السلام عليكم ورحمة الله وبركاته
هذه القصه حصلت على الشاعر فهد الغسلان من اهالي بقعاء (شمال شرق حائل 90 كلم) وبدايه القصه وكان هاك الايام الفقر شديد ان الشاعر فهد شرى له قعود من له واحد صلبي وعليه وسم الصلبه (المضباع) وقام شاعرنا فهد ووسمه بوسم الزميل من شمر (السهيلي) فوق وسم الصلبه (المضباع)وذالك لقوة الزميل وانه لن يتجرأ احد على اخذه وسرقته او الاقتراب منه وهو يرى السهيلي وسم الزميل وقام فهد واعطاه رجال من الزميل يدعى زعل العفري (ابو فهد) وقال له خذ الذلول وابيه معك وجلس يحرصّه عليه وفي يوم من الايام رجعت البل موّرده والا ذلول الغسلان ماهي معهن وقم يازعل ودوّر وليا والله مالقى شي وقم يازعل وارسل مرسال لفهد الغسلان يخبره باللي جرى . قال فهد هم وين دوّرو ووين بحثو عنه قال له بهاك المكان وهاك المكان ......قال فهد انا مالي لا انخاهم وقال انا اللي اخليّهم يدورون زين ويقوم ينخى زعل العفري (ابو فهد) والزميل عموم بهالقصيده :
[poem=font="Simplified Arabic,4,skyblue,normal,normal" bkcolor="white" bkimage="" border="none,4,gray" type=0 line=0 align=center use=ex num="0,black"]
صديق الشفايا مايصير طبيب= ولا ظنتي ان كل صديق صديق
ياعل من لامني بالصديق النصافي= عليه الليال المقبلات تضيق
عشيري بأيام المقابيل نقوتي = زبون ٍ خوى للمذهبين وثيق
رجلٍ الى شاف النشاما تلاقى = يقود الذبيحه والحجاج طليق
ابو فهد ريف النشاما هل النضى= عريب الجدود وللمدوح حقيق
يوصل سلامي للمحبين كلهم = هل المد الازمل للغريب رفبق
اولاد الازمل يزملون المعادي= غدو مثل باليوم الكبير طويق
سقى الله ديار ٍ ربّعو به رفاقتي= من مزنة ٍ له بالظلام شعيق
يسقيه مسقى رحمة ٍ مابها كدر= تسمع لشعبان الفلاة صليق
كل الرفاقه يهتنون بلذته = يرعون به خمس السنين خنيق
دوّرو قعودي ضاع ماله مدوّر= قعودي غدى للشامتين سريق
ثكلته على وسم الزميلات الازمل= عليه السهيلي مايروح وسيق
ومن حدره المضباع ومبّرم الكلى = اصفر شعل ماشيّلوه يطيق
طويل الوبر جبر الظهر عندك الخبر= قصير الخطى لاقصى المراح سبيق
تخيّرت الازمل ماتخيّرت غيرهم = هل الندى يوم العفون تويق
قريبين لاعدّو بعيدين لاعدو = صديق ولليوم الكبير خنيق
وسيعين عينن للصديق النصافي= ومضرابهم للمستهين غميق
ولا تذخرون الطيب ياشمعه الصبا= ترى الطيب يبقى والعمار تسيق
الى انتويتو يالنشامى على المحل= عسى الله يسهّل للهجار طريق
ودخيلكم عن كل ماجاء قعودي = لايلحق الحب الجراش زبيق
لا وآهني يابى الهني من غدالكم = جار ٍ ولو يزعل عليه رفيق
وصلّو على سيد الخلايق محمد = مالعلع القمري براس طبيق[/poem]
ويوم وصلت القصيده (ابو فهد ) زعل العفري وجماعته وهم يقوّمون عشرين ذلول دوّاره كل ناس بجهه ووصلت القصيده ايضا للشلقان من الزميل ويقوم خشّان وعبدالله البيخان ويعطون فهد سبع بعارين بحملهن ومزهبّات وقالو يافهد هذولن الين نلقى ذلولك وقام فهد بتوزيعهن على جيرانه وناسه .(طبعا لاننسى انهم كانو بوقت فقر شديد وشوفو تعاملهم بينهم )
. وخذو كم يوم ويلقونه على مسافه بعيده جدا واللي لقاه زعل العفري وهو يجيبه لفهد الغسلان .
ويستاهلون الزميل ماقيل بهم.
رد مع اقتباس
المفضلات