[poem=font="Simplified Arabic,4,white,normal,normal" bkcolor="transparent" bkimage="" border="none,4,gray" type=1 line=0 align=center use=ex num="0,black"]
(( وصية الشعر ))
ياوجودي وجد منهو ماتو أعياله وشايب = أو وجود اللي توجد ضاقت الدنيا بعينه
هاجسي لا طال ليله ساقني .. وسقت الركايب = لا تغنى بالجزايل .. خابرينه .. خابرينه
هاجسي لامن تهيض مثل غيم المزن طايب = والله أنه ما يشح الهاجس .. الله لا يهينه
يشبه لموج البحر لاهاج بمواجه عجايب = ادري أنه يشبه الربان .. في متن السفينه
لا تهيض ساق رجلي غصب لطوال الجذايب = يوم جيت الرجم ضاق الصدر في وقته .. وحينه
شفت عود(ن) مرقب المرقاب وأدموعه سكايب = أيتعبر .. ويتهضم .. يفرك الشايب .. يدينه
أشهد أنه هزني منظره والخفاق ذايب = ياجماعه هالني مبحوح صوته من ونينه
شايب(ن) عدى على المرقاب وأجروحه عطايب = من يشوفه .. من يشوفه .. يخلف أعقول(ن) .. ذهينه
كل يوم أيزود همه .. من ذهايب .. في ذهايب = مايهيّد من ونينه .. مايهيّد من حنينه
شفت بعيونه ملامح من علامات النوايب = يشبه لكهل الضواري أشهب(ن) فاقد يقينه
لحيته بيضاء بوجهه كلها أغبار .. وترايب = أنحدر شعر الحواجب وأختلط .. برموش عينه
أحدب(ن) حاله هزيل وجارت أظروفه .. صعايب = يبترم ويهز راسه واضحه فيه .. الغبينه
مثل عود(ن) في سموم القيض يبّسه الهبايب = زفرته تفضح مشاعر كانت أبصدره كنينه
شايب(ن) لاشفت حاله يشتكي ضيم .. ومصايب = بانت الحسره بوجهه والحزن .. غطى جبينه
ألتفت وده يقوم ويشر أبصدره .. لهايب = نارها .. ولا سناها .. تحترق منها .. مدينه
قال انا المنهان عفت الوقت من زود .. الغلايب = يشتكيلي من زمانه عايف(ن) شينه .. وزينه
قلت وش بك ؟ وش علامك ؟ قال من ضيم القرايب = قلت قلي من تكون ؟ ورد في نبره .. حزينه
قال انا الشعر الجزيل اللي له اعلوم وطرايب = في زمان(ن) فات دوره شامخ(ن) .. محلا سنينه
لي تواريخ(ن) عضيمه .. سامكه فوق السحايب = عند ناس(ن) لاحكو بالشعر قدره حاشمينه
بالجزايل .. والفرايد .. والمعاني .. والغرايب = عالي(ن) قدري رفيع وكانت أعلومي .. رزينه
دارت الدنيا باأهلها وغابت أعلوم الحبايب = وين راح أفلان .. وأبن أفلان .. وين فلان .. وينه
مابقى للشعر قدر وكل شي(ن) له .. سبايب = جاء زمان(ن) .. ماعرفته .. ثقل دمه .. ثقل طينه
قال لي أرجوك جهّز للشعر عوج النصايب = وأدفن الذكرى أخير(ن) وأترك أعلومي .. دفينه
شعر
خليف الجهيلي [/poem]
رد مع اقتباس
مشرف مضيف الترحيب والتعارف
احم احم
المفضلات