متنفس الـــــردود.....

[المطنوخ]

عجـــست لا اصبر والله عجست


كم موضوع امر عليه والقى بعض الردود تشهيني على الرد عليها ولكن ردي عليها عكس اتجاه الموضوع يعني ماله دخل بالموضوع اما عن الشخص نفسه او شغله قالها او .... خهق (( كنايه عن الخ ))

فا اضطر اسكت علشان مايقولون وش هالمشرف اللي قام يحوق مواضيعنا

فا انا ابصم بالعشر ان فيكم هالسالفه ولكن تراجعون باللحظه الاخيره تخافون ان يقال وش فيه فلان دخل عرض...صح؟


فا هالموضوع هذا راح يفك ازمه ويعتبر تنفيس ....


ياشباب وياعجز (( عنصري بكيفي ))

اللي فيه نفس حالتي ينفس عن اللي يبيه بهذا

يعني مثلا بموضوع لعضو فلان شفت رد وودك ترد عليه رد غير الموضوع تعال بهذا وقل يا فلان كذا وكذا

طبعا ماهو تجون تفلون امها سوالف بهذا على بو انه هذره لا سوالفو بس ماهو تزودونها لا والله انثر عفشكم


طبعا ماهو شرط رد الواحد بهذا يكون متناسب مع الردود الباقيه

يعني شي طبيعي آخر رد واحد يقول طنخان يرحم والديك شيل توقيعك هاللي بس يهاوع تقل يبي يطرش

ويجي رد بعده يقول الشبث تكفى انت مستانس بردك الماصل على المخاوي يالركبه


وهكذا يعني بمجرد مايقرا الواحد الردود يتصل على شهار ويكحشونا كلنا


راح يكون هالموضوع هذا تحت المراقبه فإن نجحت فكرته والا سأشوته الى قعر المحيط الاطرنطي




تفضلوا المايك

[المطنوخ]

كبدايه وعلشان تفهمون الفكره...


ابوهدلاء


ياخوي عندي ثلاجه ومكيف مضيقات بيتنا مادري القى مكان عندك بتوقيعك احطهن فيه؟


ياخوي وش هالزحمه

حرام كل ما ادخل موضوع انت راد فيه الا اقعد اراعي لتوقيعك احسبه موضوع جديد يا غرتن عن الصورة


انا مو دابل تسبدي الا الرابطين اللي حاشرهن بالزاويه يسار وشن؟

[شموخ]

وهكذا يعني بمجرد مايقرا الواحد الردود يتصل على شهار ويكحشونا كلنا

رجاءً شهار مو ناقص كل الأجنحه فل اعقلو احسن لكم

[أبو فهد]

طنيخان يبعدي منهي صورتوه اللي تحت معرفك و لا تقل سفاح بيشي



موضوع حلو بس عيبه الوحيد ان الردود راح تكون عشوائية



فاقترح اقتراح وهو ان نحدد شي نسولف حوله ببداية الموضوع عشان ما يقلب امها شقردي و ربعه <<<< وين تقلبها والله لو انه سيكل





----------
تحياتي
أبو رشيد

[المطنوخ]

^
^
^
تبينا نتكلم يعني مثلا عن منهو يعرف يسوي القهوة مثلا؟

اقول سقها

تدري وش سبب هالموضوع؟

ماله داعي تدري


شموخ
عاد تدرين ان الطب النفسي بالكويت يعطونتس فلوس اذا جبتي لهم واحد مجنون؟!

تشوفين بعض المقحطين يتناوبون كل يوم واحد يصير مهبول ويودي خويه ههههههههههههههههه <--ترى هالجمله تأليف

بس صدز يعطون فلوس



الا يالربع

وش اقدم توقيع شفتوه وصاحبه جامدن على قلبه مايغيره؟

[أبو فهد]

^
^
^


اقول سقها انت و بثنين بعد ( اخاف يحتر القير ) خلها عالخامس


توقيعي أنا شقردي من عام 2003 ما تغير قلب بقل من زود ما ضربتوه الشمس



ترا ما جاوبتني عن صاحب الصورة لا تقولي ماجد أحمد عبدالله بعد الاعتزال




بي رايت باك

[المطنوخ]

^
^
^
ابدا

هذا سلمك الله طنخان الاول وانا يامحاتسيك طنخان الثالث عشر



اقول ماهو تاخذ الامر جد وتصدق ترن ماعرفه ابوعقال فاتحن افمه

[شام]

تحت عنوان متنفس الردود ..

وسؤال يطرح نفسه لماذا نرد على موضوع ..

والغاية من الرد ..

وهل نتابع مجريات الرد

و الرد على الرد

أم هو بروتوكول فقط

أن ارد .. مهما كان الرد ..

برأيي أن يكون الرد من صلب الموضوع المطروح ..

و عدم التعرض للأمور الجانبية ..

فيما يتعلق بشخص الكاتب أو توقيعه ..

رأي .. ويبقى رأي..

ويعطيك العافية مشرفنا المطنوخ

[أبو فهد]

^
^
^

صحيح اختي إيمان كلامك و لكن لو أتينا بكاتبين و كلاهما يصل إلى هدفه في النهاية فأيهما افضل


الذي يكتب بكل جدية لإيصال هدفه

أم الذي يمزج الجد بالهزل لإيصال هدفه


كلاهما سيصل إلى هدفه لكن أيهما في نظر القارئ أفضل و أرسخ ؟؟؟؟؟



<<<<<<<<<<< شايلن عجرته بيده و يتحرى من يقول الأول أفضل



بالنسبة للمضايف من وجهة نظري الشخصية أجد أنها لازم تكون مغايرة لأسلوب الجرائد و التي توزع في كل حدر و صوب و ليس لنا من هزلها إلا كاركاتيرات أبو خميس و الهليل

[شام]

هلا بك اخي ابو رشيد

يا اخي لكل مقام مقال .. فعندما يطرح موضوع فيه قضية هامة لا مجال للخروج عن اطار الموضوع والا انقلب ثرثرة لا طائل منها .

و هنا سيفقد الموضوع و الردود القيمة الادبية و المعنوية و الفكرية ..

وبالتالي هناك مواضيع في زوايا اخرى تتيح المجال للترفيه و غيره ..

بمعنى ..الرد ضمن صلب الموضوع و عدم الخروج عن الفكرة الا فيما يوضح رؤية معينة ..

وشكراً للحوار الراقي اخي الفاضل