السلام عليكم .. بالخير يا عيال
هذي سويلفة طازجة يعني توي سامعه والا هي صايرتن منذ مبطي
والله العالم انه صايرتن على واحدن من هل الولاية
هذا الرجل الله يسلمكم صار عندهـ مناسبة ؛ والوليمة محفوفه
يعني يحضرهـ جماعة المسجد !!
هذا المعزب بينه وبين واحدن من الجماعة وقفت نفس ومتزاعلين ،،،
قم ياهذا يوم دري ان خصيمه عندهـ عشاء ومحفوف وعلى شان يغيضه
عزم اهل مساجد الديرة كلهم ؛ كل مسجد يصلي به يعزم الجماعة !!
تسن المعزب هو اللي مرسله !؟
والحال هكالوقت ضعفه ومامنش ؛ وين ووين يحصل للواحد يذوق اللحم
تسان من عيد لعيد
صابتهم امراض وبلاوي
ويوم جا وقت العشاء ما فطن المعزب ليا والله المجلس مصطك من كثر الرجال
كل شوين مصوتن واحد يابو حظيّظ !! اقلط
والله يوم انه بلش وش يسوي ؛ الرجال ملي القهوة ـ المجلس ـ والعشاء
يالله ييزي ربعهم او ادون ؟؟
هاهـ وش السواة
صوت لحدى خوياوهـ الخاصين ، ابو فلان لعنبوحيك وش نعمل ؟؟
قال هالرجولة اللي ملي القهوة ما انت عازمهم ؟
قال لااااا منين يارجال عشيّنا محفوف ويالله جماعتنا !!
لكن هالحين وش الحيلة وش الدبرة ؟ امكن تراها ما تفيد الحسايف
قال الدبرة دبرت ربك .. ازهلهم
قم يا رفيدزهـ وهو يدعي كم واحدن من الرجال اللي يحطون على اليمنى ..
قال اسمعوا : كل واحد منكم ليا جا العشاء يقلط مع قلطة ؟
الله العالم يجي لهن اربع او خمس قلطات اللي قلطوا على العشاء !؟
وصاهم وقال اذا قلطوا الرجال على العشاء ومدوا يديهم لقمة لقمتين
وانت قايم ؛ انعم الله عليهم ؛ والأولين اليا قام الاول وقال انعم الله
عليهم !! لو اللقمة بيدهـ قرطه وقام << رجال تستحي ، ومابه قولتن
سعوديه ؛ يعني كل واحد يقوم متى ما شبع
وعلى هاللون كل قلطة يقلط معهم واحدن من الزقرت حسب الخطة ولقمة ثنتين
وهو ثايرن من العشاء " انعم الله عليهم
ولابهم اللي شبع وبعضهم ما امداهـ يدلِّي على اللحم
وعلى هالحال الياما قلطوا كل اللي حضروا العشاء !؟
وقلط عقبهم الوغدان وعقب ماقضوا الوغدان ودوهـ للحريم
وبهالطريقة تخلص الأجودي من الموقف المحرج اللي حطه بوهـ ضعيف النفس
وقتنا هذا يقوم الشايب " وانعم الله عليهم " يتلفت ليا والله ماغير زوله
والباقين ضرب من هالمفاطيح مادريوا بيوم رحيل ..
وكمعن من الصافي على مشرعن زين
جازت لي هالسالفة ؛ قلت امتعكم بقرايته
تحيـــــة وتقدير ،،،
والسلاااااام ...
رد مع اقتباس
المفضلات