بعد غيبه
هذه القصيده نشرتها حصرياً لمنتدى آجا
ولكن بطلب من اخي العزيز بشير اللويش أطرحها هنا
مع احترامي للجميع واعتذاري من الاخوه في منتدى اجا
لأني احبكم يا شمر هنا وهناك
بنت الرجال الطيبين المشاكيل
مدري وش اللي للمفارق حداها
راحت وخلّت دمعةٍ ودها تسيل
ولا ردّها عن خدّها الا حياها
من يوم غابت مالي الا تفاصيل
البسمه اللي طوّلت في شفاها
في جلسةٍ فيها دلال وفناجيل
وتمد لي فنجال واشرب غلاها
ولا قلت كيف الحال قالت تساهيل
وان قلت هاتي يدك تزحف وراها
كانت ليالينا غرام ومواصيل
وكانت تجي دايم بحزّة لقاها
كنا نعيش الحب ضحك وتعاليل
ترضي غروري وبغروري رضاها
كنا نعيش ولا نحسب المقابيل
مير الليالي ذوقتنا عناها
أثر الفرح كذبه مثل كذبة ابريل
واثر السعاده تقهر اللي بغاها
خلاص.. لا ترسل عليها مراسيل
الصبر وقّف.... والعلوم... تخفاها
قل للطنايا والطنايا مهابيل
فالفزعه اللي ما يوفّى جزاها
رجّالهم يسوى ثلاثين حلحيل
وان شحّ داها فالطنايا دواها
شمّر ونعم بهم شيوخ ورياجيل
إن قالها الله قرّبوا لي مداها
بنت الرجال الطيبين المشاكيل
اللي حداها للجفا ما حداها
رد مع اقتباس
المفضلات