اماره حائل والجوف

[خالد الشمري]

ان الذي دعاني لكتابه هذا الموضوع هو مايتردد عن هذه القصه من مغالطات من الناس وحبيت اقوم بسرد الموضوع كاملا ان شاء الله
وكما يعرف الجميع ان بعد وفاة الامير عبدالله الرشيد سنه 1263 للهجره قطع كثير من الناس ان إمارة الرشيد قد إنهارت فرد عليهم الامير عبيد الرشيد بقوله:
قل للعدو اللي يتبهج بالاخبار.........وفرح على أمرٍ نازلٍ من سماها
وقطع براي انه طفت شعلة النار........حنا شباة النار نوقد سناها
حرّم على ذروات ماترمي الاكوار.......لما تجي دبرٍ تصاقع حفاها

ومن المعلوم ان الذي حكم بعد الامير عبدالله هو ولده الامير طلال وكان من أوّل المشاكل اللي تواجه أبو بندر هي ان اهل الجوف نقضو العهد اللي كانو معطينه للامير عبدالله الرشيد فزعل الامير عبيد الرشيد من فعلة اهل الجوف ونواهم يبي يحاربهم وقبل الحرب ارسل لهم هالقصيده:
بالقلب من كثر الهواليس هوجاس..........والنفس ماتصرى بليا دواكيك
والخلق حكمه عند قوّات الانفاس...........وحنا تحت حكمه عبيدٍ مماليك
وحلو لطف الرب من عقب الإياس..........ياحلو تدبيره بهاذي وهاذيك
يادار ياللي من ورى غر الاطعاس...........لاتحسبين اني على الطول ناسيك
انا بشير اللي يديرك بالافلاس...............وقبله نصحتك عن توالي محاكيك
يادار خليتك علشان عباس.............ولغير عباس فلا ني مخايك
ولاني بحال اللي زعل ساس او راس.........لاكان من حضرك ولا من بواديك
يادار ماعندي حذا السيف والفاس...........وقبسٍ يهدّم مانبا من علاليك
الا ان اتبعتي ملة الخلق والناس............وتبتي عن الفايت وعفتي طواريك
يادار مايجلى صدى القلب وعماس...........الا بمنصورٍ وربعه نفاجيك
ارجي برب العرش مع باني الساس...........على شريعة من نهى عن مخازيك
ان ساعفت نقول لك يأم الاجراس.............وبدم من يبغي خرابك نحنيك
يابوحمد لاتكربك قوم درباس...............ولا تزملك شاشاتهم والدبابيك
ولا بالمثل فزعو لهم قوم فراس.............ناتيك بجموعٍ يروكن ترويك
إفهم جوابي واوصله يابو حواس............وان وسّرو وسرٍ سعينا بتفكيك
الحر يستالف على قرب الاوناس...........ولا ظنتي يستالف الباز والديك
والخيل ماجتنا شرنٍ بالاكياس..............ابو قايعٍ ناطى بهن المداريك
كم نزلةٍ بأشناقها نضرب الطاس............هثلات بالبلدان نقعد شواويك
والحضر بالبلدان ياكلهم الحاس..............ناسٍ خيايطٍ وناسٍ حواويك
حنا هلا الصولات والحرب والباس............ونبّرك الفسقان بالقاع تبريك
حنا مشاتينا على كل عرماس...............نحايفٍ ياتن مثل المساويك
وجنايبٍ تبرى لنا قب الافراس..........وحلو قول الغوش حيّك على ِحيك
وصلاة ربي عد مانفّس الناس..............او نبت نبتٍ او سعى له بتفكيك

وبعد القصيده صارت فوضى وحرب وذبحه بين حارات اهل الجوف(القرعاوي ـ الدلهميه) وغيرهن من حارات الجوف بين الموالين لامارة حائل والموالين لغالب وابوه حطاب وفيصل ابن شعلان وابن هذال من مشائخ عنزه(كلهم ضد امارة حائل) ونتج عنها خراب الحارات المواليه لابن رشيد واكثر سكانه من الرمال ويقول دابس بن مرخان التميمي قصيده يتهدد به الامير عبيد الرشيد اللي منه قوله:
ياراكبٍ من فوق حرٍ نشرنا............حرٍ زهاب الكور للمطرشانا
عليه من دل العقيلي وسرنا............وعليه من يوصل جوابي عدانا
يابو طواري لاتبيّح خبرنا..........عيبٍ لغاك وعيب حنا لغانا
ماننعذل عن ضدنا لو صدرنا..........ناخذ قضاء مافات باللي وزانا

رد عليه الامير عبيد الرشيد :
ياخو نوّير لاتشيع خبرنا ............عيبٍ لغاك ثم عيبٍ لغانا
ياشوق من خدّه يباهي قمرنا..........بنت الذي ينهم نهيم الحصانا
إصبر علينا لين يافي شهرنا............برشام سيسٍ له نمّقس دلانا


ثم ارسل مشوح السلمان من اهل سكاكا الجوف قصيده للامير عبيد الرشيد يستفزعه على غالب وحطاب وقوم
عنزه يقول مشوح السلمان(كل اخر نون في الشطر الاول عليه شده) بعض ابيات القصيده:
ياراكبٍ من فوق حرٍ معنا....................حرٍ من القعدان ماله مثايل
ولد ذلولٍ للمماشي يدنا......................لو سقت به غالي الثمن ماتسايل
فوقه غلامٍ يوصل العلم منا...................صبح اربعٍ تلقى رفاع الحمايل
سلم على طلال زبن المجنا..................وخبّر عبيد كان عنا يسايل
قل العرج وخليف خذو ثمنا..................طاعو براشد صار ماله دلايل
نط ابن شعلان بمارد وغنا...............وجمّع علينا الحضر واولاد وايل
وبحلالنا حطاب وخليف غنا...............سوّو سواةٍ ماسدوها القبايل
ان ساعف الباري فحنا مكنا...............نقاضي خليفٍ وقرضته مايسايل
صبيان شمر والمدافع ترنا...............وان جاك متعب شفت قرب الصمايل
ياخوان نوره لاتراخون عنا................ترو البحر عدّه من اسواق حائل
ابيات جنّك من مشوح بدنا................ياعبيد عجّل لي برد المثايل

ملاحظه (ناصر ومنصور) اسماء المدافع اللي يملكه الامير عبيد الرشيد وبعد القصيده ردعليه الاميرعبيدالرشيد:
يالله ياللي للجزيلات وهاب.............تعطي ولا جزل العطى منك ممنون
يالله ياللي من ترجاك ماخاب............ياواحدٍ له المخاليق يرجون
ياغافر الزلات يارب الارباب...........ياقادرٍ تامر على الكاف والنون
ياعالمٍ مافي خفّيات الاصلاب............ياناصرٍ موسى على قوم فرعون
تفتح لنا من باب نصرك لنا باب...........وانصار بدرٍ لافتحته يحضرون
ءآمين ياقاضي الحوايج والانواب..............ياباريٍ تشرف على كل مكنون
وخلاف ذا ياراكبٍ عجل الاوثاب...............يشبه لدانوقٍ مع الموج مشحون
عجل الخطى يسبق نسيم الهواء الهاب............لاشفت زوله بالخلا قلت مجنون
عقب اربعٍ تلفي عزيزين الاقراب................اللي على الشيمه ودربه يحامون
سلم على كل الرفاقه والاحباب.............وخصص به اللي عن حوالي يسالون
قل الرد جاكم مع ذلول ابن خشاب............ابو طريف يوصل العلم مامون
وبدال ماكزّيت خطٍ ونجاب..............لابد مانمشي وناصل على الهون
فن كان تشكي لي خليفٍ وحطاب..........فالله حسيب اللي بعهده يبوقون
وهي عادته جر الهلايب والانشاب...........من خلقته للسو ء والشر ماعون
ان سلم راس اللي للأسلاف كساب............عن اللي غدى من شيّكم لاتصيحون
ان عاون الباري وساعفن الاسباب.............فالسعر ماينقص عن اللي تخبرون
ملحٍ وقصديلٍ نصبّه بمصباب..................وناسٍ لمنصورٍ واليفه يجّرون
وان كان تنخاني فأنا غوج الاطلاب...........إلا وسيفٍ لك على الضد مسنون
وشريت من شانك من الهند الاطواب..........تسعين يومٍ والمراسيل يمشون
من عند ابو يعقوب حمال الانواب..........نعم الرفيق الى هبى كل ممهون
ماتجرتي مع تجرة الناس بخضاب...........من روس قومٍ للجراير يجروّن
ان ساعفت تضحك بسنّك والانياب............وغيرك على جزل المصايب يبكون
حنا هذولا مجهدين بالاطلاب................نتنى مراسيلٍ من الهند يلفون
ناتيك بجموع ٍ يعيّون الآداب................واويل من بأشناق داره يحلون
ضياغمٍ ترخص حلاله والارقاب............لو هو ثقيلٍ حملهم مايملوّن
ضياغمٍ لامن ولد الردي هاب..............من مقدمٍ لحقوقهم مايخلون
يامن يبشر بي خليفٍ وحطاب ...............تبشير فرعونٍ بموسى وهارون
مانضربه بالبزر نضربه بأطواب...........ونخش وسط الجوف وانتم تراعون
وصلو عدد ماشيف نجمٍ وما غاب............أو ماسعو بأطراف ليلٍ يلبون
على النبي سيّد قريشٍ والاصحاب..........ادعو بها ياللي لربي تخافون


رد غالب السراح بقصيدته:
ان جيتنا ياعبيد نفتح لك الباب............حنا نقيف وكل ربعك يخشوّن
الجوف تلقى به خليفٍ وحطاب...........ماهم فريق حروب عنكم يهجون
والله لو جمعت ربعك والاجناب ..........ذي ديرة السراح عنها يحامون
ياعبيد ماقصدك زكاة ونواب...............هذه بغى ضيمار ياعبيد تكمون
ياعبيد يوم انت رفيق لحطاب................والدبس عند حسين يغرف بماعون
اللي دفس بربوعكم جر الاسباب...............اللي له الدفاس ياعبيد تبكون

هنا قصد الشاعر الخراب والدمار الذي لحق بالناس الموالين لابن رشيد وممتلكاتهم ويقول الامير عبيد الرشيد يرد على حسن بن درع كبير الحبوب من اهل الجوف :
يابو شكر يوم انت اول عميلي.............وحظك كبير وعرضك ابيض من الشاش
واليوم حكيك صار ماله ضويلي.............اطعت حكي فلان وفلان وشلاش
ولا يعمد الماء بالمحال الزبيلي..............والصدق مايخلط معه حكي الاوباش
فن كان عندك واحدٍ مستزيلي...............به مثل بيت ابن جعيثنٍ يابن حراش
فيجمع محاصيله وانا اجمع حصيلي............فن سلم بيبني له مع الربع وشواش
انشد قيال ضلعكم الطويلي...............عن حس منصورٍ الى صار مهتاش
لاجيت انا وياه من هو قبيلي...........اللي معيدن بالظفر عقب منحاش


ويوم وصل جيش الامير طلال الرشيد ومعه الامير عبيد الرشيد الى باب خدمه وهم يبنون خيامهم عنده ويطقون الدمام عنده ويجلس الامير عبيد الرشيد يحدى بهالقصيده :
كان رب السماوات امرنا...........نستعينه مدير الهبايب
نطلبه مايخيب سفرنا............ياكريم جزيل الوهايب
كان سيّر سببنا وسرنا.........واعتلينا ظهور النجايب
من قفار وحايل ظهرنا.........مانفكر بوقت الحرايب
ماصديقك يطيح بنحرنا........والدخن مثل صفق الهبايب
كم من صبيٍ لقلبه جمرنا.........نجدعه بين عوج النصايب
كم حصانٍ لرجله هجرنا.......مايشم المهار العرايب
كم من خصيمٍ لجمعه دمرنا.......نجعله للهنادي ضرايب
يانويدي سمرة ثغرنا ...........مانبيعه لقضب القضايب
كان امرنا الولي واستقرنا.........فزعةٍ به نسّر القرايب
مع مضيق الشعيب انحدرنا........مع طلال صعوب الحرايب
مانخلي لحيٍ مدرنا.........كذبكم من كبار العجايب
كان عند ضد حربٍ فسرنا......واحترم كل صبيٍ وشايب
نعجب اللي بعينه نظرنا..........بالوغى دون شقر الذوايب
نحمد اللي عليكم نصرنا ........بالوهايب ولا هو بغايب
تايه الراي ياللي حقرنا........ماتشوف الديار الخرايب
مايناظر بعينه لأثرنا..........كم حلالٍ نحطه نهايب
ماسمعتو سوالف بقرنا.........يامحارب على غير صايب
باب خدمه منازل خبرنا.........طيب والا على غير طايب
الوعد خامس من شهرنا..........بامدوّر لعوج الطلايب

وتصير اللقوه بشهر رمضان والشاهد على انه برمضان قصيده محمد عبدالله القاضي بالامير طلال الرشيد وشمر :
روّح لابن شعلان علمٍ وكيدي .......اني بشهر الصوم ضيفٍ لحطاب

المهم ويوجهون بالمدافع ناصر ومنصور على قصر مارد ويضربونه وتموت ناس كثيره منهم خليف السراح والعرج وينتصر الامير طلال ومن معه ويستسلمون اهل الجوف وبعد استسلام اهل الجوف يقول الاميرعبيد:
طلبت علام السراير والاسرار...........علام مافي الصدر لو كنت مخفيه
اللي وعد من عقب الاعسار بإيسار..........يقبل دعاء عبدٍ يخافه ويرجيه
ويجعل لنا حظٍ على الضد ثوار.............والضد لا منه بغى الشي يرميه
بيومٍ به الخفرات يذهلن الاستار.............والرب له معنا جميلٍ ويعطيه
بجاه بن عدنان والناس الاخيار...............وبحق موسى يوم ربه يناجيه
عينيك ياوضحا كان الدخن ثار...............واللي يجي خدمه من الغل نسقيه
ناتيك صبيانٍ مناعير وامهار..........وزيرٍ لاجاء الفجر تسمع مناديه
ومخضرات رحابهن كل بيطار...........وملحٍ لعدلات المناظر نصفيه
ومدافعٍ ياعيد من طخم الاوزار...........لاقابلن قصرٍ يخليه راعيه
وحطاب هو وخليف جلبو من الدار........والقصر مافك المخالق مبانيه
هذي بدل هاذيك اخذنا بها الثار............ومعروفكم ياعيد ماني بناسيه
ان ساعف الباري وساعفن الاقدار............كلٍ على قيمة فعاله نجازيه
جنّب عن البلدان مالك بهن كار..................بيت الشعر كلن على قدر عانيه
عن دارنا ياعيد دوّر لكم دار....................ونفود حسناء لاتبزل مشاكيه
ان طعت شوري فرع من مر الاشجار.............والجوف لاتشقى بتالي محاكيه
نصيحةٍ ياعيد تر قربنا نار..............والنار ياكل صلوها اللي يحاضيه
فن كان تبي الشر فأبشر بالاشرار...........وتر شرنا مايالغى الذيخ تاليه
الا ومع ذالك على الحرب صبار..........نسمي وتالي حقنا مانخليه
وترخاوتك من عرض تسعين سفار.........الحازمي سكانة الجوف تعطيه
يعطون لك صاعٍ على شان منشار............حتى عن الرعيان تامن مفاليه
والا حكايا البلد مالك بها اخيار.............من فز له قبلك لعيني محاكيه


ويجلس الامير عبيد الرشيد ستين يوم وسط الجوف ويحمّل لحائل من التمر وهذه بقصيدته اللي توّعد به فيصل بن شعلان وابن هذال من عنزه لانهم هجو وخلو الجوف لعبيد عقب هدمة قصر مارد والقصيده هذه يتهدّد فيها الامير عبيد الرشيد ابن شعلان وابن هذال يقول الامير عبيد الرشيد(كل نون باخر الشطر الثاني عليها شده):
ماهو مهمّن فيصلٍ وابن هذال...........اللي مهمّن بلشةٍ به مهنا
مع واحدٍ غضٍ مع الزين مكتال...........راعي قرونٍ فوق متنه تثنا
سلم عليه وقل له مثل ماقال ............وعقب الغلا دلّ عليع يتجنا
يابو خلف جزعٍ مراعات الاسمال...........وشف لك جديدٍ يازبون المجنا
والعلم الاخر عندنا ياحمى الذال...............بأدنى بيوتٍ منزله طق عنا
تتلي ضعونٍ لمرذية كل خيال...............من ضيغمٍ بالأصل يعزون منا
والله هو اللي عالمٍ كل الاحوال............سواالفٍ ماينتعلم بهنا
والا انا ودي مع سمحات الاقبال...........ناخذ لنا وقتٍ بعجباتهنا
يامن يخبر فيصلٍ فرز الابطال...........ان الجبل دونه على الضد حنا
يوم الوغى نلحق على كل مشوال.........ومطارقٍ والموت بأطرافهنا
وين القصير وماردٍ وابن شلال.........وغرايسٍ بأشناقهن قطعنا
ستين يومٍ بأوسط الجوف نزال..........واركابنا يم الجبل يسفرنا
ماجيت كان انت شفيٍ بالافعال..........تظهر حسينٍٍ ياحمى كل دنا
نهجت يم (..) والصيد صلال...........والعوج لو كثرن فلا يثمرنا
والا تبي لك عند الاطعاس غربال..........انشد عن اللي جاء بأطرافهنا
لسيوفنا وسمٍ بهامات من صال.............وعقب النقايص يطلب النصح منا
مشهور خليّ بالرحاء بأيسر الجال...........وجدّك ترى ذباحة الشيخ حنا
وليل ونهار وقربنا يشده البال...............ادعيك كان انت لقربي تمنا
فالله بحق العرش وبحق الانفال............وبحق من له يافتى الجذع حنا
يرميك يوم انك تسريت الارشال...........اللي تبي لك خشرةٍ في وطنا
نلحق بك اللي فات من ماض الاجال.......بمخضراتٍ هّمنا سنهنا
اغداك تفريقك على ضدك المال..........اعطيت من لايفرجه لك ثمنا
والوجه منا يابن شعلان بإقبال...........ان ساعفت توتا بقيعان خنا
ذا قول من يازن كلامه الى قال.........ولا هو بلشانٍ بإطلاعهنا
وصلو على اللي جاء من الرب مرسال..........بالفاتحه وازكى صلاةٍ مثنا


وبعد المعركه قام حطاب السراح وولده غالب حطو عزيمه للامير طلال وللامير عبيد ومن معهم ويوم قلطو على الغداء بسقيفه القصر قال غالب لابوه حطاب خلنا نذبح عبيد وربعه لكن حطاب ماوافق اثر الامير عبيد قايل لخوياه اول مانقلط على الغداء كتفوهم واربطوهم وهم يقروننهم بحبال ويجيبونهم لحائل عاد يقول الامير عبيدالرشيد ويسنده على الامير طلال الرشيد :
يارب أسألك ياقديم القدامي.............بالكهف والكرسي وطه والانفال
تجعل لنا حظٍ رفيع المقامي............يامن جعلت محمدٍ خير مرسال
مني عليه افضل صلاة وسلامي.........تضفي على اهل البيت والصحب والأل
تممّت ياريف المقاوي كلامي..........وعيبٍ على من مثلي يهوّن الى قال
حنا الى قلنا كلامٍ نحامي..............نخاف من كلمة سفيهٍ بالاقوال
ومن الولي هبّة لقولي ولامي.........ويدّمت قولي يابو بندر بالافعال
نقلت لك وغدانهم بالمضامي...........وقرنت لك عمّالة الشين بحبال
ناسٍ مع ابوتهم وناسٍ يتامي............وناسٍ توّذى منهم العم والخال
من ولد ملحم مثل رز الوسامي.........وقلٍ يقل الناس من دورة إقلال
صيفيةٍ هلت غضبها شمامي............سيله نهب غثوة خليفٍ وشلال
باليل أنقل بالمتارس خيامي..............وأصبح على كبد العدو بأسوء الاحوال
انشد محامي صلوها عن منامي............اهل المرّوه والصناديد الابطال
ماني على الشدات رخوٍ حزامي.........عمّك الى منه هبى كل كل ذلال
والكاتب اللي خط خطك حرامي...........اللي قرى سكران معنا بالاقوال
انا بكبد الضد طاعون شامي.............وانشد عن افعالي الجديده والاسمال
بالودةٍ مافي حديده لحامي..............متسلسلٍ من روس كسابه الانفال
ضياغمٍ يزكون عند الزحامي...........ولا يبدلون الى منه غشى الناس الإبدال
وإسلم ودم ياشوق زرق الوشامي.........بعزٍ ويقفى العز من ربّي الاقبال
وصلو عن اللي للخلايق إمامي...........راعي الشفاعه والمخاليق ذهال


ويوم قربو حول حائل مابقى مع جيش ابن رشيد الا ثلاثه حطاب وولده غالب ورجلٍ ثالث قال الامير عبيد للرجل الثالث ابيك تروح ردّاد خبر للجوف قال الرجل للامير عبيد ليه وين الجماعه؟ قال الامير عبيد الجماعه يطلبونك الحل قال الرجل اجل ماعن الجماعه مقعد وهم يذبحونه وتصير قولته مثل . ويوم وصلو لحائل وهو يسجن حطاب وغالب وبالسجن قال غالب لابوه حطاب يلومه:
ياونتي ونة معيدٍ ضعيفه..........على ديارٍ خابرينه ورانا
الله قصار الخطا ياخليفه............من عقب ماهي طايلاتٍ خطانا
ومن عقب ماحنا ذراها وريفه..........اليوم نرجي مقعدٍ في غدانا
واليوم تمر(...) عندي طريفه..........من عقب ماناكل مذنب حلانا
لو البكاء ينفع بكينا منيفه.............الحوطه اللي شرّعو به عدانا
ماطعتني يوم اننا بالسقيفه............انت تقول هنآ وانا اقول هانا
انا اشهد ان عبيد جانا بحيفه..........وانا اشهد انه سلطةٍ من سمانا

وقال حطاب السراح قصيدته اللي يوم هو بالسجن اللي اوله:
ياموفقين الخير ياهل النجايب........عسى السعد بنحورهن حين تلفون


وقال غالب السراح اكثر من قصيده منهن قصيدته اللي يسنده على اخو فطيمه ناصر بن قادر اللي اوله :
ياخو فطيمه ديرتي وش جرى به..............هي خبرنا وإلا قصوره خرابات

رد عليه اخو فطيمه ناصر بن قادر بهالقصيده(بعض الابيات) :
هات القلم والقيل زاد إرتكابه...........وقم ياخطيب إكتب بيوتٍ جديدات
الى ان قال
يامر وامر عبيد ماينحكى به.............شيخٍ الى منه (....) ضيقات
شيخٍ لامنه راد دربٍ حكى به.............ياتي محل الظهر يمشي بجمعات
على النقى جاكم تهارف ركابه...............وانتم يجي بقتوبه يجي عشر بوقات
لاطب ديارٍ للمعادي عثى به..................عقابٍ تدلى والحباري منيخات

حطاب توفي بسجن ابن رشيد وغالب هرب كما وضح قصته اخونا (شمالي ) لكن غالب لم يطلب الوساطه لابوه عند عبيد لان ابوه مات (الله يرحمهم جميعا ) ولكم طولة العمر ولهم جنات النعيم



اخوكم خالد الجعفري ـ حائل

[حاكم العلي]

الأخ الكريم: خالد الجعفري

اشكر لك هذا الحضور المميز وهذا الحرص على سرد القصة و القصيد
للتاريخ نفحات و للمجد بطولات

دمت و دام قلمك المميز

[خالد الشمري]

الاخ ذعار مشكور على المرور والتعقيب

[عيوووون باااكيه]

يعطيك الف عاافيه اخوي مخلب

وتسلم مليووون ولاااهنت

[راعي الوقيد]

هلا والله بمخلب

حي الله هالــولــــد

الله يجعلهن ما يتكصمن اليدين اللي كتبن هذا العمل وقامن بهذا

المجهود المتعب ،،،

ان الذي دعاني لكتابه هذا الموضوع هو مايتردد عن هذه القصه من مغالطات من الناس وحبيت اقوم بسرد الموضوع كاملا ان شاء الله

من اي نوع هالمغالطات ,, اقصـــد وش وجه الإختلاف بين ما يتردد بين

الناس وبين ما كتبته هنا من سرد راائع للموضوع ..!؟

وعلى ما اظن ان مصدرك هو رواية الأستاذ / عبدالرحمن المرشدي ،،،

اخي مخلب !!

انا عندي رواية اخرى تختلف إختلافا ً بيِّنا ً من حيـث تسلسل الأحداث والقصائد وهي عن شريط عندي لأحد الرواة المعروفين << نسيت اسمه هآلحين !!!
وإن شاء الله سوف اقوم بإنزالها هنا لنرى اي الروايتين اقرب الى واقع الأحداث !؟
والظاهر إن الرواية عند اهل المدينة تختلف عن الرواية عند اهل البادية

سنــــرى !!!؟؟

لك التحيــــــــة ايها الراائــــــــع المبـــدع ،،،

والسلااااااام ...
..

[الامسح]

الاخ /مخلب ,,,,,,خالص الود مني لكل ماتقدمه روائع من التاريخ

صفحات مضيئه سطرها أبطال ,,,,,,,فليكن الخلف أمين على مأنجز

[راعي الوقيد]

[align=center]قال الراوي :-

ان عبيد العلي الرشيد راح للجوف يبي يرتِّب به وعيوا السراح يدخل !!
الجوف عليه سور ولا قدر يدخل عليهم ..!؟
وقال ما اقدر اصيدهم إلاّ بالحيله ..! وهو يامر على العبيد وهم يطقون الخيام ويزينون هكالصيوان للأميـر عبيد بن رشيد بطرف الديرة ، والله وهو يدلي يخرجيهم من جاهـ كساهـ وانطاهـ من الأرزاق واللي ينطيه فوقهن سيف ، وهذا ابن سراح يوم شاف الدعوى هاللون ..! قال لولدهـ : ياولدي خلنا نروح يم عبيد نسلِّم عليه وغديه ينطينا مثل هالناس حنا وش قاصرنا ..؟
قال الولد : والله يايبه مانا شايفه اخاف ان هذي خدعه ..!
تعامل هو ويّاوهـ الوكاد غصبه ابوهـ وهم يجون لعبيد ويوم جوهـ وهو يحط الضباب بيديهم ، ويرتِّب عبيد بالجوف وياخذ ابن سراح وولدهـ معه لحايل وهو يحبسهم ..
عاد يقصد الولد يعني ابوهـ ، يقول :

[poem=font="Simplified Arabic,5,white,normal,normal" bkcolor="black" bkimage="" border="double,9,orange" type=1 line=0 align=center use=ex num="0,black"]
ما طعت شوري يوم انا بالسقيفه = يوم انت تقول هنا وانا اقول هانا

انا اشهد ان عبيد جانا بحيفه = وانا اشهد انه سلطة من سمانا

اليوم تمر الجسب عندي طريفه = من قبل ماناكل مذنب حلانا

لو البكا ينفع بكينا مريفه = الغرسة اللي شرّعوا به عدانا[/poem]
ومن عرض قصيدة طويله ماعرفه ...
الثمرة رتّب عبيد بالجوف .. وبعد ثلاث سنين اطلق ابن سراح ورجع لديرته ،
يوم جا للديرة لى والله متغير عليه الوضع لى والله مرتبن به ودعواهم متضعضعه ..
وهو يقصد ابن سراح :

[poem=font="Simplified Arabic,5,royalblue,normal,normal" bkcolor="orange" bkimage="" border="double,9,seagreen" type=1 line=0 align=center use=ex num="0,black"]
يالله ياللي فوقنا معتلينا = حنا ومن يرجي ثوابك حذانا

وحنا بليا فزعتك ما بغينا = والزاد لو هو راهين ما هنانا

وحنا اليا نوى شيخنا ما نوينا = وعن الموارد قاصرات دلانا

السيف ماهو باطل باليمينا = دابان يصهل ناقله ما يدانا

والسفح ما يغديه كثر الدمينا = والحق ما يمشي بليا مشانا

يا لابتي وشنوحكم ..... = صرتوا ضعاف الحيل وانتم سمانا

ليا صار من زمل المحامل نشينا = وحنا علينا طسقهم وش بلانا

من قبل ما حنا بعز هفينا = تفتحت بيبانها لقبلانا

ومن قبل ماناطا الخلايق وطينا = واليوم بالرجلين كلن وطانا

يالبيض عدن الملاثم علينا = هاتن ملاثمكن ودوكن لحانا

وحطن خلاخيل الذهب في يدينا = وتجندن بسيوفنا يا نسانا

تدري فروع الغيد لو ما حكينا = حفايظ للي بقى من ورانا[/poem]

وعقب هالقصيدة وهم يمشون على رتبت الرشيد وهم يذبحونهم ويضهدون اللي موالين للرشيد من هل الجوف .. وبلشوا ـ الرشيد ـ الجوف عليه سور !! وهم يقصدون يقول :

[poem=font="Simplified Arabic,5,orange,normal,normal" bkcolor="black" bkimage="" border="outset,4,gray" type=1 line=0 align=center use=ex num="0,black"]
ان جيتنا يا عبيد نفتح لك الباب = حنا نقيف وفن ربعك يخشون
الجوف تلقى به خليفٍ وحطاب=ماهم فريق حروب عنكم يهجون
والله لو جمعت ربعك والاجناب =ذي ديرة السراح عنها يحامون
ياعبيد ماقصدك زكاة ونواب=هذا بغى ضيمار ياعبيد تكمون
ياعبيد يوم انت رفيق لحطاب=والدبس عند حسين يغرف بماعون
اللي دفس بربوعكم جر الاسباب=اللي له الدفاس ياعبيد تبكون[/poem]

وهذولا اللي موالين للرشيد يقولولون :

[poem=font="Simplified Arabic,5,white,normal,normal" bkcolor="coral" bkimage="" border="double,9,sienna" type=1 line=0 align=center use=ex num="0,black"]
يا اخوان نوره لا تصدون عنا = تروا البحر سوق من اسواق حايل
انخوا لنا عبيد ان ماجا مكنا = والا قولوله يزعجون الرحايل
تروا العرج وخليف خذوا ثمنا = وغدوا بغرسات تعيش القبايل
من ضربهم كل بداره يونا = لا ثار حس مثعلقات الفتايل
نرمي وحنا للنظر ما مكنا = يا عبيد والله ما نخص الزوايل[/poem]

المشكله عند عبيد بالسور اللي على الجوف ، لأنه بالاوله مسكهم بالحيله ، لكن الحين ماهي ماشية عليهم الحيله ..
بعدين قيل ان عبدالله يوم هو يروح لبغداد بروحته للعراق لقى له رجال يبون يذبحونه قطاعين طرق وهو يفكه ويوم فكه قال يارجل انت فكيتن من الموت هالناس اللي يبون يذبحونن فكيتن منهم انت وش انت ؟
قال عبدالله انا قطاع طريق ..
قال مار لو انت قطاع طريق انت هالحين تجملت بي واعتقتن من الموت علمن من انت .. انا شخص مانا بسيط انا حاكم.! انا حاكم ولاية بومبي .؟ علمن باسمك وعنوانك .. للدنيا واحواله ...
قال انا عبدالله العلي الرشيد واخبره بحاله .. وهو يكتب اسمه وعنوانه .؟
وهو يطري عليهم وهم يرسلون له مناديب ومعهم مكاتيب مضمونهن " انه عندنا ديرة عاصية علينا عليه سور.؟ تسان تلقى لنا سلاح يهد السور فانت اسعفنا بوه .؟
قال: عندي عزالله عندي السلاح اللي يهد الجبال !؟ عندي مدافع ...
وهو يدرّبهم بالرمي على ناصر ومنصور بالهند الى ما تعلموا بالرمي عليهن وحطهم بهكالسفينه الى ما وصلوا الكويت ويوم وصلوا الكويت جروهن على بغول وبعارين الى ما جو بحايل وجربوهن بالسمر الى هادن هكالقلعة .. قال ايه هذا اللي عزالله يهد سور الجوف .!؟
وهو يرسل عاد عبيد له قصيدة لأهل الجوف يبشرهم انه يبي يجيهم يقول عبيد العلي الرشيد :

[poem=font="Simplified Arabic,5,burlywood,normal,normal" bkcolor="seagreen" bkimage="" border="double,9,blue" type=1 line=0 align=center use=ex num="0,black"]
يالله ياللي للجزيلات وهاب = تعطي ولا جزل العطى منك ممنون

يالله ياللي من ترجاك ماخاب= ياخير لك المخاليق يرجون

ياغافر الزلات يا رب الارباب = يا ناصر موسى على قوم فرعون

تفتح لنا من باب نصرك لنا باب = واصحاب بدر وان فتحته يحضرون

آمين ياقاضي الحوايج والانواب = يا وامر وامره على الكاف والنون

راكب اللي لا مشى يوثب اوثاب = اليا شفت زوله يختفدز تقل مجنون

وعقب اربع يلفي عزيزين الأقراب = اللي على الديرة قديم يحامون

قل بدال ما كزيت خط ونجاب = لابد ما نمشي وناتي على الهون

حنا هذولا مجهدين بالإطلاب = ننطر مراسيل من الهند يلفون

من عند ابن يعقوب حمال الانواب = تسعين ليله والمراسيل يمشون

ما تجرتي من تجرة الناس بخضاب = من راس قوم للحرايب يهدون

ان ساعف الباري وجينا بالاطلاب = لى تشوف منصور لخشمه يواسون

ناتيك بجموع يعيون الإدّاب = يا ويل من بأطراف نزله يحلون

ضياغم ترخص حلاله والأرقاب = ودون الرفيق بمالهم ما يدارون

يا من يبشرني بخليف وحطاب = تبشير فرعون بموسى وهارون

ما نضربه بالبزر نضربه باطواب = واخش وسط الجوف وانتم تشوفون[/poem]

وهو يجيهم بالمدافع ويدك السور عليهم وياليهم ويرتب بالجوف وهم يالونه الرشيد اليا ما انتهى حكمهم ...
ويتحدث الامير عبيد في هذه القصيدة عن استيلائه على الجوف سنة 1254هـ
من حاكمها السابق حطاب السراح :-

[poem=font="Simplified Arabic,5,black,normal,normal" bkcolor="skyblue" bkimage="" border="double,9,seagreen" type=1 line=0 align=center use=ex num="0,black"]
يالله ياللي عالم كل مكتوم=الطف بنا يا عالم السر والغيب

تجعل لنا عرض عن الشين معصوم=يا واحد نزهت نفسك عن العيب

أبن ادم ما بين معطى ومحروم=من فضل من لا فيه شك ولاريب

يا طير ياللي حايلِ تطلب الحوم=من فضل والي العرش مالك مطاليب

الضد من ضيمك غشيش ٍ ومضيوم=ومقصر نقصة بطق العراقيب

عقب الطفاخ وكثرة الهرج والزوم=صبوا كثير علومهم بالقواليب

اللي فقد خلي من الناس ماشوم=وحاموا عليه موردين المغاليب

واضحى لنا الحربي من الناس ماسوم=وسم يخلي الشاه ترعى مع الذيب

واللي صدر حاموا على راسه الروم=وساق الزمايل حزبة والمهابيل

والغربي انكف حصل اللوم والشوم=عقب الديار وكسبهن والحواريب

هو خابر خرفية باول الصوم=صواقع ترمي مطرها دهاريب

يلضي سنا برقه على كل مزموم=نهارها كاليل من واهج السيب

منا القصير وجارته سكانها البوم=وجنود حطاب لناره حطاطيب

واعذر ما يجري على العبد مقسوم=وغرب يريد محمد بالمزيريب

في منزل يا خذ على الترك معلوم=من كحمل السلطان يا خذ مطاليب

واللي بقى امس يا خذه منه اليوم=ولا ظنتي يعطونها بالتلاعيب

وعماك مثل اللي عن الديد مفطوم=عقب السعه ضاقت عليه المهاريب

مثل البعير اللي عن الوقف مشكوم=اعذر براسة عقب رد المناديب

وشيطانها عقب التزاوير مزكوم=والكذب ما بقى يتامى الكذاذيب

كل شرب من صافي الغبن وهموم=وجنحانهم نتفت ورش الذنانيب

واشكر ولاتكثر على نفسك اللوم=ما جا محله ياربيع السعابيب

افعالنا تخبر اللي صار لك قوم=نسري على المشعل وقدح المشاهيب

والصبح نرخص نفسنا باول السوم=حق البيوت اللي بوجه المعازيب

كم حد هندي من الضرب مثلوم=بايمان ربع مثل عمل القصاصيب

وانا لغاراتك الى الموت مضموم=تزيد هقواتك ولو شفت بي طيب

والى تعلينا على كل لاهوم=يوم الوغى ننطح وجيه الجناديب

لى غليت الاسعار والزاد معدوم=نلحق نقايص بالرهن والتراحيب

لعيون من وسطه عن الردوف مهضوم=سلطان باشات البني الرعابيب

بنت الكرام اللي مناعير وقروم=من لابة ما استلحقت بالمشاعيب

ترعى بظل موردة كل مسموم=غصب بظل مكدرين المشاريب

وخزني على باس الدهر راس شغموم=الليث ابو تركي مهدي المصاعيب

طير يخبط الطير وان هد بجزوم=هو منتهى نجد وملفى المراكيب

بحزم وتدبير وراي ومفهوم=وان قيل من هو فاعرفوا منقع الطيب

راس الجهاد ان قال الدين مرجوم=قيدوم ربع وان نخى كل يجيب

وان صار له من حادث الدهر ملزوم=ناتي خفاف عقب السرا هراجيب

واخدم لغاراته ولو كنت مخدوم=يكفية عن حكي اللسان التجاريب

وختمي عدد ما يزهو الليل بنجوم=مني على راعي الحرم والمحاريب

سماه والي العرش راحم ومرحوم=والرب يقبل دعوة العبد ويثيب[/poem]

وسلامتكــم ...
..[/align]