طق ... طق ... طق ... عسى ماأزعجناكم....؟؟؟؟؟

**بـنـت النـور** · 08-09-2006 21:49

قضيه رقم 3

بند رقم 11111

تعرفون ان كل واحد فينا عنده نظام معين في حياته من يوم تشرق الشمس الى مانرجع ننام

يمكن يكون يوم بعضنا مشغوول ويالله يالله يلقى الفرصه اللي يرتاح فيها حتى يرجع يتابع بعض اموره ...

وبالعكس البعض يجد اثناء يومه فراغ كبييير جدا يصل الى حد الملل .

بين هذا وذاك الارتباطات الاجتماعيه تظل موجوده عندنا ويمكن يحلو للبعض تسميتها المجاملات الاجتماعيه ... واللي تترجمها الزيارات العائليه او الفرديه .

بعض الناس يجرئ على الزياره بدون موعد سابق .

والبعض يعطي مكالمه هاتفيه وهو عند الباب .

والبعض يكلم قبل ساعه .

والبعض ينسق بالموضوع قبل يوم او اكثر .

اللي يجيك وماتدري الا هو داق عليك الباب واذا فتحت له تلقاه مبتسم

هلا الله يحييك

عسى ماأكون ازعجتك او جيت بوقت مو مناسب

لا وش دعوى هذي الساعه المباركه

( طيب ليش مانقول اللي بخاطرنا

) صعبه صح

ودي اقول رأئي واكيد انتم عندكم اراء حلوه ومفيده ..

أؤيد التنسيق للزيارت العائليه مهما كانت وعلى الاقل قبل بيوم واحد ...ولكن اكيد راح يكون حولك ناااس مايعترفون بالتنسيق وهم على نوعين :

الأول : يمونون

وهذا مو مشكله لأنه يُستقبل عادي وحتى لو دخل عليك والمكان مو مرتب ولو قدمت له الشاهي ببريق بدون سكر ههههههههه .... :p كل هذا شي عادي

الثاني : مايمونون

وهذا هي المشكله تضطر انك تجامل حتى لو الزياره ماهي في وقتها ... ولكن تقدر تقوله تراك جيت بوقت مو مناسب؟ ... انا ماأقدر

بس اقدر اقول الله يححيكم لو عندنا خبر قبل ماتجوون كان فرشنا لكم الارض ورد

" أنا لا أكذب ولكني أتجمل "

هاااه وش قلتو وش السواات

بمثل هذه المواااقف والزيارات المفاجئه

انتظر ارائكم وحواركم اللي مانستغى عنها

دمتم بنور

**شام** · 08-09-2006 22:00

تعتبر هذه المواقف من المواقف الاشد احراجاً ..

لعدة اسباب و هي المشغولية الدائمة و ندرة أوقات الفراغ

و التي إن وجدت .. سوف تكون مخصصة لأمور أخرى اهم من الزيارة المفاجئة .

ولعل عنصر المفاجأة يجعل الواحد منا في حيرة .. كيف يتصرف و كيف يجامل إن صح القول

وهنا تبدو المفارقات .. فمن جانب لا بد من ايجاد الاعذار للتملص من الضيف الوافد

مثل ( عندي موعد عند الدكتور .. لازم اراجع الأمر الفلاني قبل انقضاء الوقت ...)

ومن جانب آخر هيهات أن يستمر ذاك التهرب في حال انكشف .. الموقف محرج للغاية

لقد فرض روتين الحياة نظاماً معيناً وهو لا بد من الاتصال قبل الذهاب ..

أبسط أمر ممكن أن يطرق الباب و لا يفتح لنا ... ( قفشة )

وبما أن الهواتف الخلوية صارت متوفرة في كل مكان فماعاد هناك عذر

أحياناً اصدف صديقة تقول لي حضرت عندك وما احد فتح لي الباب ... ( مشكلة )

اقول ولماذا لم تتصلي لتتأكدي من وجودي .. و الاتصال على الهاتف الثابت وليس الجوال

لأن الجوال ممكن ينقذ من موقف محرج مثل ذاك ..

ومع ذلك تكاد مشاهدات هذه المواقف تتلاشى .. ف يالمجتمعات نتيجة الاتفاق المسبق

فلا أنا اذهب للزيارة بدون موعد مسبق و لا احد يأتي عندي بدون اتصال مسبق و هكذا ..

فيما عدا ذلك مواقف قليلة .. وهي طريفة ..

وشكراً لك بنت النور على القضية الرائعة و الطرح المميز

ويعطيك العافية ..

**عجايب بنت الشايب** · 09-09-2006 00:17

صـــــــــــــــــــــــــادقه

صادقه 100%

انا مايقهرني الا اللي يجينا بداية العصر بالعطلة

يدرون في العطله الصيفيه تالةاحد مايصحصح الا خمس العصر

ادري انه خطأ

بس الشكوى لله

حتى اذا كانوا الكبار صاحين

الصغار نايمين

وبينشغلون فيهم

المهم

هالناس ماتحب لأخوانه ماتحبه لنفسها ؟؟

او القضية جــــهل ؟ مااعتقد

او وش السالفه

او انانية ؟؟

لا وبعد يدخلون ويدينهم فاااضيه .!!

طيب جيبوا معكم القهوة والشاي والحلى علشان مانجيب الا الفناجيل

ذيك الساعه حياكم الله بكل وقت

خخخخخخخخخخخخخخ

بنت النور بارك الله فيك على هالموضوع الحقيقي

طحياتي .....

**شموخ** · 09-09-2006 01:51

ياهلا ببنت النور

والله يالغاليه يرجع لطبيعة بعض الناس البعض تحسين ان مابينك وبينه ذيك الميانه ومع كذا يجيك بدون موعد والبعض مايجيك الا بموعد وانا أفضل إذا كنت بروح لأي شخص أعطيه موعد حتى بيت أختى وهي أختي والله مو عن رسمياات بيننا بس سبحان الله ماتكون موجوده بالبيت الا انا طاقه هالمشوار وتعرفين عاد أحياء الرياض عن بعض عن مدينه ..

أما بالنسبه للأشخاص الأخرين فاأنحرج اجيهم بدون موعد أحس مو حلوه مع انى أكره بعض المواعيد إذا كان صاحبها يتكلف لك إذا جيتيه في بيته ..

بالنسبه للي بيزوروني بالطائف عادي والله أستقبل بكل الأوقات مافي اشكال بس هم يسيرون ويتزحزون هل الطائف أما بالرياض لا أحب المواعيد بصراحه مو لأشياء خاصه بي ولكن أحيانا اللي بيجونك بعضهم مايرتاح لبعض فـ لازم تنضيم الزيارات بحيث مايتلاقون عندك لأن أحيان بعض القريبات مايرتاحون يسيرون علي وعندي من زميلاتي أحد يبونها جلسه عائليه بدون أحد من برى وهذه مشكله بحد ذاتها ذا طب عليك أحد من زميلاتك وهي ماعطتك موعد وعندك أحد من بنات اعمامك أو قريباتك وقتها بيكون المجلس هدوء وتكتيمه

بنت النور شكرا لك

تحياتي
شموخ

**عجايب بنت الشايب** · 09-09-2006 21:57

8
8
صادقه ياشينها لاصرتي عنصر محاايد بين عائلتين او بين صديقتين

طفشششش

تقل رجالً معرس على ثنتين لازم تسيرين على ذي وذي

وتعزمين ذي وذي

**شموخ** · 10-09-2006 01:35

8
8
8

عجايب

هههههههههههه

المسيار عادى تحصل كثير انك تعرفين زميلات مايعرفونهم قريباتك او مابينهم صداقه ولكن المشكله اذا هم سيروا عليك هم كلهم يعرفونك بس مايبون يقابلون احد عندك مايعرفونه او من برى العائله بالذات فصرت لازم انضم الزيارات مابين قريباتي وصديقاتي بحيث استقبل كل على حده عشان كلن ياخذ راحته لسير علي ومحد يحرج أحد عندي

**أبو فهد** · 10-09-2006 18:53

لعله طغى الاكتساح النسائي لهذا الموضوع و لعلي أن أزحزح من هذا الجانب

الزيارات بدون مواعيد مثل ما ذكر الدكتور طارق السوايدان في كتابه إدارة الوقت

حيث تتشكل معظم مضيعات الوقت على هذا النحو

زيارات بدون مواعيد أو اتصال في وقت غير مناسب و لأغراض غير مناسبة و هلم جرا

فأفضل ما يكون في الزيارات هو التنسيق المسبق لها بأسبوع على الأقل

لانه الناس مقامات و تختلف

أخوي عادي على اسمه اخو ما يشره عليك لو قصرت بضيافتوه و كونه أعلم بالحال و ممكن تصكها بوجهه

لكن الغريب و كلما كان اتصالك به قليل يمكن أن يكون محرج

مثلن خال الرجل ما اتوقع واحد يجيه خالوه بنفس اليوم و بيذبح لوه لكن لو انوه اتصل من قدام اسبوع تسان زين

و لا يهون الاخو لكن الاخو تقدر تعشيه أو تغديه من البيت موب لازم تعنى

أما لما جاني واحدن بلا ميعاد حتى ولو كان ما عندي شي إحدى أمرين

إما أخلي الشغالة تقوله بابا نوم

و إذا هو خالي

نزلت لوه ثمن قلت لوه تخاوي يا خال

ثمن بيقول وين و بقوله معزوم

فبيقول الله حافظك و منها افتكينا

------------
تحياتي
أبو رشيد

**بـنـت النـور** · 13-09-2006 20:21

هلا ايمان

صدقتي ان هالزمن متوفره جميع سبل الاتصال

واللي منها الجوال

يعطيكِ العافيه

دمتي بنور

**السرعوفي** · 14-09-2006 02:23

بنت النور , اظن المشكله تختلف باختلاف المكان والزمان !!! الان بعض الناس وخاصة بالمدن الكبرى اخذوا بانشاء مساكن منفصلة تختص بالضيوف والزوار عن مساكنهم الداخليه , لذلك لاتوجد مشكله باستقبال الضيوف الغير متوقع زيارتهم فيكفي ان يفتح لهم الباب الخارجي ويدلفون للمجلس سواء نساء او رجال !!! ربما تكون بعض هذه العادات ( الزيارات الغير متوقعه ) لازالت تمارس في القرى والتجمعات التي في اطراف المدن كعادة متبعه بين النساء والرجال بحكم معرفتهم ببعضهم البعض ولكن في المدن يختلف هذا الامر كثيرا لان الناس الذين يسكنون المدن يعرفون ضروف بعضهم البعض ولذلك لاتجد من يقتحم بعض التقليد المعمول به !!! بس تبقى ضريبه يدفع ثمنها البعض من ساكني المدن وهي انعدام فرصة وجود ضيف ياتي خصيصا للزيارة والاطمئنان !!! ولذلك يهرب اهل المدن حينما تلوح فرصه من الوقت الى تلك القرى للتزود بطعم الاهل والجماعه والضيوف واحيانا بالوقوف شطرا من نهار على اهل القبور منهم رحمهم الله جميعا ... !!!