اخواني واخواتي
السلام عليكم ورحمة الله وبركاته
تذكرت موضوع اخوي ابو خالد عن انك تجلس مع نفسك وتحاسب انت وياه وفعلا جلست وطلعت بكوم سوالف وقمت قلت لا يكثرن وابلش بذكرهن لكم
الوكاد اليوم ابي اذكر لكم موقف صار معي وقراده متواصله وهي كانت اخر ايام المعهد او بالاصح الترم الاخير من المعهد
الوكاد كثرت جياتي لحايل باخر ترم واخر جيه باقي على التخرج يمكن ثلاث اسابيع واتفقت انا وولد عمن لي انه ياجل عرسوه الين اتخرج يعني بعد تاريخ 10/8 قال ابشر انا قلت لوه كذا لان اخوانه صغار وعلشان ما نخليه لحالوه
المهم رجعت لحايل يوم الجمعه ويوم الاحد دق علي اخوي قال بندر عرسوه يوم الاربعاء
انا ما صدقت اخوي وقلت لوه انا متفق معوه يخليه بعد ما اتخرج قال انا رايح هالحين استاجر لوه الاستراحه وهو مالوه وجه يدق عليك علشان الاتفاق
قلت هين قل لوه ما اقدر اجي قال طيب
الوكاد المكافاة تاخرت وانا طفران والجوال مفصول والحال ما يعلم به الا الله وولد عمي فزع معنى بعرس اخوي واخوانه ما ينشد بهم الظهر قلت لازم اروح
المهم انا التفت حولي وحوالي ولا القى احد يسلفن لا سياره ولا قريشات يوم صار الثلوث وهو تضيق بي الوسعه
قلت يالله انك تفرجه علي وهو يطري علي ولد عمتن لي بارامكو وانا مستحي منوه
وانا اخذ جوال واحد من خوياي وانا ادق عليه قلت ابو فهد راتبك على اي بنك ؟ واحد مايبي يدخل دايركت
قال انجز كم تبي
قلت والله تدري بندر يبي يعرس وانت شفت شلون وقف معنى بعرس ابو سالم ومن هالكلام المهم حول لي المقسوم ما قصر وهالحين بقت السياره وهو يجي واحد من خوياي عتيبي الله يذكره بالخير هو ومن عندي ومن يقرا قال السياره علي ابشر بعزك قلت كفوا والله تسلم
الوكاد وانا استاجر السياره وانا خايفن منه وانا امغط عليه لحايل تقريبا الساعه 12 الظهر والعرس بالليل لا امي ولا اي واحد من اهلي يدري اني ابي اجي لاني قلت عندي امتحانات وانا صادز
ولاني جاي
المهم حول الحليفه او باقي على حايل 200 كم ويدق علي اخوي والليه هذا الحين شلون اصرفه
وانا اوقف وانا اطفي السياره وانا ارد عليه قال وينك قلت متكي بالغرفه طفشان لاني ماجيت للعرس قال زين ما كلفت على عمرك وجيتك ماله داعي حنا راح نقوم بالواجب قلت ايه هين
المهم مغطت على السياره وهي اكسنت هونداي اول مره اسافر عليه
وصلت البيت الساعه 6.30 المغرب ودايركت دش على الطاير وقلت للوالده يالله نروح هي من شافت خشتي وهو تسمر بمتسانه وش جابك قلت يالغاليه بعدين احتسي لتس كل شي بس مهو هالحين بسرعه خلينا نلحق عليهم ونجهز الاستراحه
المهم رحنا شافن اخوي وهو يشهق قال متى رحلتك وانا لعصر مكلمك وانت بغرفتك قلت انا بالحليفه يوم انك تدق علي
المهم قضى العرس ولا حصل نوم هاك الليله واللي عقبه يوم صار الوقت الجمعه العصر
قالت امي رح هالحين على السفار يعني من وقت قلت ماني رايح الا المغرب المهم مشيت المغرب والله اني ماني مسرع يمكن امشي حوالي 160 خذيت مخالفة سرعه بالغلط يمكن العسكري شبه على السياره
وبعدوه بشوين وانا اسمع صوت بالسياره عاد الملويه موديله 2004 وانا اوقف وهي تطفي هالحتسي الساعه حول العشره وانا توي ماسك طريق المدينه السريع وقفت وفتحت كبوة الملويه وانا اشوفه تقل جمره واخليه الين صارت الساعه 11 وانا اشغله وانا اسمع طقطقه والليه هالحين شلون
وهو يدق علي اخوي وهو يدري وهي تدري امي وهي تقوم تبتسي يايمه ولدتس ما ينخاف عليه لا تبسين السالفه بسيطه
المهم وانا اعاير الزيت الا العيار يلمع ما تقل به زيت وانا ادق على امن الطرق وما يجوني الا الساعه وحده
وانا اقعد اعد السيارات واقصد واغني وما حولك احد وهو يجيب لي علبه وحده قلت ياخي انا قلت لكم علبتين قال العسكري اللي جابه من المحطه مطفر قلت الله يستر عسكر ومطفرين وانا امشي على رخاي الين ما وصلتن المدينه وانا اغير زيته مره وحده وامشي والصوت موجود
لقيت لي راعي سطحه نيم بغمارته قلت توصلن لجده قال بـ 500 ريال قلت كمل نومتك اسف على الازعاج قال بـ 450 قلت يابن الحلال نام بس والله ما طرت اشيله بـ 300 لو تحترق
المهم صرت امشي عليه 60 بس ما اسرعت وكل شوين اوقف واحط زيت الين ماصارت الساعه خمسه الفجر وقفت اصلي واحط زيت وانا اكمل باقي على جده 250 كيلو والجو بارد وانا تعبان صرت ما اشوف ابي انام
المهم وهي تهدي وانا ادعس شوي وهو تفقع بصوت قوه وهي تهزهز مثل اللي وطت له حاجه وهي تطفي والليه هذي وش وطت وانا اخليه يامن وقفت وانا افتح كبوته وانا اراعي الا هي تصب زيت وتدخن عرفت انه افقعت يا ملا اللييي
وانا افضي القير واقعد بوسطه وهو تدحدر وهو تسرع قلت خلن اشوف وين توصلن هالحتسي الساعه حوالي الـ 6 الصبح والجو بارد
والجوال ما يشتغل المهم مشت اكثر من 5 كيلو وهو يوقف لي راعي فورد وانا اسحبه لاقرب محطه وانا اخذ اغراضي منه وانا اروح معه لجده وانا اوصل جده الساعه 8 يعني على وقت الدوام وعيوني تقل بصل ما اشوف قلت خلن احضر واطلع وهو يجي المدرس ويعي لا يطلعن قلت يا ابو سمره (اسمه سمير ) انا قاضي ولا اشوفك وانت مشغل هالسميليتر حتى شف شكلي بس انا رايح لو تفصلن ماني مستوعب شي المهم رحت ونمت يوم كامل وصحيت وانا اجيبه بسطهح للمحل اللي قال لنا اذا ما احترقت كل شي حنا نصلحوه قلت انت شفه وش تبي انا مستعد يوم فكوه قال نفس الخراب اللي به من اول
قلت وشو يعني كانت خربانه قال ايه وحنا صلحناه قلت ليش يا ممصوع ابو الرقبه ما قلت لي ليش تقول رح لو تبي عليه للرياض
قال انا شيكت عليه ولقيتها على سنقت عشره
قلت لخويي العتيبي زين اننا جبناه لوه مير خلنا نمشي لا افقد اعصابي واقلب المحل على راسوه هو وقلموه هاللي منشبوه باذنوه يدور بوه ابراج
وحنا نطلع منوه وهو يقول ما تزعل ياشيخ دي اول مره يصير هالغلط قلت احمد ربك وصلت لك السياره ولا قلت لك رح جبه من هناك 000000
وهذي السالفه واللي خلاني انقد على نفسي هو كلام الوالده يوم تقول رح من وقت
اسف على الاطاله وادري اني مسكت بكم خط بس وش اسوي
رد مع اقتباس
المفضلات