي مع مرور الزمن راح يطلع البترول من ورى هالباب
طبعا الوالد مافهم شيئ و أحتراما" لنفسه وافق ولا غير ولا باب ( أبن آدم طماع )
طبعا أنا كنت أقصد العصفور اللي يشتغل بشركة البترول
بأشوفه من ورى هالباب ( بس ابي اشوفه بس ) >> نواياها حسنــه
وعلى آخر فطور وصلت العصافير
وأشبعت الشيبان
و علق أحدهم قائلا" : يامشاء الله عليكم ما أزين فطوركم الليله عن كل ليله
ولسان حالي يقول : يازينك ساكت
و جا العيد وجانا العيد وطارت العصافير
والسبب على قولت المثل :
(( لازان الكفر مشت السيارة ))
أوكما قال الشاعر الخايب :
(( شبع شيبان العرب . . .تكسب عصافيره ))
فالله الله بالشيبان فهم في نشر الخبر أطلق من الجزيرة
وطحياتي ..........،،،
رد مع اقتباس
المفضلات