احبتي هذه قصيدة للامير عبيد العلي الرشيد في فرسة المشهورة كروش .
وفي هذه القصيدة يرفض عبيد طلبا من والي مصر عباس باشا الذي سمع عن فرس عبيد كروش الكثير وارسل وفدا يطلبها منه،ويرفض عبيد طلبه في هذه القصيدة:
يابيه انا لكروش ماعطي ولا ابيع ***** قبلك طلبها فيصل وابن هادي(1)
يابيه لو كثرت بالقول ماطيع ***** ياحيف تبيني اسلم جوادي!
يابيه مايرهم على مثلها البيع ***** ولايج مثله بقودة مهادي(2)
ما جمّع اصله بالقراطيس تجميع ***** اصله يعرفونه جميع البوادي
باغٍ الا من لقّموها المصاريع ***** وصاح الصياح وثار عج الطرادي
انهج عليها وتعدى بالتراثيع *****مثل الفحل لاصار وقت الهدادي
وأصلها لعيون بيض مفاريع ***** فوق الحنايا والسبايا غوادي
هذاك بيعه والصبايا مفاريع ***** بين القنا ومخفّرات الهنادي
هذاك بيعه كان ماتفهم البيع ***** لامنهن جلبن بسوق المزادي
يابيه انا ماسمع جوابك ولاطيع ***** هرجه بمقلة ناظري والفوادي
ياسابقي مانرخص بالمطاميع ***** حتم ولو قيل ارفعو بالجوادي(3)
ابغي لاثار الدخن بالزعازيع ***** وحطو على عجلاتهنّ العدادي
بيومٍ يشيب من وحاه المراضيع ***** حدّين وحاديهن من الخوف غادي
انطح ورا ربعي وجيه المداريع ***** واقضي عليها دينهم والعيادي
وأنشد عن افعاله بعاد المفازيع ***** هو هرجنا ذا كذب ولا وكادي
من لابةٍ بالحرب ماهم مطاويع ***** ولا تحسّب بالمداس العوادي
حلفت مايطري علينا بها البيع ***** للحشر مايفخت سواده سوادي(4)
مادام راسي للرياح الذعاذيع ***** بالعون طالبها م الناس غادي
وديارنا حامينها بالمرابيع ***** واضدادنا عنها تجي بالحيادي
الاّ ان بغاه الليث حنا مخاضيع ***** لامره وهو فوقه كما البدر بادي(5)
هذاك انا وحذاي لامره مطاويع ***** فرز الوغى صياد من لايصادي
حرٍ يفدّع بابرق الريش تفديع ***** ولا يفرس الا من كبار الثنادي
طير السعد يفرح قلوب المراضيع ***** تشتاق له معها وهو بالمهادي
يدرا وترجى من وراه المنافيع ***** الليث يرجى للعطايا الزيادي
أودع مصاعيب القبايل مراجيع ***** والخيل جاته من عمانٍ تقادي
وصلّوا عد ماحيش مال وما بيع ***** على نبيّ للورا خير هادي
معاني المفردات:
(1):فيصل:هو فيصل بن وطبان الدويش شيخ مطير، ابن هادي:هو محمد بن هادي بن قرملة شيخ قحطان.
(2):يرهم:يصلح ، قودة:هدية.
(3):سابق:فرس.
(4):يفخت:يفارق.
(5):الليث: هو الامام فيصل بن تركي.
ــــــــــــــــــــــــــــــــــــــــ ــــــــــــــــــــــــــــــــــــــــ ــــــــــــــــــــــــــــــــــــ
هذا وتقبلو تحيات اخوكم الاصغر....
سـايـر الرمـاحـي.
والى اللقاء ،،،
رد مع اقتباس
المفضلات