السلام عليكم ورحمة الله وبركاته.
كل عام وانتم بخير.
ياسبدين حيّي عاجز عن شكركم ومستحي منكم و(تاكتن االعبرة)شوقا"اليكم.:o
والشكر موصول لحبيب القلب ورفيق الدرب والغربة مفتاح فورتين.اللذي اكتشف مواهبي وأنار لي طريق المستقبل و(LBC) :D
(هذي ضحكتي الكلاسيكية حينما اكون مسفهل وفي لحظة تأمل)
لكن الأولة بالأولة أقول لكم العذر والثانية واللي تتبعه انتم وضميركم ...وبعدين تجي المشاركات ان شالله.
قبل العيد بكم يوم .....ويوم شفت التراحيب..والمهلّلي مايولّي.... . . انزجرت شوي ومعناها (انتفخت) لغير الناطقين باللغة الحايلية.المهم قام يتصل علي مفتاح14 وأنا اعطي اشكل ويرسل رسايل ياخوي وين مشاركتك الربع ينتظرونك؟؟ ويوم شفت اهميتي اخذتني العزّه بالأثم وعرفت اني مضيع عمري ..وبعد محاولات من مفتاح فورتين وبعد توسط اهل الخير ..قلت ارد على جمهوري الحبيب..ورحت لغرفة الكمبيوتر ابي ارد وعجزت لاادخل مع الباب ياولد... ياعدل...يابدل..مافي فايدة...وبانت الأمور اني محتاج تنسيم(لاتفهمون غلط يعني محتاج تهزئة) المهم مادريت الا والتلفون يدق ...سلام ....عليكم السلام ياهذا صهري العزيز قال وقد تطاير الشرر من عينيه(كما رواها لي احد ندمائه على قهوة الصبح) ويحك لا أبى لك ايها" المهستر" وينك تارك المرة عندي ومولعن زقيرتك (ماهو مقتنع اني بطلت التدخين) وعيونك حمراء من هالملوي (الكمبيوتر)تقل عيون خمّار والله لولا أبوك والا انا من شفتك غاسل يدي ومتأكد انك" ترقل" عاد ياسبدين حيّي يوم قال ترقل طارت عني رحمة الله واقول لكم ليش ...اولا ان ها الكلمة مكثرة علي وثانيا ان معناها ماهو زوين حسب تفسير الفيروزابادي في كتابه المحيط ...للاستفادة انظر الطبعة الثانية تحت كلمة الرقلة ...يرقل رقلا" .....فهو "رغوث" وهي الجذعة من البهم ..ولا تجزي عن الضحيّة وتفكك من ضيف باليك نص الشهر يبي ذبايح وعلوم رجال ..المهم ياسبدين مللّي انا بي مر وشجاعة وكبرياءوقليل من النخوة وكمية لاباس بها من الحياء(شوفوا الثقافة والحركات والسكنات)
]المهم قلت له وخرّ وجهك ياعمي ابغى اسكر السماعة لاينقرض خشمك (ذوق وادب واخلاق حتى وانا زعلان) وطاخ بالسماعة..بعدها ياحيّيني شعرت بالانفشاش رويدا" رويدا"..لكن ليس بالقدر الذي يجعلني ادخل الغرفة...الزبدة دق التلفون مرّة ثانية قلت اكيد ابو الشباب انقرض خشمه او صار لجبهته شي المهم رفعت السماعة بعنف وكبرياء وشيءمن التوجّس..وقلت آلو نعم ..خير ياطير ريحنا الله يرحم والديك قال ترقل قال ..ماامداني اكمل كلامي الا وشعرت بالقشعريرة تغربشتن ...قولوا ليش ..؟ طيب ليش(عارف ماحد يقرا انا لحالي)اتاري اللي دق علي المدير بتاعي....قال اي ترقل واي طير وينك ياشاطر لك خمس ايام ما داومت ..لا ومكذّب علينا تقول ابزور امي بحايل 0ياوالله ماتنرقّع قلت ياطويل العمر قال طويل العمر بعينك..انكتم خلّ اكمل كلامي..انت منت متربي وداشر( افآآآآآآ وشدرّاه ) وش رايك يابابا نرسل لك السواق على شان تكرّم وتداوم ...عاد انا استحيت و قلت اللي تشوف طال عمرك...قال اللي اشوفه ان السواق جايك هالحين ومعه باقي راتبك بعد خصم السلف والقطة ومعه ملفك ولااشوف خشّتك ..عاد مايبيلي تنسيم انفضخت من كيفي ...ايه على طاري ملفّي...كان يحتوي على الآتي
1-شهادة خامس ليلي مكافحة امّية ومنكب عليها شاهي.
2-شهادة آلة كاتبة على دور" أبو حنيك"
3-مقص شعر من مخلفات الحرب العالمية الثانية"عاد المقص وش دخّله"
4-شهادة نوط الشجاعة والقفز المظلّي الحر "على دور الاخوان"
5-شهادة حسن سيرة وسلوك ..وخبوب...من امير الفخذ مصدقة من شيخ القبيلة بان المذكور فيه شوي رقلة وحذفة يمين وتحق عليه الصدقة 0
المهم مالكم بطويله جابوا لي فليساتي وملفي وما دريت بنفسي الا وانا مثل بانك بانثر اذا دعسته سيارة ومار انفش وادخل واكتب لكم هالعذر الذي ارجوا قبوله حفظكم الله ورعاكم وجعلها امطار خير وبركه وعم بنفعها الجميع وعلى قولة الشاعر ياكليب شب النار ياكليب صبه* وصبوها للنشامى عاظهور الخيل..(جته الحذفة)
الزبدة
انا توي جاي من قلعة وادرين وراسي صايرن مثل "الخنّانة" (حسب تعبير امي حفظها الله)لااركبته بالددسن ولفينا شوارع الديره ندور علف للصخول.المهم امي واقفة بالباب تصوت لي ونعوله بيده فضحتوني .معزومين الليلة ...افيييييه يالله سلام
رد مع اقتباس
مشرف مضيف الترحيب والتعارف
يبي يرفع عليك دعوى 
p:p
المفضلات