خلاص ,, قفلوا مطبخ الأسرة

[المشرف العام]

الدكتور فرانسيك بوتنجر (من جامعة كاليفورنيا) أول من أجرى تجربة موثقة للكشف عن أي فوارق محتملة بين تناول الطعام المطبوخ والطازج. فبين عامي 1932 و1942 قام بمراقبة ثلاث مجموعات رئيسية من القطط لعشر سنوات متتالية.. المجموعة الأولى أطعمها أغذية مطبوخة وحليباً مبستراً بشكل دائم، والثانية أطعمها أغذية طازجة مع حليب غير مبستر، أما الثالثة فخلط لها بين النوعين.. وخلال أربعة أجيال اتضح أن المجموعة المرفهة (التي تناولت أغذية مطبوخة على الدوام) عانت من الأمراض المزمنة وماتت في سن مبكرة. أما المجموعة الثانية فلم تعان من أي أمراض مزمنة وعاشت لسن متقدمة ومارست حياتها بنشاط كبير.. أما المجموعة الثالثة (التي تناولت خليطاً بين الاثنين) فتفاوتت في عمرها ونسبة إصابتها بالأمراض - ولكنها لم تكن أحسن حالاً من المجموعة التي عاشت على الأطعمة الطازجة!!

جرّبها الرجّال على القطط ، عاد شوفي النتائج

وما صدّقت خبر خالتنا الزّووووله

مالكن إلاّ المطبخ ، اجل وش نبي بكن


تششششششششششاو

[الجازي]

المسك ,,

والله تسان تخبر لك دكتور مصري مخترع حبوب بعكس الحالة تراك تسوي خير فيني

الله من مرة تمنّاني السوق بس مدري ليه اذا ذكرته ذكرت الموت

وان تسانك بعد تخبر حبوب تخلي اللي يشطح بالموضوع بعيد ويسوي دعايات لمواضيعه يتسمر بمكانه ترى ماهيب شينة

ودي أحطها عند مداخل مواضيعي

يسلمو عالمرور أخوي المسك ,,

[ريم شمر]

الحمد لله انا سبقت بوتنجر الله لايهينه على هالغكره

ومطبقتها من زمااااان

وشعاري دائما

[11]لصحتك ابتعد عن المطبخ [/11]


وش فيها اذا عشنا على الفواكه والخضروات الطازجه

الا كبسه والا ماتعيشون


انا معتس يالريم قلبا وقالبا..... بس عاد انزلي عن راسي ترى تعبت


ماقول الله يسلم بوتنجر عز الله ان نشمي
[blink]

°ˆ~*¤®§(*§*)§®¤*~ˆ°فرانسيك بوتنجر في قلوبنا°ˆ~*¤®§(*§*)§®¤*~ˆ°[/blink]

[الجازي]

خالي أبو غازي ,,

ومن قال لك انه مافيه دق بالخمس !!؟

دق على كيف كيفك بس وهو ني

يعني لاتشيل هم الدق أبد

يعطيك العافية ياخال ,,

[الجازي]

أريام ,,

أفا عليتس بس ,,

أنا أول المؤيدات والمطبقات من الحين

لا وأبشرتس بعد ريم شمر صارت مطبقته من زمان بس هالعفريتة ماعلمتنا تخاف ننظلها

يسلمو ياعسل على هالطلة الحلوة ,,

[الجازي]

أبو سلطان

وش دعوى شايفني ما أفرق بين التماسيح والقطط

ترى الموضوع أكبر من كذا بس مراعاة لأحاسيسكم ماجبت منه الا هالمعلومة الخفيفة

وبعديم فرانسيك مسوي تجارب كثر التراب شيء على القطط وشيء على التماسيح والنتيجة كانت فتاكة

يعني لاتحدني ارجع لمصادري واجيب كل البلاوي اللي فيها

وابئى سلم لي على سي عامر

[الجازي]

ريومة ,,

يابعدي أنتي وراستس والله نسيت أنزل من فرحتي بهالاكتشاف

ريومة ياختي ماتلاحظين ان حنا الوحيدات من بين بنات خلق الله اللي مضطهدات بالطبخ والنفخ وليته طبخن خفيف الا شيء يفقع القلب ويفضخ المرارة ويجيب الاكتئاب

يعني عندتس الأكلات الشامية والمصرية وكل شعوب الأرض طازج في طازج

أكلف ماعليهم انهم يقطعون لتس الخضرة على بعض وتطلع طبخة

وحنا نعجن ونلتّ "" ولو اني مدري وشو اللت بس اسمعها في الامثال " وليته مرضي عنا

خلاص أنا قررت أوقف في وجه الاضطهاد النجدي ونويت أعرض فرننا في المزاد العلني

الا ماودتس تشترينه تراه تسنه جديد نظيف وكل عيونه تشتغل الا أربع منها بس متسددة

يسلمو ريمو على الفزعة

[ريم شمر]

ياريوم يابعد تسبدي او ل شي ارجعي اقعدي على راسي

تسنه اوجعني يوم نزلتي

الريم اكسترا مشاء الله عليتس


ثاني شي

شوفي انا حسب خبرتي في تطنيش الواجبات الحريميه

فانا اقولتس ان الاحتجاج العلني والمظاهرات وجلب الادله

لايكفي للتخلص من هذه الواجبات اللي مالامها داعي

طبخ وغسيل وكوي وهلما جرا

لا واخرتها يطقتس بحرمه ثانيه

يقول ابي وحده رقيقه (مسقفه) تجلس معي وتناقشني

مو شغاله

حسبي الله عليك مو انت اللي مخليها شغاله


الزبده ريومتي ولو اني كذا بكشف الخطط النون نسويه

بس عاد مانعجز عنها نطلع خطط جديده


ياقلبي انتي بدال ماتعترضين بشكل مكشوف

اذا مثلا ( احد ) طلب منتس كبيسه من ايداتس الحلوين

قولي له ابشرررررررر من عيوني احلى كبسه لاحلى ( احد )

بسسسسسسس



المشكله ان الكبسه علشان تكون زينه تبي لها ماجي

والماجي مخلص

بيقولون لتس بسيطه نجيب ماجي


انتي عاد على طول قولي :الظاهر حتى الزيت مخلص

بيرجعون يقولون مو مشكله الحين نجيب زيت

لاتعطينهم فرصه

قولي ايييييييه ذكرت مافيه رز الا رز مصري

عاد تخيل اسوي كبسه برز مصري


يطلعون الورقه والقلم ويقولون لتس وش بعد ناقص البيت علشان بالمره نجيبه

انت طلعي اخر اسلحتك

قولي الغاز مخلص

وانتي عارفه ان شعبنا السعودي اكره ماعليهم تعبيه الغاز


ساعتها تكونين محضره طبق فاكهه من كل شكل ولون

ولايمنع سندويشات جبن كرافت


مثلا مره طلبوا منتس جريش<<<<مزاج شيبان


انتي قولي : هاه وش تقوووووووول ,,,,,,,نتعشى بالمطعم

طيب مافيه مانع خمس دقايق واجهز

وطيري والبسي عباتس واركبي السياره


عاد يمكن ردة الفعل تختلف من شخص لاخر

تسان انه اقشر بينزلتس من السياره ويحطتس قدامها ويدعستس

الين تصيرين جريش


باقي الدروس على موقعي الخاص

( حياتن بلا طبخ ولانفخ ....حياتن وش زينها )

[بـنـت النـور]

( حياتن بلا طبخ ولانفخ ....حياتن وش زينها )

يابعد تسبدي ريوومه

[الجازي]

ياريوم يابعد تسبدي اول شي ارجعي اقعدي على راسي

تسنه اوجعني يوم نزلتي

الريم اكسترا مشاء الله عليتس

من قال لتس اني نزلت أصلاً

المشكله ان الكبسه علشان تكون زينه تبي لها ماجي

والماجي مخلص

بيقولون لتس بسيطه نجيب ماجي

طيب وش أسوي أنا أصلّح كبستي بدون ماجي

<<<<<<<<<< على نياتها

انت طلعي اخر اسلحتك

قولي الغاز مخلص

وانتي عارفه ان شعبنا السعودي اكره ماعليهم تعبيه الغاز

ريومة

غازنا مركزي مايخلص

<<<<<<<<< والله البلشة

مثلا مره طلبوا منتس جريش<<<<مزاج شيبان


انتي قولي : هاه وش تقوووووووول ,,,,,,,نتعشى بالمطعم

طيب مافيه مانع خمس دقايق واجهز

وطيري والبسي عباتس واركبي السياره

الحين تبيني أعيي عليهم لاأطبخ بحجة ان الطبخ مضر بالصحة وآخرتها أوافق على المطعم !!؟

هالخطة ماتصلح جيبي غيرها

باقي الدروس على موقعي الخاص

( حياتن بلا طبخ ولانفخ ....حياتن وش زينها )

ياحبيلتس ومواقعتس ياشيخة

الا هالبيت كم لتس وانتي تكتبين فيه <<<<<<<< أنواع التحطيم

ريومة ,,

خلي عنتس عاد ,, أنا بايعتها بايعتها ,, والفرن لايزال معروض للبيع في حراج ابن قاسم مايهديتس الله وتاخذينه لو على الأقل تعتبرينه ذكرى صداقتنا