[align=center]والله يا اخوان اني عارفن ان فيه ناسن يدورون علي الزله
ويتحينون الفرصه علشان يمسكون اي سالفه عن الشبث علشان يزودون عليه
ويهلونه هنا . لذلك قلت يا شبيثان لا تركز عليهم
واحرق الاوراق اللي بيدينهم
وبدال منت كل شوين حاطن على واحدن منهم ارثع بروحك
وطلّع سويلفاتن عن نفسك علشان يدرون انك فضيخ قلب ولا تهمك هالسوالف
<<<< واثق من نفسه
الوكاد اني ابترككم مع مواقفن صارت لي في ماضي الايام ..
الموقف الاول :
مرتن من المرات طلعت مع خويانن لي مخيمين
ويوم جاء وقت النومه فرشنا الفرش نبي نستعد للنومه
وكان فيه واحدن من الزقرت بس يعلتس علتس
المشكله ان علتسوه اكبر من افموه ( علتس خبل )
ويوم بغا ينام وهو يقط علتسوه ليمار واقعن على فراشي
المشكله اني مادريت بوه .
والله وانا انعوي بفراشي من التعب وانا اسحب الشفاط ( يعني دعسته شخير )
ومثلي مثل اي انسان بريئ لازم اتقلب بالفراش
المهم احاول اسحب رجلي ليمار ناشبتن بالفراش
اقول به يمين ويسار ليمار ماش
المشكله اني احسب اني مسجون بابو غريب وهي تقوم تلعب بي الهواجيس
ياربي تسان مهم مصوريني مع هالمساجين
وافضحي واقردي
المهم تمالكت اعصابي وركزت شوين واكتشفت المشكله ....
وهي ان علتس الخبيل طايحن بفراشي ولازق بالفراش
ويوم انجضعت بالفراش لزق بشعر رجلي
المهم بلشت هالحين ابي الفكه منوه واحاول ليمار مامن فكه
وانا اقوم لي صيااااااح ( اويلي افزعو لعنبو حيكم وخذت اوووووووووه ياهنووووووووووه )
وهم يتقامزون تقل جايتهم مصيبه
قالوا وش علمك قلت ابي حديكم يفك رجلي من هاللي به
قالوا وحنا نحسبك مقروص اثريك ناشبن بهالعلتس
الوكاد وهم يتعاونون علي انا والعلتس
وبعضهم يمسك رجلي وبعضهم متجودن بالفراش
وهم ينتلونوه ليمار متنتفن شبيثاااان ...
الموقف الثاني..
هذي طال عمركم مرتن من النوبات كنت جالسن بالمجلس وعندي ابو وعمامي اثنين
وكلهم شيبان وكنا بايام العيد
الوكاد عقب ماقهويتهم وخلصت جلست عند الدلال ( تسني رجل )
وهم جلسوا يسولفون عن امور هالدنيا ( الله يكفينا شره )
الوكاد انا خشيت جو فهاوه ( بواهه ) وقمت احاتسي روحي
واحط يديني بمخابيي المهم لقيت معي طرطعان من حقات الوغدان
وانا امسكه واراعيله وانا اقرب فتيلته للنار يومنه ولعت
وفي هالاثناء قمت اراعسلهم ليمار مهم يمي
قلت بنفسي تكفون سامحوني والله غصبن علي اسمه اللي زرقت
وانا اقطه حدر المنقل
ويوم خذيت شوين وهي تثور سليما وهم يتقامزون الشيباب
ليمار كلهم بحظني وهم يقومنون يردوني ويرجفوني
واخرته وهم يكرشوني .
الموقف الثالث ..
مرتن من المراريت كنت توي اخذن لي دش
وانا اقف قدام المنظره امشط قراعيطي ويوم امعنت المراعات ليمار شعرت شيب
نابتتن بين خصلات شعري
المشكله انه بينه وكبيره مهي مثل الباقيات
قلت يا شبيثان مالك الا انك تنتفه
المهم وانا اقوم انتف ليمار سوداء
وانتف اللي عقبه ليمار مثله سوداء
ليما صارت صلعه براسي قلت لا والله خوش
شيب وصلع توه كملت
وانا اروح للحلاق قلت ابيك تنتف هالشيبه ولك اللي تبي
والحمد لله تم نتفها ...
الموقف الرابع ..
مرتن كان عند الوالد ضيف
وانا واقفن اقهويه وشادن حيلي ماودي افشل ابوي
ويوم صبيت لوه الفنجال الاول وهي تجيني العطسه
واقوم احرك خشمي ابيه تولي ليمار ماش
والمشكله اني يديني كلهن مشغولات
وحده به الدله والثانيه به الفناجيل
ولا عندي احد من اخواني ( خذلوني هالمره )
يوم انه وصلت قلت مالي الا اني اسلم امري لله
وانا اعطس هكا العطسه اللي بعمري ماعطست مثله ( من قلب )
ليمار انا طايحن بحظن الضيف والدله على راسوه
وانا اراعيلوه يمار مادري وش اقول
وانا احبوه هكا الحبه اللي ماعندك احلامنه
قلت الغالي بك طعم قهوه
وانا احط رجلي وسط مطارده شرسه من قبل الوالد
واسف للطاله
وتقلدوا تحيتي[/align]
رد مع اقتباس
المفضلات