[align=center]وين المحروم وبعض الربع مايتعلمون من هالمفردات اللي مافيه منها...
مفردات عجوز معتقه بمحزره...[/align]
المشاركة الأصلية كتبت بواسطة سليمان الناصري
[glow=999999][align=center]7
السلام عليكم ورحمة الله وبركاته وبعد
هذا مايبي له شرح...وعليكم السلام ورحمة الله وبركاته...
رسالتس اللي كزيتي وصلتن وفرحت به...
رسالتك التي ارسلتي وصلت وسررت بها
وكثر الله خيركم على المقطع والغدفه الي كزيتي لي
كثر الله خيركم على الثوب والشيله او غطاء الراس اللي ارسلتي
وابشرتس ان اخبارنا تسرتس. البقرة اضنت ، والبيض فقش ، والدجاجه الرقطا راجن،
ابشرك ان اخبارنا تسر, والبقره ولدت, والبيض خرج منه الصيصان, والدجاجه الملونه بعدة الوان ترقد على البيض.
وإن إدحيم العلي أعرس ، ونوّير مخطوبة ، وعويش فطمناه ، وسويرة رفعناه من السقاط وصويلح شراله دنانة،
وان عبدالرحمن تزوج. ونوير تمت خطوبتها, وعائشه فطمت من الرضاعه, وساره رفعناه من السقاط (((هذي ماعرفت مقصدها))), وصالح اشترى لعبه الدنانه وهي إطار كفر السيكل الحديدي.
وسليم ختم المصحف ، وإعزيز الصالح طاب من الطنان ، وسند ولد مضيوي بدا يحبي، والحمد لله طاب الجحام الي بعينه،
وسليمان (((يمكن انه تقصدك ياسليمان الناصري))) ختم القرآن الكريم, وعبدالعزيز بن صالح شفي من مرض الطنان (((هذي ماعرفت مقصدها...يمكن الصوت الذي يصيب الأذن انا ما أدري))), وسند ولد موضي أبتداء يحبو, اما الحجام (((هذا ماعرفت مقصدها...يمكن مكوى أنا مادري))).
وأنتي صاتزه حطينا عليه تبنه ، وحصيصه طابت إقطوفه الي براسه ، ومنيره مشطناه بورده وأم سويلم طلعت من الماجب ، وتممنا لسويلم،
وأنتي على صواب وضعنا عليه قصب الزرع, وحصه شفية من إقطوفه اللي براسه (((هذي ماعرفت مقصدها...يمكن دمل او ثعلبه...انا ما أدري))), ومنيره سرحنا شعرها بورد, وأم سالم انهت النفاس وذبحنا العقيقه لولدها سالم.
والنعال الزنوبا اللي تخبرين عندناهاك السنه رقعناه ، ومقطع الروز خبناه ، والدوشق غيرنا قطاعته ،
وحذاء الزنوبه (((أكرمكم الله))) التي تذكرين عندنا من قبل كم سنه اصلحناها بالرقع, وثوب الروز (((نوع قماش قديم))) قصرنا من طوله بالثني, والفراش القطني بدلنا قماشه.
و السفرة الكبيرة علقناه بالقبة ، وحطينا بيت للرادو ، والمصحف حق عمي غيرنا ثوبه ،
والسفرها التي تصنع من الخوص (((جريد النخل))) علقناها في الدهليز (((ليتنا سلمنا من هذي))), وفصلنا للراديو ثوب ليحميه من الأتربه وكذلك مصحف عمها بدلوا كيسه او ثوبه بجديد.
والسراج زينا فتيلته .وال**يل مليناه حتات من إنخلتنا ، وشرينا سحارة ولقيناه مكسورة .وبقولس إني مع هالحمولة غاديتن حوسة ، الطاية تخر ، والمثعب منشق ،
والسراج اصلحوا فتيلته, وال**يل تمت تعبئته من ما يسقط من نخلتهم, وأشتروا حافظه طعام ووجدوها مكسوره, وأريد ان أخبرك انني مع هالعائله بشقاء, بيت الدرج يخر اثناء المطر, والميزاب او المزراب كذلك يخر على الغرف.
والقتاله منقلعة ، و باب الروشن منكسر، والتسوله مسنيّه ، وبريتز الغرش الصغير منقشع ،
الأوله ما أدري وشي, وباب الغرفه التي في السطح مكسور, والكوله ((موقد الكيروسين)) تدخن وتصبغ الأواني, وإبريق الصين الصغير مكسور ممسكه,
والله يهديتس يأم دحيم.البزارالي كزيتيه شوي الكركم به ، والمسمنه تقل رماد مابه ليمون ،
وعسى الله يهديكي يا أم عبدالرحمن البهارات التي أرسلتي لي الكركم ((هذا اسمه كذا)) ناقص, وهذي الأخيره ما أعرف وشي.
والفتيت مسري ، والكليجا تقل عظامة . وذا بغيتوا تكزون شي:كزوا شي يبل الريق ويواجه عند الحمولة .
وخبز الرقاق به دود, والكليجا ((شبيه بالبسكويت)) يابسه جداً, وثانيتاً إذا اردتم ان ترسلوا هديه فأرسلوا شي يبيض الوجه عند عائلة زوجها.
معكم علم إن حمولتنا ناس نقادة . وخالتي شرّاهة ، وعمتنا حقنة مايجوز لهاشي مثل رقاص الساعة،.وحريم عمومتنا صرت إثمنلهن ،
وأنتم تعلمون ان العائله ينتقدون اي شيء, وحماتها تشره انكم ترسلون لنا هدايا, وحماتها عله ولايرضيها اي شيء, وصارت سالفة لكل نساء عائلتهم.
وجذعانهم فرقا عين جدي شيبان كبري يترددون علي هالجصة قضوا على النعمة تقل دبا ، ونا ماودي أطول عليك الحتسي
وشباب عائلتهم عساهم الموت رجال ودائمئ التردد على غرفة المؤنه (((تسمى الجصه لأنهم يملطونها اي يليصونها بالجص أو الآجر))), وهم كصغار الجراد أكلوا كل شيء, وهي لا تريد ان تكثر بالكلام.
عسا مايخليني منتس ، ولامن جناين قلبتس ، لاخلا ولا عدم وسلميلي على نفستس ومن يعز عليتس .
عسى الله يحفظكي ذخراً لي وأن يحفظ لك أبنائكي, وسلامي عليكي وعلى كل من تعزين.
و أخص بالسلام مضيوي وفطوم وقوليلهم والله ماخلان أقصر عنوتي عنكم وأشوفكم إلا إني عويجزة ولاصقة علي ظهيري وضليعاتي ومارخة كتوفي ورجيلاتي بالفقس ..
وسلامها الخاص لموضي وفاطمه وأخبريهم اننها لم يردها عن زيارتهم إلا أنها مريضه, وقد لصقت اللزقه على ظهرها وصدرها ودهنت أكتافها وأرجلها بالفقس.
ومعتس علم هالارياح يعودن بين حين وحين ومع هالبراد صايلات علي يالله حسن الخاتمة والعمل الصالح وسلمي وأنتي سالمة
وانت تعلمين ان مرض الرياح يعودها من وقت لأخر ومع البرد يزداد معها المرض جعلها ماتقوم هالقصيميه.
اختس: مزنه
اختك مزنه...
[/align][/glow]
[align=center]لعنبوه وشلون لو هالرساله لكوفي انان تسان اقعد يومين وأنا ماخلصته...
على العموم اللي يعرف معاني هالمفردات اللي انا قلت عنهن (((هذي ماعرفت مقصدها...انا ما أدري)))... الله لايهينه يعلمنا او يمكن اني غلطان ببعض معاني هالكلمات اللي فوق يوضح لنا ومنكم نستفيد...
والسلام...[/align]
رد مع اقتباس
المفضلات