[poem=font="Simplified Arabic,5,white,bold,normal" bkcolor="black" bkimage="" border="outset,6,sandybrown" type=1 line=0 align=center use=ex num="0,black"]
يا رشيد يامشكاي ماعنك خافي = اليوم جفني ما توقف ذريفة
العود راح ولا بظني يشافي = وعليه دمعاتي دوام نزيفة
واليوم هذا بشّروني بلافي = جابه لنا يا رشيد ربي خليفة
ابكي فرح يا رشيد مابي خلافي = غصبن عليّ القلب حن لوليفة
اطلب عسى الجنة لجدّك ملافي = يسكن على ارض عشبها كالقطيفة
مع الصحابة مسكنٍ له يشافي = هدمٍ نظيف ودار خلدٍ نظيفة
ياما مشى بالليل والسِّبت حافي = وياما ركض لأجل العشاء والطريفة
وعلى البطون يربِّطون الغدافي = وقتٍ صعيب والمعيشة كليفة
نشبع وهو بطنه من الجوع هافي = ونرقد وهو يسري بحالٍ كسيفة
الثوب جابه من جديد الغدافي = ويفرح اليا شاف الملابس نظيفة
ليا جاء الشتاء يضفي علينا اللحافي = واليا صاح واحدنا حياته يعيفة
والوالدة فضله على الكل ضافي = حقّه عليّ كبر الجبال المنيفة
تفز لو جفنه من النوم غافي = تقدّم لنا المطلب بنفسٍ خفيفة[/poem]
[align=center]الشاعر / ابراهيم بن دحيم الرديعان[/align]
رد مع اقتباس
مشرف مضيف الترحيب والتعارف
المفضلات