الى تايلانـــــــــد مع التحية (سبشل للفله)
الله يذكر هاللون بالخير
بالخير ياعيال وياعيالات<--للمؤنثات<--الله من زين اللغه
والله مشكله <--امحق مقدمه..ليه دايم المواضيع فيها مقدمات؟
هالموضوع مالي مزاج للقدمات<--انجز انت وهالمقدمه اللي صجيتنا به
يالربع تخبروون شلتنا يوم يسافرون يم لبنان وش سوينا بالطياره يوم الطيار بالتالي طردنا من الطياره
هالنوبه ابي احتسي لكم عن سفرتنا يم تايلاند
(((اللي فقران مثل حالتي يفصل الاشتراك ويقرا)))
طبعا مثل منتم عارفين خويانا
ابوغازي هو تسبيرنا
وشنقل والشبث والاصيل والمحروووم وسرحان وابوخليف طبعا مع زيادة وغاد جديد علينا اللي هو عبدالعزيز
طالعين بنفود بإحدى الليالي السرمديه والسربتيه وكانت قمرا يعني اللي يبي يعمل شين بالظلام ويحسب محد يشوفه مايقدر
طبعا بهالسالفه اللي قعد به عبدالعزيز حيث ان مثانتوه هكاليوم مهناش وكان كل شوين يدر
ومايقوى يبعد عنا من الذله الوكاد انه يقعد يغني منشان يلهينا
مالكم بالطويله يمار ابوغازي منسدح بوسطنا تقل ثلاجة واقعه على جنبه
يمار ظهروه مخلوج ولا يقوى يتحرك وكل شوين عبدالعزيز متوطي ظهروه <--تخبرون وغد ودايم مكدشينوه
يوم قال شنقل يابوغازي تراك عليتنا انت وظهرك كل شوين منسدح بوسطنا تقل والد
الوكاد قال ابوغازي لعنبوا بختك وين اجلي وين اروح ؟
قال يخي ليه ماتروح لتايلاند؟
قال الاصيل اوووف ياشنقل تبي تخلي ابوغازي يتعنى يم امريكا <--يحسب ان امريكا كل دوله مايعرفه داخل امريكا
وهو يلتفت شنقل على الشبث وغمز لوه وهو ينقز الشبث ليا والله متكي على صدر الاصيل وهو يقوم ابوغازي نسي انوه مخلوج بس من غلا التسوي
قام
وهو يقصد وهو منصفر...
الا واشيب عيني وا وسم تسبدي..على ربعن تحاشموا كلهم وتسووني بمقرن الكتوف ووحده بالعلبا
وهو يكمل انصفارتوه..
الوكاد جمعنا ابوغازي وقال يعيال تكفون ابيكم تخاووني يم تايلاند اعنبوا ابليسكم هاللي خشومهم فطس اخاف يلعبون علي ثمن ابلش بروحي
وانا حتى حمد بسطه يلعب بي فيشن تايلاندي
قلنا تم والله يابوغازي
طبعا من باتسر كلهم قدموا اجازات الربع وحجزوا طبعا القطيه كله مع ابوغازي (ندري انه يزرطهن مار الشكوى لله كلنا كمخ
يوم بغينا نرتسب الطياره وهو يركض سرحان يمنا طبعا سرحان هو كان ملك الكشخه
لابس هكالبنطلون اللي واصلن ليا ديودوه وماهو لاقين حزام رابطوه بسيم
منوه شوين
الوكاد جانا يركض وقال يعيال انتم تخبرون هكالسنه يوم ننهج للبنان ..قلنا ايه..قال لعنبوا ابليسكم لو نرتسب بالطياره الحين ويشوفنا ريّس الطياره<--يحسب الدعوى عصابه
والله لا يمغطنا ويركبنا ويقلب بنا بالجو!!(طبعا سرحان يحسب ان هالطيار ماعنده شغله الا سالفتنا
الوكاد ابوغازي غمز لشنقل وبحركه بهلوانيه رائعه يسحب شنقل هيلاهوبوه الاصفر ذو الرائحه العبقه ويلف وجه سرحان وبلمحة بصر الا سرحان يرفس بالقاع
وصاكوه شد عضلي بالخشم<--من والله ريحة الهيلاهوب هاللي عمروه ماطب ماء
الوكاد وحنا نزخ سرحان ونرتسب بوه بالطياره
اول واحد رتسب هو عمدتنا ابوغازي هاللي ذل اخلاقنا على هالروحه كل شي اول واحد
واول ما رتسب اليا والله الطيار بوجهه والمضيفه وراوه وتبتسم ..قال ابوغازي وهو مقصر صوته للكابتن ..(شف اهلك الله يصلحك)
طبعا الكابتن على باله ان ابوغازي ينكت معاه ابتسم وقال ههه أهلا وسهلا
ابوغازي استحى يحسب انوه احرج الرجال وهو يقول لوه ترى امزح معك بس ابي اشو وش تسوي
طبعا قعدنا بالطياره وكل واحد بمكانوه وقال الكابتن ان الرحله راح تستغرق 9 ساعات فا اللي يبي ينجضع بكيفوه
وهم يتسدحون الربع تقل نايمين بمخيم مددين رجلوهم على الجنب
ومادرينا الا والهواء يهفهف علينا ويم قعدنا اليا والله مامن احد
نتلفت
يمار حتى الدرايش مفتحات
اثرينا اعطبنا الطياره وحنا نوما ماندري عن ارواحنا من كثر مانلتح هالبيبسي
وهو يحلفون انهم سحبوا سايد بأول المدرج ونزلوا ركض للمطار عجزوا لا يتحملون هالصنان والغازات
نزلنا للمطار ورتسبنا التاكسي طبعا رتسبنا التاكسي وحنا ماندري وين حنا موجهين
وهو يلتفت علينا السايق اليا والله مادري وشلون يشوف الطريدز من صغر عيونوه
هو يقول المحرووم ياولد انت ليه ماتنام عدل<--يعني التايلندي
مادرى الا والاصيل ماسكن شوشته من جنب ورص وجهم بالجام الجانبيه
قال السايق ..دو يو وونت بتايا؟
قلنا اكيد انه ماقال لنا مكان الا انه بتايلاند ...قلنا اي والله قو تو مكان نهمز بوه ظهر ابوغازي
طبعا وشصار بتايلاند ووش صار للزقرت راح نكمله بالجزء الثاني قريبا
واسمحوا لي على هالمصاله بس والله حسيت اني مبطي عنكم
قلت اطقطق بهالسالفه على عجله
<---النوم ساس اللوم
رد مع اقتباس
المشاركة الأصلية كتبت بواسطة المطنوخ
المفضلات