السلام عليكم ورحمة الله ..
اخواني واخواتي الكرام ..
جئتكم امد يدي مصافحا .. قلّبت بين اوراقي .. وبما انني بين اهلي ..
تفضلوا هذه القصيده واتمنى ان تعجبكم ..
******************
جتني وصبّـيت مي العين كيفٍ وهيل
ومنها استحى التمر يومه ذاق معسولها
فنجالها طاح قلت ابعذره ان طاح حيل
مْن الـنعومه.. طموح الزبد.. يـحلو لها
ثم انحنت اخذه ..صاحت عذوق النخيل
يالغيم حوّل وش انت ليا وقف طولها
قامت لمحت العيون الرمش ساهي كحيل
وبْعذرهاللــيـل مات بلــيل مجدولها
تبسّمَت قلت فوق مْن العسل سلسبيل
بس الغريبه لمحت الحزن يبدو لها
صبّيـت فنجالٍ آخر علّــها تســـتمـيل
لكنّ دمع ٍ خنقــها فاض مع قــولها
قالت دخيلة حنانك يا عوين الدخيل
قلت أبشري والطنايا الموت بفعولها
قالت كفو وادري انّي لو طلبت الف نيل
تجيـبـها لـو تـواجه ضيم مجهولــها
ضاع الامل يا حبيبي والطريق الجميل
والله.. ذيك الاماني صعــبه نطولها
صَرَخْت ضعت وفقدت الوعي وقتٍ طويل
صحيت.. أعزّي خفوقٍ راح مقتولها
والله كل الهموم اللي مضت ضحك ليل
توّي عرفت الهموم اللي على اصولها
يا عشق ياللي تفــيّا وسط ظــل ومقــيل
لاح الســراب وتــبــدّد كل ما حولها
ويا تربة القلب والله لو يجي ألف سيل
ما ينــبت العشب فيك وغـايبٍ زولها
*****************
وسلامتكم ..
رد مع اقتباس
المفضلات